រាជធានីភ្នំពេញ៖ Grundfos គឺជាក្រុមហ៊ុនដែលបានចូលរួមក្នុងការអភិវឌ្ឍ,ការផលិត,ការលក់ និងបម្រើសេវាកម្មផ្នែកម៉ាស៊ីនបូមទឹក ឈានមុខគេក្នុងពិភពលោក បានដោះដូរ «លិខិតបង្ហាញពីចេតនា» ជាមួយក្រសួងឧស្សាហកម្ម និងសិប្បកម្មកម្ពុជា កាលពីថ្ងៃទី៣ ខែធ្នូ ដើម្បីពង្រឹងកិច្ចសហប្រតិបត្តិការលើការគ្រប់គ្រងទឹកស្អាតនៅកម្ពុជា។«លិខិតបង្ហាញពីចេតនា» មានគោលបំណងកាត់បន្ថយថ្លៃទឹក និងបង្កើនលទ្ធភាពទទួលបានទឹកស្អាត និងមានគុណភាព នៅក្នុងប្រទេស។
លោក ចម ប្រសិទ្ធ ទេសរដ្ឋមន្ត្រីរដ្ឋមន្ត្រីក្រសួងឧស្សាហកម្ម និងសិប្បកម្ម និង លោក Leong Chee Khuan នាយកគ្រប់គ្រងក្រុមហ៊ុន Grundfos ប្រចាំតំបន់អាស៊ីខាងត្បូង បានបញ្ជាក់ថា«លិខិតបង្ហាញពីចេតនា»នេះ នឹងបង្ហាញពីការគាំទ្ររបស់រាជរដ្ឋាភិបាលកម្ពុជា ក្នុងការស្វាគមន៍ ក៏ដូចជាទទួលយក នូវបច្ចេកទេស និងគំរូអាជីវកម្មថ្មីៗបំផុតរបស់ក្រុមហ៊ុន ដើម្បីកាត់បន្ថយលើការបាត់បង់ទឹក ដែលមិនទទួលបានចំណូល និងបង្កើនប្រសិទ្ធភាពគ្រប់គ្រងទឹកស្អាត។
បញ្ហាប្រឈមធំបំផុតមួយសម្រាប់ប្រទេសកម្ពុជា ក្នុងការគ្រប់គ្រងទឹកស្អាត គឺហេដ្ឋារចនាសម្ព័ន្ធទឹករបស់ខ្លួន ដែលងាយលេចធ្លាយ និងសម្ពាធជំរុញទឹកពុំគ្រប់គ្រាន់ នៅពេលត្រូវផ្គត់ផ្គង់ទៅតាមទីក្រុង និងខេត្តនានានៅអំឡុងម៉ោងដែលមានមនុស្សប្រើប្រាស់ទឹកច្រើនក្នុងពេលតែមួយ។ បញ្ហានេះ នាំឲ្យមានការខាតបង់រហូតដល់៤០ភាគរយ លើការបាត់បង់ទឹកដែលមិនទទួលបានចំណូល (Non-Revenue Water) ឬទឹកដែលបាត់បង់ ឬមិនត្រូវបានកត់ត្រារាប់បញ្ចូលក្នុងប្រព័ន្ធផ្គត់ផ្គង់។
លោក ចម ប្រសិទ្ឋ រដ្ឋមន្ត្រីក្រសួងឧស្សាហកម្ម និងសិប្បកម្ម បានមានប្រសាសន៍ថា ស្របពេលដែលសេដ្ឋកិច្ចកម្ពុជាលូតលាស់យ៉ាងលឿន កំណើនតម្រូវការទឹកស្អាតក៏កើនឡើងដែរ។ បើតាមការរំពឹងទុក តម្រូវការទឹកប្រើប្រាស់ នឹងកើនដល់០.