លោក ស៊ី ជិនភីង ប្រឹងចែចូវរដ្ឋក្រីក្រនៅអឺរ៉ុប ខណៈអឺរ៉ុបត្រៀមរឹតបណ្តឹងការវិនិយោគពីចិន

អន្តរជាតិ

លោក ស៊ី ជិនភីង ប្រឹងចែចូវរដ្ឋក្រីក្រនៅអឺរ៉ុប ខណៈអឺរ៉ុបត្រៀមរឹតបណ្តឹងការវិនិយោគពីចិន

28, Nov 2018 , 9:19 pm

រូបភាព

ដោយ: សៅ ផលនិស្ស័យ (Sao Phal Niseiy)

ចិនកំពុងព្យាយាមពង្រឹងទំនាក់ទំនងជាមួយបណ្តាប្រទេសអឺរ៉ុបជាពិសេសប្រទេសដែលមានសេដ្ឋកិច្ចទាប ស្របពេលដែលប្រទេសអ្នកមាននៅអឺរ៉ុបមួយចំនួនព្យាយាមរឹតបន្តឹងច្រកទ្វារសម្រេចការវិនិយោគរបស់ចិននៅក្នុងប្រទេសខ្លួន។ រដ្ឋក្រីក្រជាងគេនៅអឺរ៉ុបខាងលិចដូចជាព័រទុយហ្គាល់ និងអេស្ប៉ាញជាគោលដៅសំខាន់របស់ចិនពេលបច្ចុប្បន្ននេះ។

ប្រធានាធិបតី ស៊ី ជិនភីង បំពេញទស្សនកិច្ចរយៈពេលបីថ្ងៃមកកាន់ប្រទេសអេស្ប៉ាញ មុននឹងបន្តដំណើរទៅចូលរួមក្នុងកិច្ចប្រជុំប្រទេសសេដ្ឋកិច្ចជឿនលឿនទាំងម្ភៃ (G20) នៅអាហ្សង់ទីននៅថ្ងៃព្រហស្បតិ៍ទី ២៩ខែវិច្ឆិកានេះ។ ត្រឡប់មកពីអាមេរិកឡាទីនវិញ លោក ស៊ី នឹងមកទស្សនកិច្ចនៅព័រទុយហ្គាល់វិញម្តង។

ទស្សនកិច្ចរបស់ប្រធានាធិបតីចិននៅអេស្ប៉ាញធ្វើឡើងស្របពេលដែលចិនកំពុងផុងខ្លួនក្នុងសង្គ្រាមពាណិជ្ជកម្មជាមួយអាមេរិក ហើយមិនត្រឹមតែប៉ុណ្ណោះទេរដ្ឋអ្នកមាននៅអឺរ៉ុបដូចជាបារាំង និងអាល្លឺម៉ង់នោះកំពុងព្យាយាមរឹតបន្តឹងទុនវិនិយោគបរទេសជាពិសេសពីចិននោះ។

យោងតាមទីភ្នាក់ងារព័ត៌មាន AFP ក្នុងដំណើរទស្សនកិច្ចនៅអេស្ប៉ាញនេះរបស់លោក ស៊ី ជិនភីង គេរំពឹងថា កិច្ចព្រមព្រៀងប្រហែល ២០ ផ្តោតលើទំនាក់ទំនងរដ្ឋាភិបាល និងពាណិជ្ជកម្មផងនោះនឹងត្រូវចុះរួមគ្នារវាងចិននិងអេស្ប៉ាញ។

ប្រភពរដ្ឋាភិបាលអេស្ប៉ាញបានបង្ហើបផងដែរថា នាយករដ្ឋមន្ត្រីអេស្ប៉ាញ Pedro Sanchez និងប្រមុខរដ្ឋចិនក៏នឹងយកឱកាសនេះបង្កើនកម្រិតចំណងមិត្តភាពទ្វេភាគីទៅជាទំនាក់ទំនងភាពជាដៃគូយុទ្ធសាស្ត្រផងដែរ។

តាមពិតទៅ វត្តមានរបស់លោក ស៊ី នៅរដ្ឋអឺរ៉ុបនៅពេលនេះ ស្របពេលដែលបណ្តាប្រទេសអឺរ៉ុបត្រៀមខ្លួនអនុម័តយកក្របខណ្ឌវាយតម្លៃទុនវិនិយោគបរទេសដែលមានគោលដៅត្រួតពិនិត្យតឹងរ៉ឹងលើក្រុមហ៊ុនបរទេសជាពិសេសរបស់ចិនតែម្តងនៅក្នុងវិស័យយុទ្ធសាស្ត្រដូចជា វិស័យថាមពលជាដើម។ បណ្តារដ្ឋមេដឹកនាំអឺរ៉ុបដូចជាបារាំង និងអាល្លឺម៉ង់ចង់បានវិធានការបែបនេះនេះ។

ក្រុងប៉ារីស និង ប៊ែកឡាំងបារម្ភខ្លាំងពីក្រុមហ៊ុនវិនិយោគបរទេសដែលព្យាយាមលួចបច្ចេកវិទ្យាសំខាន់ៗរបស់អឺរ៉ុបតាមរយៈការទិញភាគហ៊ុនក្នុងក្រុមហ៊ុនអឺរ៉ុបជាដើម ហើយមេដឹកនាំអឺរ៉ុបទាំងនេះក៏អំពាវនាវឲ្យមានការដាក់ចេញបទបញ្ញត្តិសំខាន់ៗប្រចាំអឺរ៉ុបដើម្បីគ្រប់គ្រងបញ្ហានេះដែរ។ ប៉ុន្តែបញ្ហាត្រង់ថា រដ្ឋអឺរ៉ុបនីមួយៗនៅតែមានអំណាចក្នុងការកំណត់វិធានការដែលត្រូវប្រើប្រាស់ បើទោះជាមានវិធានការរួមកម្រិតការវិនិយោគបែបនេះក្តី។

