អន្តរជាតិ
មហាធៀ ក្រើនរម្លឹកសមាជិករដ្ឋាភិបាល៖«អំណាចផ្តល់ឲ្យគឺដើម្បីបម្រើជាតិ មិនមែនប្រយោជន៍ផ្ទាល់ខ្លួនទេ»
× នាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅថ្ងៃចន្ទទី ៣ ខែធ្នូនេះ បានក្រើនរម្លឹកសមាជិករដ្ឋាភិបាលថា អំណាចដែលត្រូវបានផ្តល់ទៅឲ្យពួកគេ គឺត្រូវយកទៅប្រើប្រាស់ដើម្បីអនុវត្តកាតព្វកិច្ចសម្រាប់ផលប្រយោជន៍ជាតិ ពុំមែនសម្រាប់បម្រើផលប្រយោជន៍ផ្ទាល់ខ្លួនឡើយ។
ថ្លែងទៅកាន់កិច្ចប្រជុំប្រចាំខែ ជាមួយសមាជិកគណៈរដ្ឋមន្ត្រីនៅថ្ងៃចន្ទ លោក មហាធៀ បានគូសបញ្ជាក់ថា ប្រសិនមានការរំលោភអំណាចនោះ ប្រទេសជាតិមិនអាចដើរទៅមុខបានល្អឡើយ។ ម្យ៉ាងទៀត វាក៏ធ្វើឲ្យសីលធម៌ក្នុងសង្គមធ្លាក់ចុះថែមទៀតផង។
ត្រង់នេះ មេដឹកនាំវ័យ៩៣ឆ្នាំរូបនេះ បានពន្យល់ដូច្នេះថា៖ «អ៊ីចឹងហើយបានជា យើងត្រូវមានការប្រយ័ត្នប្រយែងខ្ពស់ នៅពេលយើងប្រើប្រាស់អំណាច ដើម្បីធ្វើរឿងអ្វីមួយនោះ។ ប្រសិនយើងដឹងថាអំណាចនោះអាចបង្កជាការខូចខាតដល់ប្រទេសយើង យើងពុំគួរប្រើប្រាស់វាឡើយ។ អ្វីដែលប្រសើរបំផុតនោះគឺ យើងត្រូវពិភាក្សា និងទទួលយកយោបល់ជុំវិញរបៀបនៃការប្រើប្រាស់អំណាចទាំងនេះ»។
ទីភ្នាក់ងារព័ត៌មានរដ្ឋម៉ាឡេស៊ី Bernama ផ្សាយថា លោក មហាធៀ ក៏បានទទូចឲ្យសមាជិកគណៈរដ្ឋមន្ត្រីលោក ស្វែងយល់ឲ្យបានច្បាស់ពីគោលបំណងនៃការបង្កើតរដ្ឋាភិបាលផងដែរ ដើម្បីធានាឲ្យបានថា ប្រទេសនឹងដំណើរការទៅមុខបានយ៉ាងរលូន។
ទន្ទឹមនឹងនេះ លោក មហាធៀ បានគូសបញ្ជាក់បន្ថែមទៀតថា នៅពេលប្រទេសជាតិមានសន្តិភាព និងសុខដុមរមនាហើយនោះ ទ្រព្យសម្បត្តិរបស់ជាតិអាចនឹងត្រូវផ្តល់យ៉ាងស្មើភាព ដើម្បីកាត់បន្ថយគម្លាតរវាងជីវភាពតំបន់ជនបទ និងទីក្រុង។ ត្រង់នេះ លោកបានបន្តថា ដើម្បីសម្រេចវាបាន ម៉ាឡេស៊ីត្រូវការអភិបាលកិច្ចល្អ ដោយពុំមានអំពើពុករលួយ និងហេតុការណ៍នានាដែលបង្កជាភាពចលាចល និងវិវាទខាងជាតិសាសន៍ផ្សេងៗ។
ជាចុងក្រោយ លោក មហាធៀ និយាយថា លោកមានទំនុកចិត្តចំពោះ សមាជិករដ្ឋាភិបាលរបស់លោកទាំងអស់ ដោយពួកគេមិនត្រឹមតែដឹងពីតួនាទីរបស់ខ្លួនប៉ុណ្ណោះទេ ហើយថែមទាំងដឹងពីតម្រូវការរបស់ប្រទេសជាតិថែមទៀតផង៕
Tag:
ម៉ាឡេស៊ី
មហាធៀ មហាម៉ាត់
© រក្សាសិទ្ធិដោយ thmeythmey.com