ចំបាប់នឹងស្នើហ្វីលីពីនឲ្យដាក់វិញ្ញាសាដែលខ្លួនធ្លាប់ឈ្នះមេដាយមាស ក្នុងស៊ីហ្គេមឆ្នាំក្រោយ

កីឡាជាតិ

ជាតិ

ចំបាប់នឹងស្នើហ្វីលីពីនឲ្យដាក់វិញ្ញាសាដែលខ្លួនធ្លាប់ឈ្នះមេដាយមាស ក្នុងស៊ីហ្គេមឆ្នាំក្រោយ

30, Nov 2018 , 7:59 am

រូបភាព

លោក Casey Barnett ផ្តល់បទសម្ភាសដល់អ្នកសារព័ត៌មានក្រោយការប្រកួតជើងឯកថ្នាក់ជាតិនៅពហុកីឡដ្ឋានជាតិ

ដោយ:

ក្រោយម្ចាស់ផ្ទះហ្វីលីពីនសម្រេចដាក់កីឡាចំបាប់ឲ្យចូលរួមប្រកួតប្រជែងក្នុងការប្រកួតកីឡាស៊ីហ្គេមឆ្នាំ២០១៩ កម្ពុជាគ្រោងស្នើសុំម្ចាស់ផ្ទះដាក់វិញ្ញាសាសក្តានុពល ដែលខ្លួនធ្លាប់ឈ្នះមេដាយមាសក្នុងស៊ីហ្គេមនាពេលកន្លងមក។ ការគ្រោងធ្វើសំណើរនេះ បន្ទាប់ពីកម្ពុជាមានក្តីបារម្ភខ្លាចម្ចាស់ផ្ទះមិនឯកភាពដាក់វិញ្ញាសាសក្តានុពលមួយនេះ។ តែយ៉ាងណាកម្ពុជានឹងផ្តល់អាទិភាពខ្ពស់ដល់យុវជន សម្រាប់ការចូលរួមលើកនេះ។

លោក Casey Barnett អនុប្រធានសហព័ន្ធកីឡាចំបាប់កម្ពុជាបាននិយាយថា លោកនឹងព្យាយាមតវ៉ាជាមួយម្ចាស់ផ្ទះហ្វីលីពីន ដើម្បីស្នើសុំដាក់វិញ្ញាសាសក្តានុពលមួយចំនួនក្នុងការប្រកួតកីឡាស៊ីហ្គេមលើកទី៣០នៅទីក្រុងម៉ានីលប្រទេសហ្វីលីពីន។ អ្វីដែលសំខាន់ គឺវិញ្ញាសារបស់កីឡាករ ឌន សៅ ម្ចាស់មេដាយមាសកីឡាស៊ីហ្គេមឆ្នាំ២០១៣។

ក្នុងបទសម្ភាសជាមួយអ្នកសារព័ន្ធក្រោយការប្រកួតជើងឯកថ្នាក់ជាតិកាលពីថ្ងៃទី២៨ វិច្ឆិកា អនុប្រធានរូបនេះបានរៀបរាប់ដូច្នេះថា៖«យើងនឹងតវ៉ាជាមួយហ្វីលីពីនដើម្បីបន្ថែមវិញ្ញាសាទម្ងន់ធ្ងន់ ដោយសារយើងមានកីឡាករសក្តានុពលមួយរូបគឺកីឡាករ ឌន សៅ ជាម្ចាស់មេដាយមាសស៊ីហ្គេមឆ្នាំ២០១៣។ យើងនឹងព្យាយាមតវ៉ាឲ្យគាត់បានចូលរួមប្រកួត ដើម្បីដណ្តើមមេដាយដែរ»។

