ជាតិ
សង្គមជាតិ
លោក ព្រាប កុល៖ ព្រះសីហនុ អាចក្លាយជាអាណានិគមចិន បើយើងរអាមិនហ៊ានទៅ ព្រាប កុល នាយកប្រត្តិបត្តិនៃអង្គការតម្លាភាពកម្ពុជា (រូបភាពបានពី ផេក ហ្វេក ប៊ុក លោក ព្រាប កុល)
× ខេត្តព្រះសីហនុ នឹងរងឥទ្ធិពលបរទេសកាន់កាប់ ហើយអាចជាតំបន់មួយដែលជនជាតិចិនធ្វើអាណានិគមដោយប្រយោល នៅពេលដែលជនជាតិខ្មែរមានបំណងគេចវេះ មិនទៅខេត្តនេះ ដោយសារអសន្តិសុខ ឬដោយសារហេតុផលផ្សេងៗនៃវត្តមានជនជាតិចិន។ នេះជាការលើកឡើងរបស់លោក ព្រាប កុល នាយកប្រត្តិបត្តិនៃអង្គការតម្លាភាពកម្ពុជា។
ក្នុងបទសម្ភាសជាមួយសារព័ត៌មានថ្មីៗតាមទូរសព្ទ លោក ព្រាប កុល បាននិយាយថា «បានជាខ្ញុំហ៊ាននិយាយបែបនេះ ព្រោះក្រៅពីភាពអនាធិបតេយ្យរបស់ជនជាតិចិនមួយចំនួន និងការកើតអសន្តិសុខគ្រប់ទម្រង់ ក្នុងខេត្តព្រះសីហនុ គឺជាការលេចឡើងនៃវត្តមានកាស៊ីណូរាប់សិនកន្លែង ដែលបាននិងកំពុងប្រតិបត្តិការយ៉ាងស្របច្បាប់ ក្នុងទ្រង់ទ្រាយមួយធំ ដែលមិនធ្លាប់មានពីមុនមកនៅកម្ពុជា។ ទ្រង់ទ្រាយបែបនេះ អាចប្រៀបធៀបទៅជាមួយទីក្រុងម៉ាកាវ ឬទីក្រុងសៀងហៃ ប្រទេសចិន»។
ប្រធានអង្គការក្រៅរដ្ឋាភិបាលរូបនេះ បន្តថា កាស៊ីណូជិត៦០កន្លែង ដែលបានបង្កើតឡើងនេះ ក្រៅពីបានផ្តល់ប្រភពចំណូលទៅឲ្យរដ្ឋាភិបាលតាមរយៈការបង់ពន្ឋ និងការផ្តល់ឱកាសការងារបន្តិចបន្តួចដល់ប្រជាពលរដ្ឋខ្មែរ គឺគ្មានអ្វីប្រសើរឡើយសម្រាប់ខេត្តព្រះសីហនុ។ ផ្ទុយទៅវិញ មានតែបង្កើតឱកាសអសន្តិសុខកាន់តែច្រើនឡើង ពីការលេងល្បែង ដូចជា ចោរកម្ម ការចាប់ជំរិត ការជួញដូរផ្លូវភេទ និងគ្រឿងញៀនជាដើម។ ផលអវិជ្ជមានទាំងនេះ អាចបង្កជាហានិភ័យច្រើនទៀត នៅក្នុងខេត្តនេះនាពេលខាងមុខ បើអាជ្ញាធរ មិនយកចិត្តទុកដាក់ និងមិនគ្រប់គ្រងសកម្មភាពនេះឲ្យបានល្អ។
