កីឡាជាតិ
ជាតិ
កីឡាករ សុខ ធី រងពិន័យមិនឲ្យឡើងសង្វៀន ក្នុងនិងក្រៅប្រទេសរយៈពេល៦ខែ លោក សាន សៅយ៉ាន់ (ខាងឆ្វេង)ថតជាមួយកីឡាករ សុខ ធី
× កីឡាករ សុខ ធី មកពីក្លិបសៅយ៉ាន់នាគា ត្រូវបានសហព័ន្ធកីឡាប្រដាល់គុនខ្មែរ ពិន័យមិនឲ្យឡើងសង្វៀនប្រកួតទាំងក្នុង និងក្រៅប្រទេសរយៈ៦ខែ ពាក់ព័ន្ធរឿងតវ៉ាលទ្ធផលប្រកួតកាលពីពេលកន្លងទៅ។ ជាមួយគ្នានេះ សហព័ន្ធបានពិន័យលោក សាន សៅយ៉ាន់ គ្រូបង្វឹករបស់កីឡាករ សុខ ធី ដោយផ្អាកការងារពីមន្ត្រីអាជ្ញាកណ្តាល ចៅក្រម រយៈពេល៦ខែផងដែរ។
ទស្សនិកជន ពិសេសអ្នកគាំទ្រវិស័យកីឡាប្រដាល់គុនខ្មែរ នឹងខកខានឃើញកីឡាករ សុខ ធី លើសង្វៀនប្រដាល់គុនខ្មែរ និងសង្វៀនប្រដាល់ក្រៅប្រទេសរហូតជិតពាក់កណ្តាលឆ្នាំ២០១៩។ ការខកខាននេះ បន្ទាប់ពីរូបគេ ត្រូវបានសហព័ន្ធកីឡាប្រដាល់គុនខ្មែរចេញសេចក្តីសម្រេច ពិន័យមិនឲ្យឡើងសង្វៀនប្រកួតទាំងក្នុង និងក្រៅប្រទេសរយៈពេល៦ខែ។
ការពិន័យខាងលើ ធ្វើឡើងក្រោយ សុខ ធី ដាក់ពាក្យសុំតវ៉ាពាក់រឿងលទ្ធផល ដែលចៅក្រុមកាត់ក្តីឲ្យរូបគេចាញ់កីឡាករថៃ ធ្នូ សិកឡេក ដោយពិន្ទុមិនឯកច្ឆន្ទក្នុងការប្រកួតវគ្គជម្រុះដណ្តើមខ្សែក្រវាត់ ISI Palm របស់ស្ថានីយទូរទស្សន៍ CNC កាលពីថ្ងៃទី២៨ ខែតុលា ឆ្នាំ២០១៨។ ជាលទ្ធផលក្រោយការតវ៉ា សុខ ធី ត្រូវបានសហព័ន្ធ បន្តឲ្យចាញ់កីឡាករថៃដដែល។ ភ្លាមៗនោះ រូបគេត្រូវបានស្ថានីយទូរទស្សន៍ CNC ដកចេញពីបេក្ខភាពប្រកួតខ្សែក្រវាត់នេះតែម្តង។
កីឡាករ សុខ ធី (ក្រហម)ត្រូវបានចៅក្រមកាត់ក្តីឲ្យចាញ់កីឡាករ ធ្នូ សិកឡេក
ជាមួយគ្នានេះ លោក សាន សៅយ៉ាន់ ម្ចាស់ក្លិបប្រដាល់សៅយ៉ាន់នាគា ដែលសកម្មក្នុងការតវ៉ាពាក់ព័ន្ធនឹងលទ្ធផលខាងលើ ក៏ត្រូវបានសហព័ន្ធពិន័យផ្អាកការងារពីមន្ត្រីអាជ្ញាកណ្តាល ចៅក្រម រយៈពេល៦ខែផងដែរ។ មុនសហព័ន្ធចេញសេចក្តីសម្រេចនេះ លោក សៅយ៉ាន់ ដែលបរាជ័យក្នុងការតវ៉ា បានប្រកាសក្នុងហ្វេសប៊ុកសុំលាឈប់ពីអាជីពមន្ត្រីអាជ្ញាកណ្តាល ចៅក្រម តាំងពីសហព័ន្ធចេញសេចក្តីលើកដំបូងមកម្ល៉េះ។
សេចក្តីសម្រេច ដែលចុះហត្ថលេខាដោយលោក វ៉ា ស៊ិនភីរម្យ ប្រធានក្រុមប្រឹក្សាវិន័យ កាលពីថ្ងៃទី២៧ ខែវិច្ឆិកា មិនបានទុកពេលឲ្យភាគីជាប់ពិន័យខាងលើ ដើម្បីដាក់បណ្តឹងឧទ្ធរណ៍នោះឡើយ៕
Tag:
ប្រដាល់គុនខ្មែរ
សុខ ធី
សាន សៅយ៉ាន់
© រក្សាសិទ្ធិដោយ thmeythmey.com