បន្ទាប់ពីសម្រេចបានបទឈប់បាញ់ក្នុងសង្គ្រាមពាណិជ្ជកម្មជាមួយអាមេរិក ៩០ថ្ងៃនៅក្នុងជំនួបទល់មុខមួយនាក្រុងប៊ុយណូស៊ែ រដ្ឋធានីរបស់អាហ្សង់ទីន ប្រធានាធិបតីចិនលោក ស៊ី ជិនភីង បានបន្តដំណើរមកទស្សនកិច្ចនៅប៉ាណាម៉ាទៀត។ វត្តមានមេដឹកនាំចិនជាលើកដំបូងនៅរដ្ឋអាមេរិកឡាទីននេះ ធ្វើឡើងគោលបំណងពង្រឹងទំនាក់ទំនងការទូតទ្វេភាគីផង និងពង្រឹងឥទ្ធិពលរបស់ចិនក្នុងតំបន់ផង។
លោក ស៊ី ជិនភីង បានអញ្ជើញមកដល់ប្រទេសប៉ាណានៅយប់ថ្ងៃអាទិត្យទៅហើយ ហើយវាក៏ជាដំណើរទស្សនកិច្ចជាលើកដំបូងនៅប៉ាណាម៉ារបស់ប្រមុខរដ្ឋចិនផង ចាប់ពីរដ្ឋអាមេរិកមួយនេះបោះបង់ចោលតៃវ៉ាន់កាលពីឆ្នាំមុននោះ។
យោងតាមទីភ្នាក់ងារព័ត៌មាន AFP លោក ស៊ី បានទទួលស្វាគមន៍យ៉ាងកក់ក្តៅពីសមភាគីប៉ាណាម៉ាលោក Juan Carlos Varela។ ក្នុងជំនួបទ្វេភាគីមេដឹកនាំទាំងពីរបានឯកភាពគ្នាពង្រឹងទំនាក់ទំនងនយោបាយ និងសេដ្ឋកិច្ចឲ្យបានខ្លាំងក្លាផងដែរ។
ក្នុងគោលដៅសាទរចំណងមិត្តភាពជាមួយប៉ាណាម៉ា ប្រមុខរដ្ឋចិនលោក ស៊ី បានសរសេរបទវិចារណកថាមួយចុះផ្សាយនៅលើសារព័ត៌មានប៉ាណាម៉ា Estrella de Panama ដោយលោកថ្លែងថា លោកមានក្តីរំពឹងខ្ពស់ចំពោះទស្សនកិច្ចលើកដំបូងដោយមេដឹកនាំចិននេះ។
លោកសរសេរដូច្នេះ៖«ទំនាក់ទំនងទ្វេភាគីរវាងប្រទេសយើងចាប់ផ្តើមឡើងដោយភាពរឹងមាំថ្វីបើមានវ័យ មួយឆ្នាំកន្លះក៏ដោយ។យើងត្រូវពង្រឹងភាពជាដៃគូដែលអាចធានាបាននូវការចែករម្លែកផលប្រយោជន៍ស្មើគ្នាដែរ»។
ក្រោយកិច្ចពិភាក្សា លោក ស៊ី និងលោក Varela ក៏បានសម្រេចចុះកិច្ចព្រមព្រៀងសហប្រតិបត្តិចំនួន ១៩ ផ្សេងគ្នា ហើយកិច្ចព្រមព្រៀងទាំងនោះផ្តោតលើពាណិជ្ជកម្ម ហេដ្ឋារចនាសម្ព័ន្ធ ធនាគារ ទេសចរណ៍ អប់រំ និងការអភិវឌ្ឍផ្សេងទៀតដែរ។ ស្របពេលជាមួយគ្នានោះ ប៉ាណាម៉ានេះក៏បានក្លាយជារដ្ឋអាមេរិកឡាទីនដំបូងគេក្នុងតំបន់ដែលជ្រើសរើសផ្លូវចូលរួមជាមួយគម្រោងហេដ្ឋារចនាសម្ព័ន្ធរបស់ចិន«ខ្សែក្រវាត់មួយវិថីមួយ» ផង។ មិនត្រឹមតែប៉ុណ្ណោះទេ ចិន និងប៉ាណាម៉ាក៏ឯកភាពគ្នាចរចាកិច្ចព្រមព្រៀងពាណិជ្ជកម្មសេរីផងដែរដើម្បីធានាប្រយោជន៍ពាណិជ្ជកម្មយូរអង្វែងទៅមុខផង។
