អត្ថបទពាណិជ្ជកម្ម
ក្រុមហ៊ុន ខេមបូឌាន ដេរីវ៉េទីវ អ៊ិចឆេង ចូលរួមក្នុងសិក្ខាសាលាតាមបណ្ដាខេត្តប្រចាំឆ្នាំ2018 របស់គណៈកម្មការមូលបត្រកម្ពុជា
×![]()
នាថ្ងៃទី 30 ខែវិច្ឆិកា ឆ្នាំ 2018 ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានចូលរួមក្នុងសិក្ខាសាលាតាមបណ្ដាខេត្តចំនួន5 ប្រចាំឆ្នាំ 2018 របស់គណៈកម្មការមូលបត្រកម្ពុជា(SECC) នៅសណ្ឋាគារសុខា ខេត្តព្រះសីហនុ។ ខេត្តនេះ គឺជាគោលដៅទីមួយ ក្នុងចំណោមខេត្តទាំងប្រាំ ដែលរួមមានខេត្តកំពង់ចាម ខេត្តសៀមរាប ខេត្តបន្ទាយមានជ័យ និងខេត្តបាត់ដំបង។ ភ្ជាប់ជាមួយនឹងប្រធានបទ «អាជីវកម្មឧបករណ៍និស្សន្ទនៅកម្ពុជា» សិក្ខាសាលាតាមបណ្ដាខេត្តនេះ ផ្តោតសំខាន់លើការផ្សព្វផ្សាយ និងពង្រីកការយល់ដឹង អំពីការវិនិយោគលើឧបករណ៍និស្សន្ទនៅទូទាំងប្រទេសកម្ពុជា ការកសាងទំនុកចិត្តរបស់វិនិយោគិន និងការរៀបចំឱ្យវិនិយោគិន មានភាពរួចរាល់សម្រាប់ការវិនិយោគនេះ។
មុនពេលចូលរួមសិក្ខាសាលាតាមបណ្ដាខេត្តនេះ ក្រុមហ៊ុន ខេមបូឌាន ដេរីវ៉េទីវ អ៊ិចឆេង បានរៀបចំសិក្ខាសាលា សម្រាប់ក្រុមសិក្ខាកាមផ្សេងៗគ្នា និងបានសហការជាមួយគណៈកម្មការមូលបត្រកម្ពុជា ក្នុងការរៀបចំវេទិកា ក៏ដូចជាព្រឹត្តិការណ៍ផ្សេងៗនៅទីក្រុងភ្នំពេញ ដែលជារាជធានីនៃប្រទេសកម្ពុជា។
ក្នុងពិធីបើកសិក្ខាសាលា លោក សៀង ធីរិទ្ធ អគ្គនាយករងនៃគណៈកម្មការមូលបត្រកម្ពុជាបានលើកឡើងពីបេសកកម្មរបស់ SECC ក្នុងការលើកកម្ពស់ការជួញដូរឧបករណ៍និស្សន្ទ និងលើកទឹកចិត្តដល់សិក្ខាកាម ឱ្យស្វែងរកចំណេះដឹងអំពីទីផ្សារឧបករណ៍និស្សន្ទ ក៏ដូចជាពិចារណាជួញដូរលើឧបករណ៍និស្សន្ទនេះ។
ថ្លែងនាឱកាសនោះដែរ លោក យន់ សុវណ្ណារ៉ា អនុប្រធានការិយាល័យគ្រប់គ្រងអាជីវកម្មគម្រោងវិនិយោគរួម និងអាជីវកម្មឧបករណ៍និស្សន្ទ បានបង្ហាញពីទិដ្ឋភាពទូទៅនៃទីផ្សារឧបករណ៍និស្សន្ទ ការរីកចម្រើននៃការជួញដូរឧបករណ៍និស្សន្ទនៅកម្ពុជា និងក្របខណ្ឌបទប្បញ្ញតិ ដែលត្រូវបានប្រើប្រាស់ ដើម្បីធានាយន្តការនៃការជួញដូរ និងការការពារវិនិយោគិនតម្លាភាពឱ្យប្រកបដោយតម្លាភាព។
ក្នុងនាមជាវាគ្មិនកិត្តិយស លោក Lawrence Kook អភិបាលនៃក្រុមហ៊ុនខេមបូឌាន ដេរីវ៉េទីវ អ៊ិចឆេង បានសម្តែងភាពសប្បាយរីករាយ ក្នុងការចូលរួមក្នុងសិក្ខាសាលាតាមបណ្ដាខេត្ត ប្រចាំឆ្នាំ 2018 ជាមួយគណៈកម្មការមូលបត្រកម្ពុជា ហើយបានលើកឡើងថា ការលើកកម្ពស់ការយល់ដឹង និងការចែករំលែកចំណេះដឹងនៃការជួញដូរឧបករណ៍ហិរញ្ញវត្ថុឱ្យទូលំទូលាយ គឺជាកាតព្វកិច្ចមួយរបស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង។ លោក Lawrence បានបន្តសង្កត់ធ្ងន់ លើសារៈសំខាន់នៃការវាយតម្លៃខ្លួនឯង និងការអនុវត្តយុទ្ធសាស្ត្រសមស្របសម្រាប់វិនិយោគិននីមួយៗ ក៏ដូចជារបៀបទាញយកផលវិជ្ជមានពីការវិនិយោគ។ ក្រៅពីការចូលរួមក្នុងសិក្ខាសាលាតាមបណ្ដាខេត្ត នៅខេត្តបួនផ្សេងទៀតនាដើមខែធ្នូខាងមុខនេះ លោក Lawrence ក៏បានប្រកាសពីការប្តេជ្ញាចិត្តរបស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង ក្នុងការបង្ហាញខ្លួន នៅព្រឹត្តិការណ៍នានា របស់គណៈកម្មការមូលបត្រកម្ពុជា នៅឆ្នាំខាងមុខៗទៀត។
សិក្ខាសាលានៅខេត្តព្រះសីហនុនេះ បានបញ្ចប់ទៅដោយលទ្ធផលជោគជ័យ មិនត្រឹមដោយសារតែវត្តមានរបស់សិក្ខាកាមជាច្រើនរូបប៉ុណ្ណោះទេ ប៉ុន្តែក៏ដោយសារគុណភាព នៃការយល់ដឹងរបស់ពួកគេ ទៅលើខ្លឹមសារផងដែរ។ ស្របជាមួយគ្នានេះ មានសិក្ខាកាមមួយភាគធំ បានស្នើសុំឱ្យមានកិច្ចប្រជុំឯកជន និងជាក្រុមតូចៗ ដែលការណ៌នេះបានបង្ហាញពីការកើនឡើងនៃការយល់ដឹង ក៏ដូចជាការចាប់អារម្មណ៍ លើការវិនិយោគលើឧបករណ៍និស្សន្ទ៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
