អន្តរជាតិ
ប្រមុខការទូតកូរ៉េខាងជើងទៅរៀនសូត្រពីគំរូកំណែទម្រង់សេដ្ឋកិច្ចពីវៀតណាម រដ្ឋមន្ត្រីការបរទេសកូរ៉េខាងជើង និងសមភាគីវៀតណាម
× រដ្ឋមន្ត្រីការបរទេសកូរ៉េខាងជើង លោក Ri Yong-ho ទៅទស្សនកិច្ចរយៈ៤ ថ្ងៃនៅវៀតណាមចាប់ពីថ្ងៃព្រហស្បតិ៍ទី ២៩ ខែវិច្ឆិកានេះ ដើម្បីទៅសិក្សារៀនសូត្រ និងដកស្រង់បទពិសោធន៍ពីការពីការកែទម្រង់សេដ្ឋកិច្ចរបស់វៀតណាម។
ទស្សនកិច្ចរបស់ប្រមុខការទូតកូរ៉េខាងជើងនៅវៀតណាមគឺ ធ្វើឡើងតបតាមការអញ្ជើញរបស់ឧបនាយករដ្ឋមន្ត្រី និងជារដ្ឋមន្ត្រីវៀតណាមលោក Pham Binh Minh។ បើតាមសារព័ត៌មាន Vietnam Express នាអំឡុងទស្សនកិច្ចនៅវៀតណាមនេះ លោក Ri នឹងធ្វើដំណើរទៅកាន់រដ្ឋធានីហាណូយ ដើម្បីទៅពិនិត្យតំបន់ឧស្សាហកម្ម និងជួបជាមួយអ្នកជំនាញសេដ្ឋកិច្ចផងដែរ។
បន្ទាប់ពីដាក់ប្រទេសឲ្យនៅឯកោ និងត្រូវរងទណ្ឌកម្មយ៉ាងធ្ងន់ធ្ងរពីសំណាក់សហគមន៍អន្តរជាតិអស់រយៈពេលជាច្រើនឆ្នាំដោយសារការអភិវឌ្ឍកម្មវិធីមីស៊ីលបាលីស្ទិក និងនុយក្លេអ៊ែររបស់ខ្លួន ក្រុងព្យុងយ៉ាងនៅក្នុងឆ្នាំនេះ ចាប់ផ្តើមព្យាយាមកសាងចំណងទំនាក់ទំនងជាមួយសហគមន៍អន្តរជាតិ និងបង្ហាញជំហរទន់ភ្លន់ជាងមុនផង។
តួយ៉ាង មេដឹកនាំកូរ៉េខាងជើង លោក គីម ជុងអ៊ុន ធ្លាប់បានបង្ហាញក្តីសង្ឃឹមថា លោកចង់ធ្វើកំណែទម្រង់សេដ្ឋកិច្ច ហើយលោកកំពុងសម្លឹងមើលគំរូអភិវឌ្ឍន៍ ដែលស័ក្តិសមទៅនឹងស្ថានភាពកូរ៉េខាងជើងជាងគេផងដែរ។
ក្នុងកិច្ចប្រជុំកំពូលចំនួនបីលើកជាមួយប្រធានាធិបតីកូរ៉េខាងត្បូង មូន ចេអ៊ីន ក្នុងឆ្នាំនេះ លោក គីម ជុងអ៊ុន បានលើកឡើងម្តងជាពីរដង ពីភាពជោគជ័យនៃកំណែទម្រង់សេដ្ឋកិច្ចរបស់រដ្ឋសង្គមនិយម វៀតណាម។ យោងតាមទីភ្នាក់ងារព័ត៌មានកូរ៉េ Yonhaps រដ្ឋមន្ត្រីការបរទេសកូរ៉េខាងជើង លោក Ri Yong-ho ដែលត្រៀមធ្វើទស្សនកិច្ចទៅកាន់វៀតណាមនាថ្ងៃព្រហស្បត្តិ៍នេះ ធ្លាប់បានប្រាប់ទៅកាន់រដ្ឋាភិបាលវៀតណាមថា កូរ៉េខាងជើងសង្ឃឹមថា ខ្លួននឹងសិក្សារៀនសូត្រពីគំរូអភិវឌ្ឍន៍សេដ្ឋកិច្ចរបស់វៀតណាម។
ទន្ទឹមនឹងនេះដែរ អតីតមន្ត្រីទូតវៀតណាមប្រចាំកូរ៉េខាងជើង Duong Chinh Thuc បានគូសបញ្ជាក់ថា ភាពស្រដៀងគ្នានៃស្ថានភាពនយោបាយ និងប្រវត្តិសាស្ត្ររវាងប្រទេសទាំងពីរ នឹងធ្វើឲ្យវៀតណាមក្លាយជាគំរូដ៏ល្អបំផុតមួយសម្រាប់ការកែទម្រង់សេដ្ឋកិច្ចកូរ៉េខាងជើងដែរ។ នេះបើតាមសារព័ត៌មាន Vietnam Express ។
អ្វីដែលគួរឲ្យកត់សម្គាល់នោះគឺ អំឡុងទស្សនកិច្ចរបស់រដ្ឋមន្ត្រីការបរទេសអាមេរិក លោក ម៉ៃ ប៉ុមប៉េអូ ទៅកាន់ទីក្រុង ហាណូយ កាលពីខែកក្កដាកន្លងទៅ ប្រមុខការទូតអាមេរិករូបនេះ ក៏បានលើកឡើងពី ទំនាក់ទំនងល្អដែលវៀតណាមមានជាមួយអាមេរិកនិងការលូតលាស់នៃសេដ្ឋកិច្ចរបស់រដ្ឋអាស៊ីអាគ្នេយ៍នេះ ជាគំរូដល់កូរ៉េខាងជើងផងដែរ។ ត្រង់ចំណុចនេះ ប្រមុខការបរទេសអាមេរិកនិយាយថា ប្រសិនបើកូរ៉េខាងជើងព្រមបោះបង់កម្មវិធីអាវុធនុយក្លេអ៊ែរ ក្រុងព្យុងយ៉ាងអាចក្លាយជាប្រទេសអ្នកមាន ដូចជាប្រទេសវៀតណាម៕
Tag:
កូរ៉េខាងជើង
វៀតណាម
កំណែទម្រង់សេដ្ឋកិច្ច
© រក្សាសិទ្ធិដោយ thmeythmey.com