រថយន្ត
អន្តរជាតិ
២សប្តាហ៍ប៉ុណ្ណោះ ក្រុងតូចមួយនៅអ៊ីតាលី ថតបានរថយន្តល្មើសល្បឿនជាង៥៨០០០គ្រឿង
×![]()
ដោយ: ធីតា
អាជ្ញាធរក្រុង Acquetico ភាគខាងជើងអ៊ីតាលី ដែលនៅជាប់ព្រំដែនបារាំង បានបង្កប់កាម៉េរាចាប់ល្បឿនយានយន្ត ហើយត្រឹមតែរយៈពេល២សប្តាហ៍ប៉ុណ្ណោះ កាម៉េរាថតបានរថយន្តចំនួន៥៨ ០០០គ្រឿងដែលបានបើកហួសល្បឿនកំណត់ ពោលគឺលើសពី៥០គីឡូម៉ែត្រក្នុង១ម៉ោង។
លោក Alessandro Alessandri អភិបាលក្រុង Acquetico បានបញ្ជាក់ថា មន្ត្រីរបស់លោកទទួលបានបណ្តឹងជាច្រើនទាក់ទងនឹងការបើកលើសល្បឿន។ ក្រោយការបំពាក់កាម៉េរា តាមដងផ្លូវ អាជ្ញាធររកឃើញរថយន្ត ៥៨ ៥៦៨គ្រឿង បានបើកបរលើសល្បឿនកំណត់ ចន្លោះពីថ្ងៃទី១៣ ដល់ថ្ងៃទី២៧ ខែកញ្ញា។
អ្នកបើកបរបង្អង់មកល្បឿន៥០គីឡូម៉ែត្រក្នុង១ម៉ោងតែប៉ុន្មាននាទីក្នុងទីប្រជុំប៉ុណ្ណោះ បន្ទាប់មក ពួកគេបានបង្កើនល្បឿន ដោយអ្នកខ្លះបើករហូតដល់ទៅ១៣៥គីឡូម៉ែត្រក្នុង១ម៉ោង។ លោកអភិបាលក្រុងបានបញ្ជាក់ប្រាប់សារព័ត៌មាន Corriere Della Sera ថា ករណីល្មើសល្បឿនភាគច្រើន កើតឡើងនៅកណ្តាលថ្ងៃត្រង់។
លោក Alessandri មានការបារម្ភយ៉ាងខ្លាំងចំពោះសុវត្ថិភាពថ្មើរជើង ដោយលោកបានអះអាងថា អាជ្ញាធរនឹងបន្ថែមកាម៉េរាចាប់ល្បឿននៅតាមតំបន់ដែលមានថ្មើរជើងឆ្លងកាត់ ព្រោះបើផ្អែកតាមទិន្នន័យនេះ អ្នកបើកបរម្នាក់ក្នុងចំណោម៣នាក់ បានល្មើសល្បឿន៕
© រក្សាសិទ្ធិដោយ thmeythmey.com