ជុំវិញនឹងក្តីបារម្ភ ក៏ដូចជាការដាក់ចេញវិធានការរឹតត្បិតទុនវិនិយោគចិន អ្នកជំនាញមើលឃើញថា លោក ស៊ី ជិនភីង យកដំណើរទស្សនកិច្ចនៅអឺរ៉ុបលើកនេះដើម្បីពង្រឹងទំនាក់ទំនងជាមួយរដ្ឋអឺរ៉ុបក្រីក្រផង ពង្រឹងឥទ្ធិពលផង និងបង្ហាញជំហររបស់ខ្លួនក្នុងការគោរពគោលការរណ៍វិនិយោគនិងបន្ធូរបន្ថយក្តីបារម្ភរបស់រដ្ឋអឺរ៉ុបផងដែរ។

អេស្ប៉ាញស្ថិតក្នុងចំណោមប្រទេសមួយចំនួនប៉ុណ្ណោះដែលមានចំណងសេដ្ឋកិច្ចជិតស្និទ្ធជាមួយចិន។ បច្ចុប្បន្ននេះ ការនាំចូលរបស់អេស្ប៉ាញទៅកាន់ប្រទេសចិនកើនឡើងដល់ ៦,៤ពាន់លានដុល្លារពោលគឺកើនឡើង ២៨ភាគរយត្រឹមឆ្នាំ ២០១៧។ អេស្ប៉ាញក៏រំពឹងថែមទៀតដែរថា ក្រោយទស្សនកិច្ចរបស់លោក ស៊ី ខ្លួននឹងមានលទ្ធភាពកាន់តែច្រើនក្នុងការនាំទំនិញចូលទីផ្សារចិនផង។

នៅព័រទុយហ្គាល់ឯណោះវិញ លោក ស៊ី នឹងចំណាយពេលទស្សនកិច្ចនៅទីនោះក្នុងរយៈពេលពីរថ្ងៃបន្ទាប់ពីចាកចេញពីប៉ាណាម៉ាដើមខែធ្នូខាងមុខ។ នៅទីនោះ ប្រមុខរដ្ឋចិនក៏មានគោលបំណងពង្រឹងចំណងមិត្តភាពជាមួយព័រទុយហ្គាល់ដែរក្នុងស្ថានភាពចាំបាច់បច្ចុប្បន្ន។

ព័រទុយហ្គាល់ជាប្រទេសអឺរ៉ុបខាងលិចក្រីក្រជាងគេមួយ ហើយប្រទេសនេះបើកទ្វារទទួលយកលំហូរវិនិយោគរបស់ចិនបន្ទាប់ពីវិបត្តិសេដ្ឋកិច្ចសាកលឆ្នាំ ២០០៨។ ទំហំវិនិយោគរបស់ចិនកើនឡើងស្មើបីភាគរយនៃទំហំផលិតផលក្នុងស្រុកសរុបរបស់ព័រទុយហ្គាល់ (GDP) ចន្លោះពីឆ្នាំ ២០១០ ដល់ឆ្នាំ ២០១៦។ ចំណែករដ្ឋាភិបាលចិនមានភាគហ៊ុនលើស ២០ភាគរយនៅក្នុងក្រុមហ៊ុនថាមពលធំបំផុត EDP របស់ព័រទុយហ្គាល់ថែមទៀតផងក្នុងពេលបច្ចុប្បន្ន។

ត្រឡប់មកអេស្ប៉ាញវិញ ថ្វីបើទំនាក់ទំនងសេដ្ឋកិច្ចនិងពាណិជ្ជកម្មស្អិតល្មួតដូច្នេះក្តី អេស្ប៉ាញអះអាងថាខ្លួនមិនចុះកិច្ចព្រមព្រៀងជាផ្លូវការណាមួយដើម្បីចូលរួមក្នុងគម្រោងហេដ្ឋារចនាសម្ព័ន្ធចិន «ខ្សែក្រវាត់មួយវិថីមួយ»ដែលមានគោលដៅបង្កើតការផ្សាភ្ជាប់ពីអាស៊ីដល់អឺរ៉ុប ដល់អាហ្វ្រិក និងអាមេរិកឡាទីននោះឡើយ។

ប្រទេសហ៊ុមព័ទ្ធដោយវិបត្តិសេដ្ឋកិច្ច ក្រិក និងប៉ូឡូញ ស្ថិតក្នុងក្នុងចំណោមរដ្ឋអឺរ៉ុបដ៏តិចតួចប៉ុណ្ណោះដែលចូលរួមក្នុងគំនិតផ្តួចផ្តើមចិនកន្លងមក។ ប៉ុន្តែរដ្ឋអឺរ៉ុបមួយចំនួនបានព្រមានពីការធ្លាក់ក្រោមឥទ្ធិពលនយោបាយរបស់ចិន និងប្រឈមការអន្តរាយសេដ្ឋកិច្ច និងការជាប់វ័ណ្ឌកនឹងបំណុលរបស់ចិនជាដើម៕