៨លាន ម៉ែត្រគូបក្នុងមួយថ្ងៃ នៅឆ្នាំ២០២៥ ហើយនឹងកើនឡើងដល់ ១លានម៉ែត្រគូបក្នុងមួយថ្ងៃ នៅឆ្នាំ២០៣០ ដែលបញ្ហានេះ នឹងដាក់សម្ពាធបន្ថែមទៀត ទៅលើស្ថាប័នផ្គត់ផ្គង់ទឹក ក្នុងការផ្គត់ផ្គង់ទឹកឲ្យមានប្រសិទ្ធភាព និងគួរឲ្យជឿជាក់បាន។ លោករដ្ឋមន្ត្រីបន្តបញ្ជាក់ដូច្នេះ៖«យើងមានសេចក្ដីរីករាយណាស់ ក្នុងការចាប់ដៃគូជាមួយក្រុមហ៊ុនឈានមុខគេ ផ្នែកឧស្សាហកម្មនេះ ដូចជាក្រុមហ៊ុន Grundfosនេះជាដើម ដើម្បីបង្កើនលទ្ធភាពទទួលបានទឹកស្អាត និងមានគុណភាពនៅកម្ពុជា។ យើងជឿជាក់ថាបច្ចេកវិទ្យា និងដំណោះស្រាយប្រកបដោយនវានុវត្តន៍ពីក្រុមហ៊ុន Grundfos នឹងមានអំណោយផលច្រើន ដល់ប្រព័ន្ធគ្រប់គ្រងទឹកនៅកម្ពុជា»។
លោក Leong Chee Khuan តំណាងក្រុមហ៊ុន Grundfos បានគូសបញ្ជាក់ពីការប្តេជ្ញាចិត្តរបស់ខ្លួនក្នុងការជួយពង្រឹងគុណភាព ភាពអាចជឿជាក់បាន និងនិរន្តរភាពនៃការផ្គត់ផ្គង់ទឹករបស់ខ្លួននៅកម្ពុជា។ លោក Leong Chee Khuan បញ្ជាក់យ៉ាងដូច្នេះថា៖«យើងមានសេចក្ដីសោមនស្សរីករាយណាស់ ក្នុងការធ្វើការជាមួយរាជរដ្ឋាភិបាលកម្ពុជា សម្រាប់បេសកកម្មរបស់ខ្លួន ក្នុងការសម្រេចឲ្យបាននូវសន្តិសុខទឹកស្អាតកាន់តែរឹងមាំថែមទៀត តាមរយៈការប្រើប្រាស់នវានុវត្តន៍ផ្នែកឧស្សាហកម្មឈានមុខគេរបស់ក្រុមហ៊ុនយើង»។
ដើម្បីដោះស្រាយបញ្ហាទឹកស្អាតនៅកម្ពុជា ក្រុមហ៊ុន Grundfos បានដាក់ចេញនូវគម្រោងសាកល្បងមួយនៅក្នុងខេត្តតាកែវ ដោយប្រើប្រាស់ដំណោះស្រាយតាមវិធីសាស្ត្រ «ចែកចាយតាមកម្រិតតម្រូវការ - Demand Driven Distribution»។ នេះជាប្រព័ន្ធចែកចាយទឹកស្អាតដ៏ឆ្លាតវៃ ដែលកែសម្រួលលំហូរទឹកដោយស្វ័យប្រវត្តិ ដោយប្រើប្រាស់ឧបករណ៍តាមដានសំពាធនៅក្នុងបណ្តាញពីចម្ងាយ ហើយវាបានជួយកាត់បន្ថយសម្ពាធទឹកលើសលប់នៅក្នុងបំពង់ទុយោទឹក។ ធ្វើដូច្នេះ ជួយកាត់បន្ថយការលេចធ្លាយទុយោទឹក និងការបាត់បង់ទឹកដែលនាំឲ្យកាត់បន្ថយការចំណាយ និងថាមពល។ ការប្រើប្រាស់ជាតិគីមី ក៏ត្រូវបានកាត់បន្ថយបានច្រើនដែរ ព្រោះនឹងមានការកត់ត្រាទិន្នន័យព័ត៌មានបានកាន់តែច្បាស់លាស់ ច្រើនជាងមុន ដើម្បីធានាដល់ការប្រើប្រាស់ថ្នាំ ឲ្យមានភាពកម្រិតត្រឹមត្រូវ ដែលកត្តាទាំងនេះ នឹងជួយកាត់បន្ថយការចំណាយទៅតាមនោះដែរ។
