ជាតិ
អាជ្ញាធរអប្សរារៀបចំពិព័រណ៌១៥ថ្ងៃ អបអរខួប២៥ឆ្នាំថ្ងៃបង្កើតអាយស៊ីស៊ី-អង្គរ
×![]()
សៀមរាប៖ ដើម្បីអបអរសាទរខួប ២៥ឆ្នាំ នៃការបង្កើតគណៈកម្មាធិការអន្ដរជាតិសម្របសម្រួលការគាំពារ និងអភិវឌ្ឍន៍តំបន់ប្រវត្តិសាស្ដ្រ ហៅកាត់ថា អាយស៊ីស៊ី-អង្គរ អាជ្ញាធរជាតិអប្សរា នឹងរៀបចំតាំងពិព័រណ៌ចំនួន ១៥ថ្ងៃនៅខាងមុខសួនច្បារ មហាសណ្ឋាគារអង្គរ ឬហ្គ្រង់អូតែល។ ពិព័រណ៌នេះចាប់ផ្តើមពីថ្ងៃទី ២៨ វិច្ឆិកា ដល់ថ្ងៃទី១២ ធ្នូ។
ក្នុងសេចក្តីប្រកាសព័ត៌មានរបស់អាជ្ញាធរជាតិអប្សរា ដែលចេញផ្សាយនៅថ្ងៃទី២៨ វិច្ឆិកា គោលបំណងនៃការតាំងពិព័រណ៌នេះ គឺដើម្បីអបអរសាទរខួប ២៥ឆ្នាំថ្ងៃបង្កើតគណៈកម្មាធិការអន្ដរជាតិ អាយស៊ីស៊ី-អង្គរ និងចូលរួមផ្សព្វផ្សាយពីសកម្មភាព ក៏ដូចជាសមិទ្ធផលសំខាន់ៗរបស់គណៈកម្មាធិការមួយនេះ លើគម្រោងអភិរក្ស និងអភិវឌ្ឍន៍រមណីយដ្ឋានអង្គរនាពេលកន្លងមក។
គណៈកម្មាធិការអាយស៊ីស៊ី-អង្គរ ត្រូវបានបង្កើតឡើងនៅខែធ្នូ ឆ្នាំ ១៩៩៣ នាទីក្រុងតូក្យូ ប្រទេសជប៉ុន ដែលមានសហប្រធាន គឺជប៉ុន និងបារាំង ឯអង្គការយូណេស្កូដើរតួជាលេខាធិការដ្ឋាន។
គួរបញ្ជាក់ថា អាជ្ញាធរជាតិអប្សរា នឹងរៀបចំកិច្ចប្រជុំបច្ចេកទេសលើកទី៣១ និងកិច្ចប្រជុំពេញអង្គលើកទី២៥ និងការប្រារព្ធខួប ២៥ឆ្នាំ នៃការបង្កើតគណៈកម្មាធិការ អាយស៊ីស៊ី-អង្គរ នៅថ្ងៃទី ៤-៥ ខែធ្នូ ឆ្នាំ ២០១៨ នៅសណ្ឋាគារ សុខាសៀមរាប។ កម្មវិធីបើកនៃកិច្ចប្រជុំនេះ ធ្វើឡើងក្រោមវត្តមានរបស់ប្រមុខរាជរដ្ឋាភិបាលកម្ពុជា សម្ដេច ហ៊ុន សែន ឯកម្មវិធីបិទក្រោមព្រះរាជាធិបតីភាព ព្រះករុណា ព្រះបាទ សម្ដេច ព្រះ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា៕
© រក្សាសិទ្ធិដោយ thmeythmey.com
