នៅអេស្ប៉ាញសប្តាហ៍នេះ ប្រធានាធិបតីចិន ស៊ី ជិនភីង បានប្រកាសជាឱឡារិកថា ប្រទេសរបស់លោកប្តេជ្ញាជំរុញការការពារ«កម្មសិទ្ធិបញ្ញា»ឲ្យបានខ្ជាប់ខ្ជួន។ ការប្រកាសប្តេជ្ញាចិត្តរបស់ប្រមុខរដ្ឋចិននេះកើតឡើងមុនពេលកិច្ចប្រជុំប្រទេសសេដ្ឋកិច្ចជឿនលឿន ២០ (G20) និងស្របពេលដែលចិនបន្តធ្វើសង្គ្រាមពាណិជ្ជកម្មជាមួយអាមេរិកដែរ។
«របស់ចម្លង»និង«ពូកែលួចចម្លងគំនិតគេ»ជាអ្វីដែលគេតែងនិយាយពីផលិតផលចិន និង ប្រទេសចិនរាប់ទសវត្សរ៍មកហើយ។ ប៉ុន្តែរយៈពេលប៉ុន្មានឆ្នាំចុងក្រោយ មន្ត្រីចិន និងក្រុមហ៊ុនចិនតែងតែព្យាយាមបកស្រាយថា វប្បធម៌ចម្លងលែងមានទៀតហើយនៅចិន។ ប៉ុន្តែការធានាឲ្យមានការគោរពកម្មសិទ្ធិតឹងរ៉ឹងនោះនៅតែជាបញ្ហានៅឡើយនៅចិន។
មកដល់ថ្ងៃពុធទី ២៨ ខែវិច្ឆិកាសប្តាហ៍នេះ ប្រធានាធិបតីចិន លោក ស៊ី ជិនភីង បានប្រកាសប្រាប់សមាជិកសភាអេស្ប៉ាញពេញៗមាត់ថា ប្រទេសចិននឹងជំរុញការបើកចំហទ្វារទៅកាន់ពិភពលោកឲ្យកាន់តែទូលំទូលាយ និងប្តេជ្ញាធានាការការពារកម្មសិទ្ធិបញ្ញាក្នុងប្រទេសផង។
យោងតាមទីភ្នាក់ងារព័ត៌មាន AFP ប្រមុខរដ្ឋចិនរូបនេះបានថ្លែងដូច្នេះ៖«ចិននឹងប្រឹងប្រែងបន្ថែមទៀតដើម្បីបើកទ្វារទៅកាន់ពិភពលោក។ យើងនឹងប្រឹងប្រែងឲ្យបានខ្លាំងក្លាថែមទៀតដើម្បីជំរុញការតភ្ជាប់ទៅកាន់ទីផ្សារពិភពលោក ធ្វើឲ្យបរិយាកាសនៃការវិនិយោគកាន់តែប្រសើរ និងលើកស្ទួយការការពារកម្មសិទ្ធិបញ្ញាផងដែរ»។
និយាយបានថា ការលួចចម្លងគំនិតឬកម្មសិទ្ធិបញ្ញានៅតែត្រូវគេបំពានច្រើននៅចិនក៏ដោយ ក្រុមអ្នកបង្កើតគោលនយោបាយចិនយល់ច្បាស់ពីសារសំខាន់នៃការការពារកម្មសិទ្ធិបញ្ញ និងផ្តោតការយកចិត្តទុកដាក់លើបញ្ហានេះដែរ។ នេះក៏ដោយសារ វាជាគន្លឹះសំខាន់មួយនៃគោលដៅអភិវឌ្ឍន៍សេដ្ឋកិច្ចយូរអង្វែងរបស់ចិនដែលជាមហាអំណាចសេដ្ឋកិច្ចទីពីរផងដែរ។
អ្នកជំនាញផ្តល់យោបល់ដែរកន្លងមកនេះថា រដ្ឋាភិបាលចិនក្រោមការដឹកនាំរបស់លោក ស៊ី យកចិត្តពីកម្មសិទ្ធិបញ្ហាដោយសារហេតុផលបីយ៉ាង។ ទីមួយ ចិនចង់ធានាឲ្យបាននូវការទាក់ទាញទុនវិនិយោគបរទេសដើម្បីធានាកំណើនសេដ្ឋកិច្ច។ ទីពីរ ដោយសារខ្លួនមិនមែនជាប្រទេសក្រីក្រ ចិនត្រូវព្យាយាមបង្កើនទំនុកចិត្តពាណិជ្ជកម្មជាមួយដៃគូររកស៊ីបរទេស។ បើគ្មានការគោរពកម្មសិទ្ធិបញ្ហាទេ វាប្រាកដណាស់ថា គ្មានអ្នកណាចង់បន្តរកស៊ីជាមួយចិនឡើយ។ ទីបី ចិនចង់ធ្វើកែប្រែសង្គមចិនពីរោងចក្រលួចចម្លងទៅជាប្រភពនៃ«ចំណេះដឹង គំនិត និងការច្នៃប្រឌិតថ្មី»វិញ។
