ជាតិ
ក្រោយសំណើសម្តេច ហ៊ុន សែន តុលាការផ្តើមដោះស្រាយសំណុំរឿងមេសហជីព
× ភ្នំពេញ៖ ក្រោយពីសម្តេចនាយករដ្ឋមន្ត្រី ហ៊ុន សែន បានស្នើឲ្យតុលាការ បញ្ចប់រាល់សំណុំរឿងដែលពាក់ព័ន្ធនឹងមេសហជីព នៅត្រឹមឆ្នាំ២០១៨។ សាលាដំបូងរាជធានីភ្នំពេញ ចាប់ផ្តើមដោះស្រាយរឿងរបស់មេសហជីព នៅថ្ងៃទី៧ធ្នូ ខាងមុខ។
ក្នុងបទសម្ភាសសារព័ត៌មាន ThmeyThmey តាមទូរសព្ទ លោក រ៉ុង ឈុន បានសាទរជាខ្លាំងចំពោះការស្នើរបស់សម្តេច ហ៊ុន សែន ដែលឲ្យក្រសួងយុតិ្តធម៌ និងក្រសួងការងារ បណ្តុះបណ្តាល វិជ្ជាជីវៈ ដោះស្រាយបណ្តឹងរឿងរបស់មេសហជីពថ្នាក់ជាតិ ក៏ដូចថ្នាក់មូលដ្ឋាន ដែលមានជាប់បណ្តឹងនៅតុលាការ។ ប៉ុន្តែ ប្រធានសហភាពសហជីពរូបនេះ ក៏បានសម្តែងនៅការមិនពេញចិត្ត លើការស្នើ និងការលើកឡើងរបស់សម្តេច ហ៊ុន សែន ពេលនេះផងដែរ។
លោក រ៉ុង ឈុន បាននិយាយដូច្នេះថា៖ « ប្រសិនបើសម្តេចបានលើករឿងនេះឡើង តាំងឆ្នាំ២០១៤-២០១៥ វាជាការប្រសើរណាស់។ ការលើកពេលនេះ បានសង្កត់ធ្ងន់ទៅលើការបាត់លំហូរចលនាសេរីភាពរបស់សហជីព ក្នុងការមានឱកាស ងាយស្រួលការពារសមាជិកររបស់ខ្លួន។ យើងឃើញថា ការលើកឡើងរបស់លោកនាយករដ្ឋមន្ត្រីនាពេលនេះ ហាក់ដូចជា កំពុងលួងចិត្តទៅដល់សហគមន៍អន្តរជាតិនៅជុំវិញស្ថានភាពកម្ពុជាបច្ចុប្បន្ន ដែលកំពុងកើតឡើងជាបន្តបន្ទាប់គ្នានេះ»។
សូមបញ្ជាក់ថា លោក រ៉ុង ឈុន ប្រធានសហភាពសហជីពកម្ពុជា ស្ថិតក្នុងចំណោមមេសហជីពទាំង៦ ដែលតុលាការនឹងបើកសវនាការជំនុំជម្រះលើសំណុំរឿងមេដឹកនាំសហជីព ដែលពាក់ព័ន្ធនឹងករណីដឹកនាំធ្វើបាតុកម្មនៅមុខសួនឧស្សាហកម្មកាណាឌីយ៉ា ផ្លូវវេងស្រេង កាលដើមឆ្នាំ២០១៤។ លោកមានបណ្តឹង៣ករណី ដែលបានជាប់នៅតុលាការក្នុងនោះមាននៅសាសាដំបូងរាជធានីភ្នំពេញ២ករណី និងនៅសាលាដំបូងខេត្តកណ្តាល១ករណី។
ជាមួយគ្នានេះ មេដឹកនាំសហជីពដែលពាក់ព័ន្ធនឹងករណីខាងលើ៥រូបទៀត មាន លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា, លោក អាត់ ធន់ ប្រធានសហភាពការងារកម្ពុជា, លោក ប៉ាវ ស៊ីណា ប្រធានសហភាពចលនាកម្មករកម្ពុជា, អ្នកស្រី យ៉ាង សោភ័ណ្ឌ ប្រធានសម្ព័ន្ធសហជីពកម្មករកម្ពុជា និង អ្នកស្រី ម៉ម ញឹម ប្រធានសហព័ន្ធសហជីពនៃឧស្សាហកម្មកាត់ដេរកម្ពុជា ត្រូវបានតុលាការកោះហៅ ហើយនឹងបើកសវនាការនៅថ្ងៃទី៧ធ្នូ។
ការបើកសវនាការនេះ មានលោក អ៊ឹម វណ្ណៈ ជាចៅក្រមជំនុំជម្រះ លោក លី សុផាណា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ជាតំណាងអយ្យការ និងលោក វុន សុជាតិ ជាក្រឡាបញ្ជីសវនាការ។
សូមរម្លឹកថា សម្តេច ហ៊ុន សែន បានស្នើទៅតុលាការឲ្យពន្លឿនដោះស្រាយបញ្ហាបណ្ដឹងរបស់សហជីព ថា គួរតែមានចំណាត់ការ ឬគួរតម្កល់ទុកមិនចាត់ កាលពីពុធ វិច្ឆិកាឆ្នាំ២០១៨ ក្នុងពិធីសំណេះសំណាលជាមួយកម្មកររោងចក្រខេត្តតាកែវ។ មូលហេតុដែលសម្ដេច ហ៊ុន សែន ចង់ឲ្យតុលាការធ្វើសេចក្តីសម្រេចលើសហជីព ដែលរងបណ្ដឹងឲ្យចប់ស្ថាពរនៅឆ្នាំនេះ ដើម្បីឲ្យពួកគេស្រឡះចិត្ត ក្នុងការបំពេញការងារឲ្យបានអស់សមត្ថភាព ពោលគឺកុំឲ្យសហជីពទាំងនោះ ធ្វើការក្រោមគំនាបពាក្យបណ្ដឹងឡើយ៕
Tag:
សហជីព
ហ៊ុន សែន
រ៉ុង ឈុន
តុលាការ
© រក្សាសិទ្ធិដោយ thmeythmey.com