អន្តរជាតិ
នយោបាយអន្តរជាតិ
ប្រមុខការទូតកូរ៉េខាងជើង ទទួលស្គាល់ថា សេដ្ឋកិច្ច-សង្គមវៀតណាមពិតជាមានការអភិវឌ្ឍខ្លាំង
×![]()
ដោយ: ថ្មីៗ
ដូចការគ្រោងទុក ប្រមុខការទូតកូរ៉េខាងជើង លោក Ri Yong បានបំពេញទស្សនកិច្ចផ្លូវការរយៈពេលបួនថ្ងៃទៅកាន់សាធារណរដ្ឋវៀតណាម ក្នុងគោលដៅដើម្បីពង្រឹងចំណងមិត្តភាពប្រពៃណី និងជាពិសេសនោះដើម្បីឈ្វេងយល់ពីការអភិវឌ្ឍសេដ្ឋកិច្ច-សង្គមវៀតណាម ដែលរយៈពេលចុងក្រោយនេះ ត្រូវបានកត់សម្គាល់ថា មានការរីកចម្រើនខ្លាំងក្នុងតំបន់។
តាមរយៈជំនួបជាមួយនឹងសមភាគីកូរ៉េខាងជើងក្នុងដំណើរទស្សនកិច្ចផ្លូវការនេះ លោកឧបនាយករដ្ឋមន្ត្រី និងជារដ្ឋមន្ត្រីការបរទេសវៀតណាម Phạm Bình Minh បានអះអាងថា វៀតណាម បានត្រៀមខ្លួនរួចស្រេចក្នុងការចែករំលែកទៅកាន់កូរ៉េខាងលើលើបទពិសោធន៍អភិវឌ្ឍសេដ្ឋកិច្ច-សង្គម និងការកសាងប្រទេស តាមអ្វីដែលកូរ៉េខាងជើងចង់ដឹង។ នេះបើយោងសារព័ត៌មានវៀតណាម Vietnam News។
ឆ្លៀតឱកាសនោះផងដែរ ប្រមុខការទូតវៀតណាមរូបនេះ បានសាទរដល់ប្រជាជនកូរ៉េខាងជើងចំពោះសមិទ្ធផលនៃការកសាង និងអភិវឌ្ឍប្រទេសក្នុងរយៈពេលជាង៧០ឆ្នាំមកនេះ។ លោក ក៏បានវាយតម្លៃខ្ពស់ចំពោះដំណើរទស្សនកិច្ចរបស់ប្រមុខការទូតកូរ៉េខាងជើង ដោយលោក ចាត់ទុកថា ដំណើរទស្សនកិច្ចនេះ ជាការពង្រឹងចំណងមិត្តភាពប្រពៃណីដ៏រឹងមាំមួយ។
សម្រាប់ភាគីកូរ៉េខាងជើងវិញ លោករដ្ឋមន្ត្រី Ri Yong Ho បានថ្លែងថា លោក ពិតជារីករាយចំពោះដំណើរទស្សនកិច្ចនៅវៀតណាម ហើយ ក៏បានឃើញនឹងភ្នែកផ្ទាល់ពីការអភិវឌ្ឍសេដ្ឋកិច្ច-សង្គមវៀតណាម ក៏ដូចជា សមិទ្ធផលនៃការសមាហរណកម្មអន្តរជាតិរបស់រដ្ឋសង្គមនិយមមួយនេះផងដែរ។ នេះបើយោងតាមប្រភពព័ត៌មានដដែលនោះ។
បន្ថែមពីនេះ ប្រមុខការទូតកូរ៉េខាងជើង ក៏បញ្ជាក់ពីជំហររបស់កូរ៉េខាងជើងថា ទាំងបក្ស រដ្ឋាភិបាល របស់កូរ៉េខាងជើង តែងតែផ្តល់តម្លៃខ្ពស់ និងចង់បន្តផ្សារភ្ជាប់ទំនាក់ទំនងប្រពៃណីរវាងប្រទេសទាំងពីរឲ្យកាន់តែស្អិតល្មួតផងដែរ។
គួរជម្រាបផងដែរ ក្រោយពីមានការចរចាក្នុងជំនួបកំពូលៗទាំងលក្ខណៈទ្វេភាគី និងពហុភាគីពាក់ព័ន្ធនឹងការបោះបង់ការអភិវឌ្ឍអាវុធនុយក្លេអ៊ែរមក កូរ៉េខាងជើង ចាប់ផ្តើមបង្ហាញពីចេតនាការមកចាប់ដៃគូជាមួយនឹងសហគមន៍អន្តរជាតិដើម្បីអភិវឌ្ឍសេដ្ឋកិច្ចប្រទេសឲ្យកាន់តែរីកចម្រើន។ ចិន និងវៀតណាម ដែលប្រទេសប្រកាន់របបសង្គមនិយមដូចគ្នាផងនោះ បានស្ថិតនៅក្នុងចំណោមប្រទេសអាទិភាព ដែលកូរ៉េខាងជើង ចង់រៀនសូត្រតាម៕
Tag:
កូរ៉េខាងជើង
វៀតណាម
© រក្សាសិទ្ធិដោយ thmeythmey.com
