ជាតិ
សង្គមជាតិ
វិចិត្រករ១៥ គូរគំនូរសំណង់អគារនៃរចនាប័ទ្មខ្មែរនៅភ្នំពេញ មុនសម័យសង្គ្រាម តាមបែបស្រមើលស្រមៃ
×
ភ្នំពេញ៖ គំនូរ១៥ផ្ទាំង គូរដោយវិចិត្រករវ័យក្មេង១៥រូប ស្ដីពីសំណង់អាគារមានរចនាប័ទ្មខ្មែរ បានដាក់តាំងបង្ហាញនៅក្នុងវិទ្យាស្ថានជាតិអប់រំ ក្រោមប្រធានបទ «ប្រសិនបើមិនមានសង្គ្រាម និងអំពើប្រល័យពូជសាសន៍នៅកម្ពុជា»។ គំនូរទាំងនេះប្រសូត្រឡើង ក្រោយពីវិចិត្រករទាំង១៥រូប មកពីហ្វាពន្លឺសិល្បៈ បានទស្សនាទីក្រុងភ្នំពេញនាពេលបច្ចុប្បន្នយ៉ាងយកចិត្តទុកដាក់ និងបានទស្សនាភាពយន្តឯកសារស្ដីពីប្រវត្តិសាសន៍ខ្មែរ មុនសម័យសង្គ្រាមប្រល័យពូជសាសន៍ ប៉ុល ពត។
ក្រោយពីបានឃើញសំណង់អាគារនៅទីក្រុងភ្នំពេញនាពេលបច្ចុប្បន្ននេះ និងបានឃើញសំណង់អាគារកាលពីសម័យសង្គមរាស្ត្រនិយម តាមរយៈភាពយន្តឯកសារប្រវត្តិសាស្ត្រ វិចិត្រករវ័យក្មេង១៥រូប បានគូរគំនូរផ្អែកលើការស្រមើលស្រមៃរបស់ខ្លួន ពីអាគារនៅទីក្រុងភ្នំពេញ មុនសម័យសង្គ្រាម។ គំនូរទាំង១៥ផ្ទាំងបានបង្ហាញឱ្យឃើញសំណង់អាគារ ដែលរំលេចពីរចនាបទខ្មែរ និងមានរុក្ខជាតិពណ៌បៃតងស្រស់លម្អតាមដងវិថី។
លោក សៀង ចិន្តា តំណាងមជ្ឈមណ្ឌលឯកសារកម្ពុជា បាននិយាយថា ការតាំងពិព័រណ៍នេះ លើកទឹកចិត្តដល់ក្មេងជំនាន់ក្រោយ ឱ្យចេះស្វែងយល់ពីប្រវត្តិសាស្ត្រ សិល្បៈ និងសំណង់អាគាររចនាប័ទ្មខ្មែរ។ លោកបន្ថែមថា ក្មេងជំនាន់ក្រោយនឹងព្យាយាមរកគំនិតថា បើសិនជាមិនមានសង្គ្រាមប្រល័យពូជសាសន៍ តើសំណង់អាគារនៅទីក្រុងភ្នំពេញ និងក្លាយជាយ៉ាងណា។ លោក ចិន្តា បញ្ជាក់ដូច្នេះថា៖ «ពិព័រណ៍នេះនឹងផ្ដល់ឱ្យអ្នកទស្សនា ស្វែងយល់ពីប្រវត្តិសាសន៍ខ្មែរ។ ក្រោយពីពួកគេទស្សនាហើយ ពួកគេមានការពិភាក្សាគ្នា ពីគំនូរទាំងនោះ ដូច្នេះគំនិតចេះតែកើតមាន ជុំវិញការគិតពីភ្នំពេញ ថានឹងមានរូបរាងយ៉ាងណា បើគ្មានសង្គ្រាមប្រល័យពូជសាសន៍»។
លោក សៀង ចិន្តា បន្ថែមថា គំនូរមានតួនាទីសំខាន់ ក្នុងការពន្យល់ពីប្រវត្តិសាស្ត្រ និងចំណេះដឹងផ្សេងៗ ឱ្យមនុស្សស្វែងយល់កាន់តែច្បាស់។ លោកថានៅសម័យសង្គមរាស្ត្រនិយម មានសំណង់អាគារ សម្បូរបែប ដែលសុទ្ធសឹងបង្ហាញពីរចនាប័ទ្មខ្មែរ។
ពិព័រណ៌គំនូររៀបចំដោយមជ្ឈមណ្ឌលឯកសារកម្ពុជា សហការជាមួយសាលាជំនាញសិល្បៈសូនរូប ហ្វាពន្លឺសិល្បៈ ក្រោមប្រធានបទ «ប្រសិនបើមិនមានសង្គ្រាម និងអំពើប្រល័យពូជសាសន៍នៅកម្ពុជា» តាំងបង្ហាញជូនសាធារណៈជនទស្សនា ដោយមិនគិតថ្លៃពីថ្ងៃទី ៣០ខែវិច្ឆិកា ឆ្នាំ២០១៨ ដល់ថ្ងៃទី២៨ខែកុម្ភៈ ឆ្នាំ២០១៩ នៅវិទ្យាស្ថានជាតិអប់រំ។ បន្ទាប់ពីនោះ គំនូរទាំងនេះនឹងយកទៅតាំងបង្ហាញនៅស្ថានទូតស៊ុយអែត៕
Tag:
ពិព័រណ៍គំនូរសហសម័យ
ហ្វាពន្លឺសិល្បៈ
មជ្ឈមណ្ឌលឯកសារកម្ពុជា
© រក្សាសិទ្ធិដោយ thmeythmey.com