ការលើកឡើងបែបនេះ បន្ទាប់ពីលោកព្រួយបារម្ភខ្លាចម្ចាស់ផ្ទះហ្វីលីពីន ដែលមិនសូវមានសក្តានុពលលើប្រភេទកីឡានេះ មិនឯកភាពដាក់វិញ្ញាសាសក្តានុពលរបស់កម្ពុជា។ លោករំពឹងថា ម្ចាស់ផ្ទះហ្វីលីពីននឹងដាក់វិញ្ញាសានេះឲ្យចូលរួមប្រកួតប្រជែង។ ជាមួយគ្នានេះ លោកសង្ឃឹមថា កម្ពុជានឹងទទួលបានលទ្ធផលល្អនៅលើកនេះ បន្ទាប់ពីខកខានចូលរួមពីរលើកកន្លងមក។

ទោះបីយ៉ាងនេះក្តី លោក Casey Barnett បានអះអាងថា សម្រាប់ការចូលរួមប្រកួតក្នុងព្រឹត្តិការណ៍កីឡាស៊ីហ្គេមលើកនេះ លោកនឹងផ្តល់អាទិភាពខ្ពស់ដល់យុវជនឲ្យបានបង្ហាញសមត្ថភាព ដើម្បីទទួលបានបទពិសោធប្រកួតលើឆាកអន្តរជាតិ សម្រាប់ត្រៀមការប្រកួតកីឡាស៊ីហ្គេមលើកទី៣២នៅកម្ពុជា។

«ទោះបីយើងចង់បានភាពជោគជ័យក្នុងការប្រកួតក៏ដោយ តែយើងនឹងផ្តល់អាទិភាពខ្ពស់ដល់យុវជននៅឆ្នាំក្រោយ ដើម្បីឲ្យពួកគាត់មានបទពិសោធប្រកួតលើឆាកអន្តរជាតិ សម្រាប់ត្រៀមស៊ីហ្គេមនៅឆ្នាំ២០២៣»។ លោក Casey Barnett លើកឡើងបែបនេះ ហើយបន្ថែមថា លោកនឹងខិតខំស្វែងរកវិធីសាស្ត្រក្នុងការអភិវឌ្ឍសមត្ថភាពកីឡាករឲ្យកាន់តែល្អប្រសើរ ដើម្បីត្រៀមប្រជែងដណ្តើមមេដាយពីព្រឹត្តិការណ៍នេះ។

ក្រោយឆ្លងកាត់ការប្រកួតយ៉ាងស្វិតស្វាញរយៈពេល៥ថ្ងៃនៅទីលានអគារដំបូលទូកក្នុងពហុកីឡដ្ឋានជាតិ ក្រុមអត្តពលិកក្រសួងសេដ្ឋកិច្ចនិងហិរញ្ញវត្ថុបានគ្រងជើងឯកការប្រកួតជើងឯកថ្នាក់ជាតិឆ្នាំនេះ បន្ទាប់ពីពួកគេដណ្តើមបានមេដាយមាស៦ ប្រាក់៦ និងសំរឹទ្ធ២។ អត្តពលិកក្រសួងការពារជាតិឈរលំដាប់ទី២ ក្រោយឈ្នះមេដាយមាស៦ ប្រាក់៥ និងសំរឹទ្ធ៣ ខណៈក្លិបម៉ឺនឯកក្រោយឈ្នះមេដាយមាស៣ ប្រាក់២ និងសំរឹទ្ធ៤ ទទួលបានចំណាត់ថ្នាក់លេខ៣។

ក្រៅពីនេះក្លិបយាយព្រីងមានរិទ្ធ ដណ្តើមបានមេដាយមាស១ ប្រាក់១ និងសំរិទ្ធ៥, ក្លិបរិទ្ធិសែនមេដាយមាស១ និងសំរិទ្ធ៣, ខេត្តព្រៃវែងមេដាយប្រាក់៤ និងសំរិទ្ធ៥, ខេត្តពោធិ៍សាត់មេដាយសំរិទ្ធ២ និងក្លិបប្រយាបទទួលបានមេដាយសំរិទ្ធ១។ សម្រាប់ការប្រកួតជើងឯកថ្នាក់ជាតិឆ្នាំនេះមានអត្តពលិក១១៩នាក់មកពី៨ក្លិប-សមាគមចូលរួម៕