ជាតិ
សង្គមជាតិ
នយោបាយជាតិ
ស្ត្រី ជួបឧបសគ្គច្រើន ក្នុងការដើរតួនាទីជាអ្នកសម្រេចចិត្តលើវិស័យនយោបាយ
អ្នកស្រី ធីតា ឃឹះ ប្រធានគណៈកម្មាធិការដើម្បីលើកស្ទួយស្រ្តីក្នុងវិស័យនយោបាយ(CPWP)
×![]()
ភ្នំពេញ៖ មិនថា ស្ត្រីនៅក្នុងវិស័យនយោបាយ ឬស្ត្រីជាប្រជាពលរដ្ឋដែលមានការយល់ដឹង និងទាមទារ ចូលខ្លួនក្នុងនយោបាយទេ គឺជួបឧបសគ្គច្រើន ក្នុងការដើរតួនាទីជាអ្នកសម្រេចចិត្តលើវិស័យនយោបាយ ទោះបីជាមានចំណេះដឹងខ្ពស់ក៏ដោយ។ នោះក៏ព្រោះតែសង្គមមិនសូវបានលើកកម្ពស់ និងជំរុញឲ្យស្រី្តចូលរួមជាអ្នកដឹកនាំ ។
លោកស្រី ធីតា ឃឹះ ប្រធានគណៈកម្មាធិការដើម្បីលើកស្ទួយស្ត្រីក្នុងវិស័យនយោបាយ(CPWP) បាន ថា ដំណើរការស្ត្រីក្នុងការសម្រេចចិត្តលើវិស័យនយោបាយ មិនមានលក្ខណៈពេញលេញនោះទេ ដោយសារសង្គមតែងតែឲ្យស្ត្រីចូលរួមធ្វើការងារជាអ្នកគាំទ្របុរស រីឯបុរសជាអ្នកធ្វើការងាររបស់សង្គម និងជាអ្នកធ្វើការសម្រេចចិត្តថា គួរអនុវត្ត ឬមិនអនុវត្ត។
ថ្លែងក្នុងពិធីបិទការអនុវត្តគម្រោង«ស្ត្រីក្នុងវិស័យនយោបាយ» នាថ្ងៃទី២៩វិច្ឆិកា នៅសណ្ឋាគារសាន់វេ លោកស្រី ធីតា ឃឹះ បានបញ្ជាក់ដូច្នេះថា ៖«ឧបសគ្គដែលកើតឡើងចំពោះស្ត្រី មានទី១ បរិបទសង្គមរបស់យើង ដែលទាក់ទងទៅនឹងវប្បធម៌ ការអនុវត្ត។ ទី២ ស្ត្រីយើងមានបន្ទុកធ្ងន់ក្នុងគ្រួសារម្នាក់ៗ។ ទី៣ ឱកាសសម្រាប់ឲ្យស្ត្រីចូលរួមក្នុងនយោបាយមានចំនួនតិច ពិសេសមានរើសអើងខ្លាំងទាំងក្នុងគ្រួសារ សង្គម និងទាំងគណៈបក្សនយោបាយ ដោយពួកគេមិនសូវលើកកម្ពស់ស្ត្រីឲ្យចូលរួមជាអ្នកដឹកនាំឡើយ »។
ចំពោះ អ្នកស្រី ឆាយ សាត ដែលជាជំទប់ទី៤ នៅក្នុងឃុំដូនកែវ ស្រុកពក ខេត្តសៀមរាប បានប្រឡូកក្នុងវិស័យនយោបាយ៤អាណត្តិកន្លងមកនេះ បានជួបការរើសអើងពីបុរសច្រើនក្នុងជួរអ្នកដឹកនាំដូចគ្នា។ អ្នកស្រីបន្តថា បុរសទាំងនោះ ភាគច្រើនពុំសូវមានការសហការគ្នាបានល្អទេ តាមរយៈការចុះបំពេញការងារផ្សេងៗ មិនថានៅក្នុងភូមិក្តី ឬទៅប្រជុំក្តី និងកិច្ចការផ្សេងៗ។
ជំទប់ទី៤រូបនេះ បានបញ្ចេញយោបល់ដូច្នេះថា ៖«ប្រសិនបើមានស្ត្រីច្រើន ដូចបុរសសព្វថ្ងៃ ខ្ញុំអាចរីកចម្រើនបានច្រើន នៅក្នុងឃុំ-ស្រុក ក៏ប្រទេសជាតិយើង ព្រោះស្ត្រី អាចជួយបានច្រើន ក្រៅពីវិស័យនយោបាយ មិនថាជារឿងផ្ទាល់ខ្លួនរបស់ស្រី្តគ្នាឯង រឿងអំពើហឹង្សា ឬរឿងអ្វីដែលសម្ងាត់ គឺស្ត្រីយើងអាចជួយបានផ្ទាល់។ បច្ចុប្បន្ន ការងារនៅក្នុងឃុំដូនកែវរបស់ខ្ញុំ មានស្រី្ត២នាក់ និងបុរស៧នាក់»។
បច្ចុប្បន្នភាពស្រី្តជាអ្នកដឹកនាំ ក្នុងវិស័យនយោបាយ មានប្រហែល១២ភាគរយ ក្នុងថ្នាក់ជាតិ មានថ្នាក់ព្រឹទ្ធសភា រដ្ឋសភា និងទាំងថ្នាក់គណបក្សនយោបាយ ។ ចំនួន១២ភាគរយនៃអ្នកនយោបាយស្ត្រីនេះ នៅមានភាពទ្រឹង មិនកើនឡើងឡើយ។ ដើម្បីឲ្យស្រី្តទទួលតួនាទី និងមានឱកាសពេញលេញដូចបុរសក្នុងវិស័យនយោបាយ លុះត្រាតែមានការផ្តល់ឱកាសពីសង្គម ។ បើតាមប្រធានគណៈកម្មាធិការដើម្បីលើកស្ទួយស្ត្រីក្នុងវិស័យនយោបាយ(CPWP)៕
Tag:
សង្គម
នយោបាយ
ស្ត្រី
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