មេដឹកនាំបាណាម៉ាលោក Varela ព្យាយាមវាយតម្លៃខ្ពស់ចំពោះវត្តមានមេដឹកនាំចិនទីមួយក្នុងទឹកដីរបស់ខ្លួន បន្ទាប់ពីខ្លួនដោះដៃចោលកោះតៃវ៉ាន់ដែលធ្លាប់ជាកល្យាណមិត្តប៉ុន្តែមិនសូវមានលុយគ្រាក់ៗដូចចិន។ លោកអះអាងពេញមាត់ថា ទស្សនកិច្ចរបស់លោក ស៊ី មិនត្រឹមតែនាំទុនវិនិយោគចូលមកប៉ាណាម៉ាទេ ប៉ុន្តែវានឹងប្រែក្លាយប៉ាណាម៉ាជាច្រកទ្វារសម្រាប់ចិនទៅកាន់តំបន់អាមេរិកឡាទីនផង។ រឿងដែលមិនអាចប្រកែកបាននោះគឺ ការចូលរួមរបស់ប៉ាណាម៉ាក្នុងគម្រោងហេដ្ឋារចនាសម្ព័ន្ធ ខ្សែក្រវាត់មួយវិថីមួយ ចិននឹងមានលទ្ធភាពកាន់តែខ្ពស់ក្នុងការបង្កើនឥទ្ធិពលរបស់ខ្លួនបន្ថែមទៀតក្នុងតំបន់ទាំងមូលផង។
សម្រាប់ចិន ទីតាំងភូមិសាស្ត្ររបស់ប៉ាណាម៉ា ជារឿងយុទ្ធសាស្ត្រ និងអាចជាមជ្ឈមណ្ឌលដែលបម្រើឲ្យសកម្មភាពពាណិជ្ជកម្មនៅក្នុងតំបន់អាមេរិកឡាទីន និងការ៉ាអ៊ីបផង។ ស្ថិរភាពសេដ្ឋកិច្ច ស្ថិរភាពនយោបាយ និងព្រែកជីកប៉ាណាម៉ាជាឧទាហរណ៍ស្រាប់។ ដូច្នេះហើយ ចិនមានបំណងចង់ពង្រឹងទំនាក់ទំនងជាមួយប៉ាណាម៉ានេះដើម្បីជាស្ពានក្នុងចូលរួមចំណែកអភិវឌ្ឍតំបន់ផង និងពង្រីកឥទ្ធិពលរបស់ខ្លួនផងក្នុងនាមជាមហាអំណាចពិភពលោកមួយ។
ប៉ុន្តែវត្តមានចិន និងការកើនឡើងនៃឥទ្ធិពលរបស់មហាអំណាចអាស៊ីមួយនេះមិនមែនជារឿងដែលក្រុងវ៉ាស៊ីនតោនសប្បាយចិត្តឡើយ។ រដ្ឋបាលអាមេរិកធ្លាប់ព្រមានច្រើនដងដែរពីការពង្រីកឥទ្ធិពលរបស់ចិនដល់ដែនឥទ្ធិពលរបស់ខ្លួននាពេលបច្ចុប្បន្ន។ ក្នុងពេលទស្សនកិច្ចនៅប៉ាណាម៉ាកាលពីខែមុន រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានព្រមានរដ្ឋាភិបាលប៉ាណាម៉ាពីផលលំបាកដែលអាចកើតមានព្រោះឥទ្ធិពលចិនសាយភាយពាសពេញតំបន់នោះ៕