ជាតិ
អំបិលនឹងឡើងថ្លៃ បន្ទាប់ពីកម្ពុជាបាននាំចូលអំបិល៥០០០តោនដំបូង ការប្រមូលផលអំបិល ក្នុងឆ្នាំ២០១៤ (រូបភាព បានពីប៊ុន បារាំងប្រធានសហគមន៍អ្នកផលិតអំបិលខេត្តកំពត-កែប )
× ភ្នំពេញ៖ អំបិលចំនួន៥០០០តោន ដែលទិញពីប្រទេសចិនក្នុងដំណាក់កាលដំបូង បាននាំមកដល់កម្ពុជាហើយ តាមកំពង់ផែភ្នំពេញ កាលពីថ្ងៃទី២៧វិច្ឆិកា ឆ្នាំ២០១៨។ ការនាំចូលអំបិល៥០០០តោននេះ នឹងធ្វើឲ្យតម្លៃអំបិលកម្ពុជាកើនឡើង។
លោក ប៊ុន បារាំង ប្រធានសហគមន៍អ្នកផលិតអំបិលខេត្តកំពត-កែប បញ្ជាក់ប្រាប់សារព័ត៌មានថ្មីៗថា អំបិលដែលនាំចូលនេះ មានតម្លៃ៩០ដុល្លារ ក្នុងមួយតោន និងជាតម្លៃមិនទាន់គិតថ្លៃដើមឡើយ។ ដូច្នេះអំបិលដែលនាំចូលសម្រាប់បំពេញតម្រូវការទីផ្សារ នឹងកើនថ្លៃជាងឆ្នាំមុនៗ។
លោក ប៊ុន បារាំង បាននិយាយដូច្នេះ«កាលយើងនាំទំនិញចូល គឺវាថ្លៃជាងការផលិតក្នុងស្រុកហើយ ដោយគិតទៅលើថ្លៃដឹកជញ្ជូន ថ្លៃកម្មករ និងថ្លៃសេវាផ្សេងៗ។ ពេលគិតបញ្ចូលថ្លៃទាំងនេះអស់ហើយ អំបិលនេះអាចមានតម្លៃជាង១០០ដុល្លារក្នុងមួយតោន»។
ស្រែអំបិលនាពេលកំពុងប្រមូលផល ក្នុងឆ្នាំ២០១៦ (រូបភាព បានពីលោក ប៊ុន បារាំង
បើតាមលោក បារាំង អំបិល៥០០០តោន ដែលនាំមកដល់ក្នុងដំណាក់កាលដំបូងនេះ នឹងចែកចាយទៅទូទាំងប្រទេស ហើយនឹងធ្វើនីតិវិធីនាំចូលបន្តបន្ទាប់ទៀត រហូតគ្រប់ចំនួន៣ម៉ឺនតោន។ លោក ប៊ុន បារាំង បានបញ្ជាក់ថា៖«នៅពេលដែលយើងនាំចូលអំបិល២ម៉ឺនតោនពីចិនអស់ហើយ ទើបយើងនាំចូលអំបិល ១ម៉ឺនតោនទៀតពីថៃ»។
សូមបញ្ជាក់ថា អំបិលចំនួន៣ម៉ឺនតោននេះ គឺជាការនាំចូលជាលើកទី២របស់កម្ពុជា ដោយកាលពីលើកទី១ គឺនៅឆ្នាំ២០០៨ កម្ពុជាបាននាំចូលអំបិលចំនួន ៦ម៉ឺនតោន ពីប្រទេសចិន។
ការនាំចូលអំបិលទាំងពីរលើកនេះ ដោយសារតែកម្ពុជាជួបបញ្ហាអាកាសធាតុមិនល្អ និងមានភ្លៀងធ្លាក់ច្រើនពេក ក្នុងអំឡុងពេលផលិត និងប្រមូលផល។ បច្ចុប្បន្នស្រែអំបិលនៅកំពត-កែប មានផ្ទៃដីជាង៤៦០០ហិកតា។
សូមជម្រាបថា ក្នុងមួយឆ្នាំៗ កម្ពុជាមានតម្រូវការអំបិលប្រើប្រាស់ ប្រមាណ១០ម៉ឺនតោន៕
Tag:
អំបិល
ប៊ុន បារាំង
កំពត
កែប
© រក្សាសិទ្ធិដោយ thmeythmey.com