ដោយឡែក ការប្រកាសជាឱឡារិករបស់ប្រធានាធិបតីចិនពីការការពារកម្មសិទ្ធិបញ្ញានេះ ធ្វើឡើងមុនពេលកិច្ចប្រជុំប្រទេសសេដ្ឋកិច្ចជឿនលឿន ២០ ចាប់ផ្តើមប្រជុំនៅទីក្រុងប៊ុយណូស៊ែរ ប្រទេសអាហ្សង់ទីននៅថ្ងៃសុក្រទី ៣០ខែវិច្ឆិកានេះ។ គេរំពឹងថា សង្គ្រាមពាណិជ្ជកម្មរវាងចិននិងអាមេរិកដែលបន្តឆាបឆេះ, ចរន្តគាំពារនិយមពាណិជ្ជកម្ម និងបញ្ហាសន្តិសុខតំបន់ផ្សេងទៀតនឹងគ្របដណ្តប់វេទិកានៃកិច្ចប្រជុំនេះផង។
តាមពិតទៅ ដើមហេតុនៃការប្រឈមមុខគ្នារវាងចិននិងអាមេរិក វាផ្តើមចេញពីបញ្ហាច្រើនក្នុងនោះមានកម្មសិទ្ធិបញ្ហានេះដែរ។ ចាប់ពីពេលលោក ដូណាល់ ត្រាំឡើងកាន់តំណែង អាមេរិកចាប់ផ្តើមរករឿងចិនដែលបន្តលួចកម្មសិទ្ធិបញ្ហាក្រុមហ៊ុនអាមេរិក និងបង្ខំឲ្យក្រុមហ៊ុនបរទេសផ្ទេរបច្ចេកវិទ្យារបស់ខ្លួនជាដើម។ អាមេរិក និងអឺរ៉ុបនិយាយស្រដៀងគ្នាថា ក្រុមហ៊ុនខ្លួនពិបាកធ្វើជំនួញនៅប្រទេសចិនណាស់ដោយសារបញ្ហាកម្មសិទ្ធិបញ្ញាផង និងការអនុវត្តគោលនយោបាយពាណិជ្ជកម្មមិនស្មោះត្រង់ផង។
បច្ចុប្បន្ន រដ្ឋបាលអាមេរិកក៏បានគំរាមចាក់សាំងបន្ថែមលើសង្គ្រាមពាណិជ្ជកម្មដែលកំពុងមានជាមួយចិនដែរ បើសិនជាចិនមិនព្រមប្តូរឥរិយាបថរបស់ខ្លួនក្នុងការការពារកម្មសិទ្ធិបញ្ញា និងកិច្ចសហប្រតិបត្តិការពាណិជ្ជកម្មទេនោះ។
យ៉ាងណាក៏ដោយ លោក ត្រាំ នឹងជួបជាមួយសមភាគីចិន ស៊ី ជិនភីងនៅក្រៅកិច្ចប្រជុំក្រុងប៊ុយណូស៊ែរនេះដែរដើម្បីពិភាក្សាគ្នាពីបញ្ហាប្រឈមផ្នែកពាណិជ្ជកម្ម។ គេរំពឹងថា កិច្ចព្រមព្រៀងមួយអាចនឹងត្រូវបង្កើតឡើងរួមគ្នាតាមរយៈការចរចាដើម្បីដោះស្រាយបញ្ហាកង្វល់ភាគី និងរំលត់ភ្លើងសង្គ្រាមដែលកំពុងបន្តឆាបឆេះនេះដែរ។
បច្ចុប្បន្ននេះ អាមេរិកបានសម្រេចដាក់ព័ន្ធលើផលិតផលចិនមានតម្លៃលើស ២៥០ពាន់លានដុល្លាររួចទភហើយដើម្បីដាក់សម្ពាធលើចិនឲ្យកែប្រែគោលនយោបាយពាណិជ្ជកម្មដែលអាមេរិកជឿជាក់ថា មានភាពមិនស្មោះត្រង់។ សប្តាហ៍នេះវ៉ាស៊ីនតោនក៏បានគំរាមជាថ្មីទៀតថា ខ្លួននឹងដាក់ពន្ធលើផលិតផលនាំចូលពីចិនដែលនៅសល់មានទំហំ ២៦៧ពាន់លានដុល្លារបន្ថែមទៀតរួមទាំងទូរសព្ទ iPhone ដែលផលិតនៅចិនផងដែរ។
ខាងភាគីចិនវិញ ហាក់បង្ហាញការបន្ទន់ឥរិយាបថបន្តិចដែរ។ ប៉ុន្តែប្រមុខរដ្ឋ ស៊ី ជិនភីង នៅបន្តហៅខ្លួនឯងជាអ្នកការពារសាកលភាវូបនីយកម្ម និងសេរីភាពវូបនីយកម្មសេដ្ឋកិច្ច។ លោក បន្តព្រមានពីភាពមិនច្បាស់លាស់ជាពិសេសអស្ថិភាពសេដ្ឋកិច្ចពិភពលោកដែលកើតឡើងដោយសារការកើនឡើងនៃចរន្តគាំពារនិយម និងឯកតោភាគីនិយមតាមការបង្កើនពន្ធប្រឆាំងគ្នានេះ៕