ជាតិ
ឆ្នាំសិក្សា២០១៧-២០១៨ មានជនពិការភាពជាង ៦ម៉ឺនបានចូលរៀន រូបភាពពីហ្វេសប៊ុក សម្តេច ហ៊ុន សែន
× ភ្នំពេញ៖ សម្រាប់ឆ្នាំ២០១៧-២០១៨ មានជនពិការ សរុបចំនួន៦០ ៦១០នាក់ ដែលបានចូលរៀនចាប់ពីកម្រិតមត្តេយ្យ រហូតឧត្តមសិក្សា។ ក្នុងនោះមានកម្រិតមត្តេយ្យសិក្សាមាន ២ ៥៤៦នាក់ កម្រិតបឋមសិក្សាមាន៤៣ ៣៤៤នាក់ កម្រិតអនុវិទ្យាល័យមាន៨ ៩៤៨នាក់ កម្រិតវិទ្យាល័យមាន៥ ៤១៩នាក់ កម្រិតឧត្តមសិក្សាមាន៣៥៣នាក់។
យោងតាមសារលិខិតរបស់ សម្តេច ហ៊ុន សែន ថ្ងៃទី៣ធ្នូ ក្រៅពីជនមានពិការខាងលើ ក៏មានជនមានពិការភាពក្រីក្រនៅតាមសហគមន៍៨៧០០នាក់ បាន និងកំពុងទទួលបាននូវផលប្រយោជន៍ តាមរយៈការផ្ដល់របបគោលនយោបាយ ដើម្បីរួមចំណែកអនុវត្តយុទ្ធសាស្ដ្រជាតិ និងគោលនយោបាយជាតិនានា ទាក់ទិននឹងការកាត់បន្ថយភាពក្រីក្រ។
ក្នុងនោះ រាជរដ្ឋាភិបាល បានផ្ដល់កម្មសិទ្ធិដីធ្លី និងបានកសាងលំនៅឋាន ជូនជនមានពិការភាពតាកែនកោះស្លា តំបន់អភិវឌ្ឍជនមានពិការភាពខេត្តកំពត ៣១៧ នៅស្រុកគូលែន ខេត្តសៀមរាប និងនៅភ្នំឆ័ត្រ ខេត្តបន្ទាយមានជ័យ។
បច្ចុប្បន្ន ជនមានពិការភាពបានចងក្រុមជួយខ្លួនឯង មាន១៩៥០ក្រុម និងអង្គការជនមានពិការភាពចំនួន៧០ ដែលមានជនមានពិការភាពសរុប២៨,០០០នាក់។ ក្នុងឆ្នាំ២០១៨ ជនមានពិការចំនួន៣៦៣នាក់ បានទទួលការផ្ដល់សេវាស្ដារលទ្ធភាពពលកម្មកាយសម្បទា និង ការបណ្ដុះបណ្ដាលវិជ្ជាជីវៈ និងមុខរបរ។
សូមរម្លឹកថា នេះជាលើកខួបទី២០នៃទិវាជនមានពិការភាពកម្ពុជា និងទី៣៦ សម្រាប់ទិវាជនមានពិការភាពអន្ដរជាតិ ថ្ងៃទី៣ធ្នូ ឆ្នាំ២០១៨៕
© រក្សាសិទ្ធិដោយ thmeythmey.com