អន្តរជាតិ
ជប៉ុនពិចារណាកែនាវា Izumo ជានាវាដឹកយន្តហោះចម្បាំង និងទិញយន្តហោះបំបាំងកាយ F-35 ១០០គ្រឿង
×![]()
រដ្ឋាភិបាលជប៉ុនទំនងជានឹងចាប់ផ្តើមកែកុននាវាដឹកឧទ្ធម្ភាគចក្រទៅជានាវាដឹកនាយន្តហោះចម្បាំងនៅពេលឆាប់ៗខាង ក្នុងគោលដៅពង្រឹងសមត្ថភាពការពារជាតិទប់ទល់នឹងការគំរាមកំហែងសន្តិសុខតំបន់។ ក្រុងតូក្យូក៏កំពុងពិចារណានាំចូលយន្តហោះចម្បាំងបំបាំងកាយ F-35 ប្រហែល ១០០គ្រឿងពីអាមេរិកផងដែរ។ យ៉ាងណាមិញ មហិច្ឆតានេះជាសញ្ញាមួយនៃការដើរចេញឆ្ងាយពីរដ្ឋធម្មនុញ្ញសន្តិភាពបង្កើតក្រោយចប់សង្គ្រាមលោកលើកទីពីរហើយ។
ប្រភពខាងរដ្ឋាភិបាលបានបង្ហើបឲ្យដឹងនៅសប្តាហ៍នេះថា រដ្ឋាភិបាលជប៉ុនក្រោមការដឹកនាំរបស់លោក ស៊ីនហ្សូ អាបេ កំពុងពិចារណាកែច្នៃនាវាដឹកឧទ្ធម្ភាគចក្របច្ចុប្បន្នដែលខ្លួនកំពុងប្រើប្រាស់ទៅជាប្រភេនាវាដឹកយន្តហោះចម្បាំងវិញ ដើម្បីពង្រឹងសមត្ថភាពការពារជាតិរបស់ខ្លួន។
យោងតាមសារព័ត៌មានជប៉ុន Japan Times ការកែកុននេះអាចធ្វើឡើងចំពោះនាវាដឹកឧទ្ធម្ភាគចក្ររបស់ជប៉ុនឈ្មោះ Izumo ដែលមានទម្ងន់ ១៩៥០០តោន និងមានរយៈចម្ងាយ ២៤៨ម៉ែត្រនោះ។ បច្ចុប្បន្ននាវានេះអាចដឹកឧទ្ធម្ភាគចក្របានប្រហែល ១៤គ្រឿង ហើយក្រោយពេលកែកុនហើយវាអាចដាក់យន្តហោះចម្បាំងបាន។ ជប៉ុនទំនងជានឹងប្រើនាវានេះដឹកយន្តហោះចម្បាំងបំបាំងកាយស៊េរីថ្មី F-35 ផង។
ជុំវិញព័ត៌មានស្តីពីការកែថ្នៃនាវានេះ រដ្ឋមន្ត្រីការពារជាតិជប៉ុន Takeshi Iwaya មិនបានបដិសេធអ្វីឡើយ ហើយលោកថែមទាំងបង្ហាញសុទិដ្ឋិនិយមថែមទៀតចំពោះការបង្កើនសមត្ថភាពនាវាដឹកឧទ្ធម្ភាគចក្រទៅជានាវាដឹកយន្តហោះចម្បាំងដែលមានប្រយោជន៍ច្រើនសម្រាប់សកម្មភាពយោធានេះ។
«វាជារឿងដែលយើងចង់បាននៅពេលដែលនាវានោះអាចប្រើប្រាស់បានច្រើនយ៉ាងតាមដែលអាចធ្វើបាន»។ ប្រមុខការពារជាតិជប៉ុនថ្លែងបែបនេះក្នុងសន្និសីទសារព័ត៌មានថ្ងៃអង្គារទី ២៧ ខែវិច្ឆិកានេះ។
