ធនាគារពិភពលោក៖ កម្ពុជានឹងមានកំណើន ៧,១ភាគរយនៅឆ្នាំ២០១៨នេះ

ជាតិ

សេដ្ឋកិច្ច

ធនាគារពិភពលោក៖ កម្ពុជានឹងមានកំណើន ៧,១ភាគរយនៅឆ្នាំ២០១៨នេះ

29, Nov 2018 , 8:59 am

រូបភាព

ដោយ:

ភ្នំពេញ៖ សេដ្ឋកិច្ចកម្ពុជា ត្រូវបានព្យាករជាមួយនឹងកំណើន ៧,១ភាគរយសម្រាប់ឆ្នាំ២០១៨ ដែលកើនបន្តិចបើធៀបនឹងកំណើន៧ភាគរយនៅឆ្នាំមុន។ កំណើនដ៏រឹងមាំនេះ ត្រូវបានជំរុញដោយសន្ទុះនៃការចាយវាយក្នុងស្រុក និងការនាំចេញ។ នេះបើតាមរបាយការណ៍បច្ចុប្បន្នភាពរបស់ធនាគារពិភពលោក (World Bank) ដែលចេញផ្សាយនៅថ្ងៃទី២៨ខែវិច្ឆិកា។

តម្រូវការប្រើប្រាស់ក្នុងស្រុក ដែលជួយជំរុញកំណើនសេដ្ឋកិច្ចនេះ ត្រូវបានគាំទ្រដោយការដំឡើងប្រាក់ឈ្នួល និងពង្រីកការចាយវាយរបស់រដ្ឋាភិបាល។ ព្រមជាមួយគ្នានេះ ការនាំចេញសម្លៀកបំពាក់ និងស្បែកជើង កំពុងបន្តជាមួយតម្រូវការខ្ពស់ ក្នុងអត្រាកំណើននាំចេញ ១៦,១ភាគរយអំឡុងពេល៦ខែដើមឆ្នាំ២០១៨។ ជាមួយគ្នានេះ ទេសចរអន្តរជាតិបានមកកម្ពុជាចំនួន ៣លាននាក់ ក្នុងកំណើន ១៣,៦ភាគរយ ដែលជំរុញមួយផ្នែកធំពីភ្ញៀវចិន។

ការវិនិយោគផ្ទាល់ពីបរទេស (FDI) ត្រូវបានប៉ាន់ស្មានជាមួយកំណើន ១៤,៣ភាគរយ ក្នុងឆមាសទី១ឆ្នាំនេះ។ ហើយប្រមាណ ៩០ភាគរយនៃមូលធនទាំងនោះ ដោយមិនគិតក្នុងវិស័យធនាគារ គឺមានប្រភពពីប្រទេសចិន និងមានគោលដៅវិនិយោគក្នុងវិស័យសំណង់ និងអចលនទ្រព្យ ការកែច្នៃផលិតផលកសិកម្ម និងវាយនភណ្ឌ។

ប៉ុន្តែសេដ្ឋកិច្ចកម្ពុជាប្រឈមនឹងហានិភ័យទាំងក្នុងស្រុក និងអន្តរជាតិ។ អ្នកជំនាញ World Bank នៅតែបារម្ភអំពីលំហូរឥណទានដែលប្រមូលផ្ដុំក្នុងវិស័យសំណង់ និងអចលនទ្រព្យច្រើនពេក ដែលអាចគំរាមវិស័យហិរញ្ញវត្ថុ។ រីឯហានិភ័យពីក្រៅ គឺការពិចារណាដកប្រព័ន្ធអនុគ្រោះពន្ធ EBA របស់សហភាពអឺរ៉ុបពីកម្ពុជា និងការកើនតម្លៃប្រាក់ដុល្លារអាមេរិក។ បើសិនកម្ពុជាបាត់បង់ EBA នោះនឹងប៉ះពាល់ដល់ការនាំចេញទៅសហភាពអឺរ៉ុប ដែលជាទីផ្សារធំរបស់កម្ពុជា ហើយនឹងធ្វើឲ្យកម្មកររងគ្រោះក្នុងរយៈពេលខ្លី។ សង្គ្រាមពាណិជ្ជកម្មចិន និងអាមេរិក ក៏អាចនឹងជះឥទ្ធិពលដល់កម្ពុជាផងដែរ៕