អន្តរជាតិ
លោកត្រាំនឹងសម្រេចបំណងលោកគីម ជុងអ៊ុន បើសិនការរំសាយអាវុធនុយក្លេអ៊ែរទទួលជោគជ័យ ជំនួបប្រវត្តិសាស្ត្ររវាងមេដឹកនាំទាំងពីរនៅសិង្ហបុរីកាលពីថ្ងៃទី១២ ខែមិថុនា ឆ្នាំ២០១៨។រូបថត AFP
× ប្រធានាធិបតីសហរដ្ឋអាមេរិក ដូណាល់ ត្រាំ នឹងបំពេញបំណងរបស់មេដឹកនាំកូរ៉េខាងជើង គីម ជុងអ៊ុន ប្រសិនបើលោកសម្រេចបាននូវការរំសាយអាវុធនុយក្លេអ៊ែរបានជោគជ័យនោះ។ នេះជាសម្តីរបស់ប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី ០២ ខែធ្នូ។
ស្របពេលមន្ត្រីអាមេរិក និងកូរ៉េខាងជើង កំពុងដុតដៃដុតជើង ត្រៀមរៀបចំជំនួបកំពូលជុំទីពីររវាងលោកត្រាំ និងលោក គីម ប្រធានាធិបតីកូរ៉េខាងត្បូង បានពាំនាំសារមួយរបស់លោកដូណាល់ ត្រាំទៅកាន់លោកគីម ជុងអ៊ុន។
ថ្លែងទៅកាន់ទីភ្នាក់ងារព័ត៌មានកូរ៉េខាងត្បូង Yonhap ខណៈកំពុងធ្វើដំណើរទៅកាន់នូវែលសេឡង់ លោក មូន ចេអ៊ីននិយាយដូច្នេះថា៖ «សាររបស់ប្រធានាធិបតី [ដូណាល់] ត្រាំ បង្ហាញការយល់ឃើញដ៏រាក់ទាក់បំផុតចំពោះលោក គីម ហើយលោកពេញចិត្តលោកគីម ជុងអ៊ុន។ ដូច្នេះហើយ លោកសង្ឃឹមថា លោក គីម នឹងអនុវត្តកិច្ចព្រមព្រៀង [រំសាយអាវុធនុយក្លេអ៊ែរ] ទាំងអស់ ហើយលោកត្រាំ នឹងជួយឲ្យបំណងរបស់លោក គីម ជុងអ៊ុយ ក្លាយជាការពិត»។
ថ្លែងនៅរដ្ឋធានី ប៊ុយណូស៊ែ ទីដែលលោកបានពិភាក្សាស្ថានភាពជុំវិញបញ្ហានុយក្លេអ៊ែរក្នុងឧបទ្វីបកូរ៉េជាមួយ លោក មូន លោក ត្រាំ បាននិយាយថា លោកសង្ឃឹមនឹងរៀបចំកិច្ចប្រជុំថ្មីមួយជាមួយលោក គីម ជុងអ៊ុន នៅដើមឆ្នាំ២០១៩ខាងមុខ។ បើតាមទីភ្នាក់ងារព័ត៌មាន AFP លោក ត្រាំ ថ្លែងបែបនេះ៖ «យើងចុះសម្រុងគ្នាយ៉ាងល្អ។ យើងមានទំនាក់ទំនងល្អមួយជាមួយគ្នា»។
នៅពេលចោទសួរកាលពីថ្ងៃ ០១ ខែធ្នូ ប្រសិនបើលោកនឹងធ្វើរៀបចំជំនួបជាមួយមេដឹកនាំកូរ៉េខាងជើងក្នុងសហរដ្ឋអាមេរិក លោក ត្រាំ បានឆ្លើយតបថា៖ «វាអាចទៅរួច»។
ឲ្យពិតទៅ លោកដូណាល់ ត្រាំ និង លោក គីម ជុងអ៊ុន បានរៀបចំកិច្ចប្រជុំជាប្រវត្តិសាស្ត្រមួយ កាលពីខែមិថុនាកន្លងទៅ។ ក្នុងជំនួបកំពូលនេះ មេដឹកនាំទាំងពីរ បានសម្រេចចុះកិច្ចព្រមព្រៀងជាមួយគ្នាដើម្បីធ្វើការឆ្ពោះទៅរកការរំសាយអាវុធនុយក្លេអ៊ែរ នៅឧបទ្វីបកូរ៉េ។ យ៉ាងណាមិញ គេមើលឃើញថា ដំណើរការនៃការរំសាយអាវុធនុយក្លេអ៊ែរជារឿងចម្រូងចម្រាសនិងចំណាយពេលវេលាយូរ ខណៈប្រទេសទាំងពីរចោទគ្នាទៅវិញទៅមកទាក់ទងនឹងបញ្ហានៃការអនុវត្តកិច្ចព្រមព្រៀងនេះផងដែរ៕
Tag:
កូរ៉េខាងជើង
សហរដ្ឋអាមេរិក
ដូណាល់ត្រាំ
គីម ជុងអ៊ុន
មូន ចេអ៊ីន
© រក្សាសិទ្ធិដោយ thmeythmey.com