តាមពិតទៅយន្តហោះ Izumo ត្រូវបានប្រើប្រាស់ដោយកងទ័ពស្វ័យការពារជប៉ុន (SDF) ហើយការឈានទៅកែកុននាវានេះទៅជាប្រភេទនាវាដឹកយន្តហោះចម្បាំងនោះបង្ហាញឲ្យឃើញថា ជប៉ុនកំពុងប្រឹងប្រែងពង្រឹងសមត្ថភាពការពារជាតិរបស់ខ្លួនដើម្បីឆ្លើយតបនឹងឥទ្ធិពលមហាយក្សចិន។ ប៉ុន្តែវាជាកាយវិការមួយដែលបង្ហាញឲ្យឃើញថា ជប៉ុនកំពុងដើរចេញកាន់តែឆ្ងាយពីរដ្ឋធម្មនុញ្ញសន្តិភាពរបស់ខ្លួនដែរ។
ក្រោមមាត្រា ៩នៃ រដ្ឋធម្មនុញ្ញសន្តិភាពបន្សល់ទុកក្រោយសង្គ្រាមលោកលើកទីពីរ ជប៉ុនមិនអាចប្រើប្រាស់ប្រភេទនាវាដឹកយន្តហោះចម្បាំងបានឡើយ ហើយវាអាចត្រឹមមានកងទ័ពស្វ័យការពារដើម្បីឆ្លើយតបនឹងការវាយប្រហារឬឈ្លានពានប៉ុណ្ណោះ។
ប៉ុន្តែគណបក្សកាន់អំណាចប្រជាធិបតេយ្យសេរី (LDP) របស់លោក អាបេ ចង់វិសោធនកម្មរដ្ឋធម្មនុញ្ញនេះដើម្បីត្រួសត្រាយផ្លូវដល់ជប៉ុនក្នុងការពង្រឹងសមត្ថភាពការពារជាតិបន្ថែមទៀតក្នុងនាមជាមហាអំណាចតំបន់ និងឆ្លើយតបបញ្ហាសន្តិសុខ។ គណបក្សនេះក៏បានស្នើសុំឲ្យមានការកែកុននាវា Izumo ទៅជានាវាដឹកយន្តហោះចម្បាំងដែរក្នុងរបាយការណ៍របស់ខ្លួនចេញផ្សាយតាំងពីខែឧសភា។
យ៉ាងណាមិញ គេមិនទាន់ដឹងទេឡើយថា ប្រភេទយន្តហោះណាមួយដែលនឹងត្រូវប្រើប្រាស់លើនាវា Izumo បើសិនជានាវានេះត្រូវគេកែកុនមែននោះ។ រដ្ឋមន្ត្រីការពារជាតិជប៉ុនបានបញ្ជាក់ថា ជុំវិញប្រភេទយន្តហោះដែលត្រូវប្រើប្រាស់នោះ ខាងក្រសួងនឹងចាប់ផ្តើមសិក្សាលម្អិតសិន។ ប៉ុន្តែ ជារួមវាមានតែយន្តហោះ F-35 ប៉ុណ្ណោះដែលសក្តិសមដ្បិតវាមានសមត្ថភាពហោះឡើងលើផ្លូវរត់ខ្លី និងអាចហោះឡើយបញ្ឈរបានទៀត។
ដោយឡែក នៅថ្ងៃអង្គារទី ២៧ វិច្ឆិកានេះដែរ កាសែតសេដ្ឋកិច្ច Nikkei បានផ្សាយដោយដកស្រង់ ប្រភពមិនមានអត្តសញ្ញាណមួយថា រដ្ឋាភិបាលជប៉ុនក៏កំពុងពិចារណានាំចូលយន្តហោះ F-35 ចំនួន ១០០គ្រឿងពីអាមេរិកដើម្បីជំនួសយន្តហោះចាស់ៗប្រភេទ F-15 របស់ខ្លួនដែរ។ យន្តហោះ F-35 មួយគ្រឿងជិត ៩០លានដុល្លារ ដូច្នេះជប៉ុនត្រូវចំណាយលុយជិត ៩ពាន់លានដុល្លារឯណោះដើម្បីទិញយន្តហោះទាំងនេះ។ បច្ចុប្បន្ននេះ កងទ័ពជប៉ុនត្រៀមទទួលយន្តហោះចម្បាំងប្រភេទ F-35A ចំនួន ៤២គ្រឿងនៅត្រឹម ២០២៤ នេះ៕
Tag:
ជប៉ុន
Izumo
F-35
ចិន
© រក្សាសិទ្ធិដោយ thmeythmey.com