លោក បន្ថែមថា ចំពោះការលេចឡើងនូវអសន្តិសុខ ដែលគ្មានសុវត្ថិភាពបែបនេះ នៅខេត្តព្រះសីហនុ វានឹងក្លាយជាខេត្តមួយគំរូអវិជ្ជមាន សម្រាប់ជនជាតិខ្មែរ និងបរទេសក្នុងការខ្លាចរអា ឬមិនហ៊ានទៅលេងកម្សាន្តនៅទីនោះទៀត។ បើតាមការយល់ឃើញរបស់លោក ពេលដែលជនជាតិខ្មែរមានបំណងគេចវេះ មិនទៅខេត្តព្រះសីហនុ ដោយសារហេតុផលខាងលើ ខេត្តនេះនឹងរងឥទ្ធិពលបរទេសកាន់កាប់ដោយជនជាតិចិន ហើយអាចជាតំបន់មួយដែលជនជាតិចិនធ្វើអាណានិគមដោយប្រយោល។ លោក បានបញ្ជាក់ថា «បើជនជាតិបរទេសមួយមានឥទ្ធិពលខ្លាំងក្នុងតំបន់មួយ ដែលអាចធ្វើអ្វីតាមចិត្ត រហូតដល់ជនជាតិខ្មែរយើង មិនអាចជួយបាន ពេលនោះហើយនឹងក្លាយជាដែនដីអាណានិគមដោយប្រយោល»។
លោក ព្រាប កុល បាននិយាយទៀតថា «ផលចំណេញតែមួយគត់ដែលខ្ញុំមើលឃើញពីកាស៊ីណូ គឺចំណូលពន្ឋសម្រាប់ចូលទៅរដ្ធ បើមានការប្រមូលពន្ឋត្រឹមត្រូវ ពីក្រុមអ្នករកស៊ីល្បែងទាំងហ្នឹង។ ប៉ុន្តែយើងមិនត្រូវគិតតែចំណូលពន្ឋតែមួយមុខទេ យើងត្រូវគិតពីផលប៉ះពាល់អវិជ្ជមានផ្សេងៗទៀត ដែលកើតឡើង និងកំពុងបន្តទៅអនាគត។ ដើម្បីកុំឲ្យយើងដោះដូរ នូវចំណុចដែលជាគុណសម្បិត្តនៃខេត្ត ដែលជាខេត្តទាក់ទាញទេសចរ ជាខេត្តដ៏ប្រណិតរបស់ខ្មែរ ជាមួយប្រាក់ពន្ឋដែលជាចំណូលរដ្ឋ។ តាមរយៈប្រាក់ពន្ឋហ្នឹង វាអាចធ្វើខូចមុខមាត់ខេត្ត ឬធ្វើឲ្យបាត់បង់ភាពទាក់ទាញ សម្រាប់ទេសចរក្នុងស្រុក និងទេសចរមកពីបស្ចិមលោក»។
យោងតាមរបាយការណ៍របស់មន្ទីរទេសចរណ៍ខេត្តព្រះសីហនុ ស្តីពីស្ថិតិភ្ញៀវទេសចរដែលមកលេងកម្សាន្តខេត្តព្រះសីហនុក្នុងពិធីបុណ្យអុំទូក ពីថ្ងៃទី២១-២៣វិច្ឆិកា ឆ្នាំ២០១៨ មានភ្ញៀវទេសចរសរុប៦៣ពាន់នាក់ ដែលថយចុះជិត២៦ភាគរយ។ ក្នុងនោះ ភ្ញៀវជាតិមាន ៥០,២៣០នាក់។ ចំនួននេះថយចុះជាង៣២ភាគរយ និងភ្ញៀវអន្តរជាតិមាន ១២,៧៧០នាក់ កើនឡើងជាង១៥ភាគរយ។
សូមបញ្ជាក់ថា ក្នុងរយៈពេលជាង២ឆ្នាំចុងក្រោយនេះ មានកាស៊ីណូជិត៥៨កន្លែង ដែលកំពុងប្រតិបត្តិការក្នុងទឹកដីខេត្តព្រះសីហនុ។ កាស៊ីណូទាំងនោះ ស្ទើរទាំងស្រុងកាន់កាប់ដោយជនជាតិចិន៕
Tag:
សង្គម
កាស៊ីណូ
អាណានិគម
អសន្តិសុខ
ព្រះសីហនុ
© រក្សាសិទ្ធិដោយ thmeythmey.com