ដើម្បីជំរុញឲ្យមានការទទួលយកបច្ចេកវិទ្យាថ្មីនេះទៅប្រើប្រាស់ ក្រុមហ៊ុន Grundfos បានបង្កើតគំរូអាជីវកម្មថ្មីសន្លាង ដើម្បីលុបបំបាត់នូវឧបសគ្គ ដែលតែងតែកើតមាន ក្នុងការវិនិយោគទុន។ រោងចក្រធ្វើប្រតិបត្តិការផលិតទឹកស្អាត នឹងត្រូវទូទាត់ប្រាក់ សម្រាប់ប្រព័ន្ធម៉ាស៊ីនបូមទឹកថ្មី តាមរយៈការបង់រំលស់ប្រចាំឆ្នាំ ដែលនឹងទទួលបានមកពីការសន្សំពីការចំណាយលើថាមពល និងទឹក។ ការសន្សំនេះ អាចធ្វើទៅបានតាមរយៈការកែលម្អ និងផ្លាស់ប្តូរ ប្រព័ន្ធដោយក្រុមហ៊ុន Grundfos ។
ផ្នែកមួយនៃគម្រោងនេះដែរ រោងចក្រធ្វើប្រតិបត្តិការផលិតទឹកស្អាត អាចតាមដានមើលប្រាក់សន្សំរបស់ខ្លួន តាមរយៈប្រព័ន្ធគ្រប់គ្រងពីចម្ងាយ របស់ក្រុមហ៊ុន Grundfos ដែលជាប្រព័ន្ធតាមដាន គ្រប់គ្រង និងធ្វើរបាយការណ៍ពីចម្ងាយ តាមប្រព័ន្ធអ៊ីនធឺណិត សម្រាប់ការដំឡើងម៉ាស៊ីនបូមទឹក។
យុទ្ធសាស្ត្រនៃការអនុវត្តដំណោះស្រាយបែបនវានុវត្តន៍ ព្រមជាមួយនឹងគំរូអាជីវកម្មថ្មីនេះ បានជួយរោងចក្រ សន្សំថាមពលបានជាង ២៧០.០០០គីឡូវ៉ាត់ម៉ោង ហើយសន្សំទឹកបានប្រហែល ២០០.០០០ម៉ែត្រគូប ក្នុងមួយឆ្នាំ ជាមួយនឹងគម្រោងនៃការសងរំលស់ រយៈពេលប្រាំឆ្នាំ តែប្រតិបត្តិក រមានលទ្ធភាពបង់ផ្តាច់ ក្នុងរយៈពេលពីរឆ្នាំកន្លះប៉ុណ្ណោះ ប្រសិនបើយកប្រាក់ដែលសន្សំបានប្រចាំឆ្នាំទាំងអស់ សងជូនក្រុមហ៊ុន Grundfos ។
លោក Leong Chee Khuan តំណាងក្រុមហ៊ុន Grundfos មានប្រសាសន៍ទៀតថា៖«គម្រោងរបស់យើងនៅខេត្តតាកែវ បានបង្ហាញឲ្យយើងថា គម្រោងអាជីវកម្មថ្មីរបស់យើង មានសក្ដានុពលខ្ពស់ នៅក្នុងប្រទេសកម្ពុជា និងបណ្ដាប្រទេសផ្សេងទៀត ដែលអាជ្ញាធរ ឬប្រតិបត្តិករទទួលបន្ទុកផ្គត់ផ្គង់ទឹកស្អាត មិនគួរត្រូវបានរារាំងដោយសារកត្តាហិរញ្ញវត្ថុទៀតឡើយ នៅពេលត្រូវវិនិយោគលើបច្ចេកវិទ្យាថ្មី និងមានប្រសិទ្ធភាពបែបនេះ។ ភាពជោគជ័យនៃគម្រោងសាកល្បងនេះ ពិតជារឿងគួរឲ្យពេញចិត្ត ហើយយើងរំពឹងថា នឹងដាក់ឲ្យអនុវត្តនូវវិធីសាស្ត្រនេះ នៅតាមបណ្ដាខេត្តផ្សេងទៀត នៅក្នុងប្រទេសកម្ពុជា។ យើងជឿជាក់ថា គំរូអាជីវកម្មនេះ នឹងបើកទ្វារឲ្យមានការប្រើប្រាស់នូវដំណោះស្រាយរបស់យើង ដើម្បីកែលម្អដល់ការងារផ្គត់ផ្គង់ទឹកនៅកម្ពុជា»៕
(អត្ថបទពាណិជ្ជកម្ម)