ដើមសប្តាហ៍នេះ រដ្ឋាភិបាលក្រុងដូហា បានប្រកាសជាផ្លូវការថា នៅត្រឹមខែមករាឆ្នាំ ២០១៩ កាតានឹងលែងជាសមាជិកក្រុមប្រទេសនាំចេញប្រេង OPEC ទៀតហើយ។ រដ្ឋាភិបាលនេះអះអាងថា ខ្លួននឹងងាកទៅផ្តោតសំខាន់លើឧស្ម័ន ដ្បិតសក្តានុពលខាងប្រេងរបស់ខ្លួនមិនមានខ្លាំងដូចគេឡើយ។
រដ្ឋមន្ត្រីថាមពលកាតា Saad al-Kaabi បានថ្លែងក្នុងសន្និសីទសារព័ត៌មានមួយថ្ងៃចន្ទទី ៣ ខែធ្នូថា ការតានឹងដកខ្លួនចេញពីអង្គការ OPEC ដែលត្រូវបានគេស្គាល់ថា «ជាសម្ព័ន្ធប្រទេសនាំចេញប្រេង» នៅដើមខែមករាឆ្នាំក្រោយ។
ទីភ្នាក់ងារព័ត៌មាន AFP ចុះផ្សាយដោយស្រង់សម្តីរដ្ឋមន្ត្រីខាងលើថា គម្រោងដកខ្លួនពីក្រុមប្រទេសនាំចេញប្រេងនេះត្រូវបានប្រកាសជាផ្លូវការបន្ទាប់ពីខ្លួនបានជូនដំណឹងពីការសម្រេចចិត្តនេះទៅកាន់សមាជិក OPEC ទាំងអស់រួចរាល់។
លោក al-Kaabi បានថ្លែងដូច្នេះ៖«កាតាបានសម្រេចចិត្តដកខ្លួនចេញពីអង្គការ OPEC ដែលមានសុពលភាពចាប់ពីខែមករាឆ្នាំ ២០១៩នេះតទៅ»។
យ៉ាងណាក៏ដោយចុះ តំណាងក្រុងដូហារូបនេះ បានបញ្ជាក់ថា កាតានឹងនៅបន្តផលិតប្រេង ប៉ុន្តែលោកមិនបានពន្យល់លម្អិតពីហេតុផលនៃការដើរចេញនេះទេ។ លោកត្រឹមបញ្ជាក់ថា ប្រេងមិនមែនជាសក្តានុពលចម្បងរបស់កាតាឡើយ ហើយកាតានឹងផ្តោតសំខាន់លើការផលិតឧស្ម័នវិញម្តង។
«យើងនឹងនៅបន្តផលិតប្រេង ប៉ុន្តែពេលនេះយើងផ្តោតការយកចិត្តទុកខ្លាំងតែទៅលើការបូមឧស្ម័នដោយបង្កើនពី ៧៧លានតោនក្នុងមួយឆ្នាំទៅដល់ ១១០លានតោននៅពេលខាងមុខ។ យើងមិនមានសក្តានុពលក្នុងធនធានប្រេងឡើយ។ យើងនិយាយការពិត។ សក្តានុពលរបស់យើងគឺ ឧស្ម័ន»។ រដ្ឋមន្ត្រីកាតាសង្កត់ធ្ងន់ដូច្នេះ។
អង្គការ OPEC ត្រូវបានបង្កើតឡើងនៅក្នុងឆ្នាំ ១៩៦០ ដោយសមាជិកស្ថាបនិកប្រាំ មានអ៊ីរ៉ង់, អ៊ីរ៉ាក់, វេណេស៊ុយអេឡា, កូវ៉ែត និងអារ៉ាប៊ីសាអូឌីត ក្រោមគោលដៅធានាឲ្យមានគោលនយោបាយប្រេងរួមគ្នារវាងរដ្ឋដែលមានប្រេង និងធានាឲ្យបាននូវស្ថិរភាពទីផ្សារប្រងពិភពលោកផង។
ឆ្នាំ ១៩៦១ កាតាបានសម្រេចចិត្តចូលរួមជីវភាពជាមួយសម្ព័ន្ធនេះ ហើយបើគិតមកដល់បច្ចុប្បន្នដែលកាតាសម្រេចចាកចេញនេះ វាមានរយៈពេលជិត ៦ទសវត្សរ៍ទៅហើយ។ ប៉ុន្តែអង្គការនេះស្ថិតក្រោមការដឹកនាំនិងស្ថិតក្រោមឥទ្ធិពលរបស់សេដ្ឋីប្រេងអារ៉ាប៊ីសាអូឌីត ហើយជម្លោះការទូតជាមួយគ្នារវាងអារ៉ាប៊ីសាអូឌីតជាមួយកាតា ចាប់ពីខែមិថុនាឆ្នាំ ២០១៧ បណ្តាលឲ្យមានការហ៊ុមព័ទ្ធកាតាថែមទៀត។
គេសង្ស័យផងដែរថា ការសម្រេចរបស់កាតានេះអាចពាក់ព័ន្ធនឹងការហ៊ុមព័ទ្ធពីសំណាក់ក្រុមរដ្ឋអារ៉ាប់ដែលជាសម្ព័ន្ធមិត្តអារ៉ាប៊ីសាអូឌីតមានអារ៉ាប់រួមអេមីរ៉ាត់, អេហ្ស៊ីប និងបារ៉ែន។ ប៉ុន្តែអ្នកជំនាញខ្លះអះអាងថា ការសម្រេចចិត្តនេះមិនពាក់ព័ន្ធនឹងការហ៊ុមព័ទ្ធ និងជម្លោះការទូតនេះឡើយ។
តាមពិតទៅការសម្រេចចិត្តរបស់កាតា កើតឡើងស្របពេលដែលអង្គការ OPEC រួមជាមួយនិងរុស្ស៊ីបានឯកភាពគ្នាកាលពីសប្តាហ៍មុនលើការកាត់បន្ថយការផលិតប្រេងជាថ្មីទៀតដើម្បីធានាថា តម្លៃប្រេងឆៅលើទីផ្សារមិនធ្លាក់ចុះខ្លាំងទេនៅក្នុងប៉ុន្មានខែខាងមុខ។ រុស្ស៊ី និងសមាជិក OPECទាំងអស់ផលិតបានប្រេងប្រហែល ៤០ភាគរយនៃប្រេងនាំចេញទៅផ្សារពិភពលោកទាំងមូល។ ជាលទ្ធផល តម្លៃប្រេងឆៅលើទីផ្សារអន្តរជាតិក៏ចាប់ផ្តើមងើបឡើងវិញដែរ៕