ជាតិ
សង្គមជាតិ
អាជ្ញារធរខេត្តព្រះសីហនុ រុះរើយីហោរបស់ចិនដែលសរសេរខ្មែរមិនត្រឹមត្រូវ រូបភាពពីលោក ឱ សារឿន
× «យីហោប្រទេសចិន! កំពូលឆ្នេរ៖ ហាងលក់នាយកដ្ឋាន! លោកបណ្ឌិត។ផ្នែករឹង!...»។ សំណេរទាំងនេះ ដែលទំនងជាបកប្រែតាម Google Translate បានធ្វើឲ្យពលរដ្ឋខ្មែរហួសចិត្តយ៉ាងខ្លាំង ជាពិសេសអ្នកប្រើប្រាស់បណ្តាញសង្គមហ្វេសប៊ុក ដោយពួកគេបានរិះគន់អាជ្ញាធរខេត្តព្រះសីហនុ ដែលខ្វះការត្រួតពិនិត្យ និងបណ្តោយឲ្យអាជីវករចិនធ្វើស្រេចតែនឹងចិត្តខ្លួន។
ក្រោយរងនូវការរិះគន់ និងការបង្ហោះព្រោងព្រាតពេញបណ្តាញសង្គម អាជ្ញាធរខេត្ត បានចុះណែនាំ និងរុះរើយីហោដែលសរសេរមិនត្រឹមត្រូវ និងខុសអក្ខរាវិរុទ្ធ ទាំងនោះ។ បើតាមលោក ឱ សារឿន ប្រធានមន្ទីរព័ត៌មានខេត្តព្រះសីហនុ មូលហេតុដែលនាំឲ្យមានស្លាកយីហោខុសអក្ខរាវិរុទ្ធច្រើនដូច្នេះ ដោយសារតែម្ចាស់អាជីវកម្ម មិនបានសុំច្បាប់អនុញ្ញាតពីអាជ្ញាធរមូលដ្ឋាន និងមន្ត្រីជំនាញ ដើម្បីឲ្យមានការចូលរួមត្រួតពិនិត្យខ្លឹមសារ អក្ខរាវិរុទ្ធ ទំហំអក្សរជាមុន។
លោក ឱ សារឿន បានបញ្ជាក់ប្រាប់សារព័ត៌មាន ThmeyThmey តាមទូរសព្ទថា៖«និយាយទៅ ឲ្យតែមានការលើកដាក់ស្លាកយីហោជាភាសាចិន ឬភាសាខ្មែរ ឬខុសអក្ខរាវិរុទ្ធ ឬការដាក់អក្សរចិន ធំជាងអក្សរខ្មែរនោះ ខាងអាជ្ញាធរ និងមន្ត្រីជំនាញ បានចុះរុះរើ និងដកចេញស្លាកយីហោ ដែលមិនត្រឹមត្រូវ និងណែនាំឲ្យម្ចាស់យីហោដាក់វិញឲ្យត្រឹមត្រូវ»។
ប្រធានមន្ទីរព័ត៌មានដដែល បន្តថាដើម្បីឲ្យខេត្តព្រះសីហនុរីកចម្រើន គឺត្រូវការវិនិយោគពីចិន ដូច្នេះហើយបានជា រាល់បញ្ហាដែលកើតឡើងកន្លងមក អាជ្ញាធរចេះតែអនុគ្រោះ ដោយគ្រាន់តែណែនាំ និងកែតម្រូវទៅតាមច្បាប់ទម្លាប់។
ទោះយ៉ាងណាក៏ដោយ លោក ឱ សារឿន បានស្នើដល់ប្រជាពលរដ្ឋជូនដំណឹងក៏ដូចជាផ្តល់ជាទីតាំងជាក់លាក់មកកាន់អាជ្ញាធរ ករណីឃើញមានស្លាកយីហោ ឬប៉ាណូណាដែលមានកំហុសឆ្គង ដើម្បីឲ្យអាជ្ញាធរចុះទៅដោះស្រាយឲ្យទាន់ពេលវេលា៕
Tag:
ភាសាខ្មែរ
អក្ខរាវិរុទ្ធ
ស្លាកយីហោ
ព្រះសីហនុ
ចិន
© រក្សាសិទ្ធិដោយ thmeythmey.com