មហោស្រពពិព័រណ៍វិទ្យាសាស្ត្រកម្ពុជា ប្រចាំឆ្នាំ លើកទី១៤ បានប្រព្រឹត្ត ទៅ ដោយ ជោគជ័យ។ ទន្ទឹម នឹងដំណើរវិវត្តន៍ នៃមុខវិជ្ជាស្ទែម ដែលគ្របដណ្ដប់លើរាល់ទិដ្ឋភាព នៃការរស់នៅប្រចាំថ្ងៃ សិស្ស-និស្សិតកម្ពុជា កំពុងបន្តប្រឹងប្រែង និងសិក្សាប្រធានបទនានា និងមុខវិជ្ជាដ៏សំខាន់ទាំងនេះ។
មហោស្រពពិព័រណ៍វិទ្យាសាស្ត្រកម្ពុជា ប្រចាំឆ្នាំលើកទី១៤ បានប្រព្រឹត្តទៅ នៅថ្ងៃសុក្រ ទី៣០ ខែវិច្ឆិកា និងថ្ងៃសៅរ៍ ទី ១ ខែធ្នូ ឆ្នាំ២០១៨ នៅមជ្ឈមណ្ឌលសន្និបាត និងពិព័រណ៍កោះពេជ្រ ស្របតាមលក្ខណៈនៃ «ពិព័រណ៍វិទ្យាសាស្ត្រ»ទូទៅ និងច្របាច់បញ្ចូលនូវធាតុផ្សំ នៃមុខវិជ្ជាស្ទែម ដែលរួមមានវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ក្នុងគោលបំណងផ្ដល់ នូវថ្នាលអប់រំមួយ បែបដ៏ល្អប្លែក យ៉ាង ពិតប្រាកដ ជូនដល់ភ្ញៀវដែលបានចូលរួមទស្សនាទាំងអស់។
គួរបញ្ជាក់ថា ពិធីបើកទំព័រកម្មវិធីពិព័រណ៍វិទ្យាសាស្ត្រនេះត្រូវបានចូលរួម ក្រោមអធិបតីភាព ដ៏ខ្ពង់ខ្ពស់ របស់ លោកស្រី គឹម សេដ្ឋានី រដ្ឋលេខាធិការ ក្រសួងអប់រំ យុវជន និងកីឡា និងដោយបានថ្លែងពីសេចក្ដីរំភើប ទាក់ទងនឹងសារៈសំខាន់ នៃពិព័រណ៍នេះ ក្នុងការជួយឱ្យសិស្ស-និស្សិត ស្វែងយល់ និងទទួលបានបទពិសោធន៍ជាក់ស្ដែង តាមរយៈការធ្វើពិសោធន៍ ការដាក់ឱ្យដំណើរការ និងការសិក្សាជាមួយនឹងមុខវិជ្ជាស្ទែមទាំងនេះ។
រីឯពិធីបិទទំព័រកម្មវិធី ពិព័រណ៍វិទ្យាសាស្ត្រវិញ បានទទួលអធិបតីភាពដ៏ខ្ពង់ខ្ពស់ របស់លោក អឹម កុច រដ្ឋលេខាធិការក្រសួងអប់រំ យុវជន និងកីឡា ដែលបានផ្ដល់នូវកិច្ចគាំទ្រយ៉ាងពេញទំហឹង និងលើកឡើងពីតួនាទីដ៏សំខាន់ នៃការអប់រំស្ទែម ក្នុងការរួមចំណែកចំពោះអនាគតសេដ្ឋកិច្ចកម្ពុជា។
កញ្ញា តេង សុផាណា តំណាងក្រុមហ៊ុន ស្មាត អាស្យាតា និងដែលជាអ្នកឧបត្ថម្ភធំ នាឱកាសព្រឹត្តិការណ៍នេះ បានថ្លែងនិងទទួលវិញ្ញាបនបត្របញ្ជាក់ពីអនុស្សរណៈយោគយល់គ្នា រយៈពេល៣ឆ្នាំមកហើយ ដែលនេះ បញ្ជាក់ពីតឹកតាង នៃការប្ដេជ្ញាខ្ពស់របស់ ស្មាត អាស្យាតា ក្នុងការរួមចំណែក ក្នុងបុព្វហេតុមនុស្សជាតិ សង្គម និងផែនដីរបស់យើង។
តាមរយៈការព្យាយាម និងសាកល្បងរូបមន្ត ការផ្ដល់ឱកាសឱ្យសិស្ស-និស្សិតចូលរួមជាមួយនឹងមុខវិជ្ជាដែលគួរឱ្យចាប់អារម្មណ៍នេះ និងផ្ដល់នូវទំនួលខុសត្រូវដល់ពួកគាត់ ក្នុងការបង្ហាញពីស្នាដៃ និងសមត្ថភាពជូនដល់ប្រទេសជាតិ បូករួមនឹងការលើកកម្ពស់គំនិតផ្ដួចផ្ដើម ដ៏ជោគជ័យនានា គឺសុទ្ធតែជាធាតុផ្សំ នៃភាពជោគជ័យដ៏ត្រចះត្រចង់ នៃព្រឹត្តិការណ៍នេះ ដូចសព្វមួយដង។
លក្ខណៈពិសេសពិតប្រាកដ នៃព្រឹត្តិការណ៍រយៈពេលពីរថ្ងៃនេះ គឺជាគម្រោងស្ទែមរបស់ប្អូនៗសិស្សានុសិស្សពីសាលានានាជាច្រើន។ គម្រោងសរុបចំនួន២៤០គម្រោង ត្រូវបានដាក់តាំងបង្ហាញ និងបង្កើតឡើងដោយសិស្សានុសិស្ស មកពីសាលាចំនួន១៥ ដែលរួមមានសាលាមកពីខេត្តបាត់ដំបងផងដែរ។ តាមរយៈគម្រោងទាំងនេះ ពួកគាត់ពិតជាអាចប្រើប្រាស់ ការអប់រំស្ទែមដែលពួកគាត់ចូលចិត្តបំផុតហើយយើងក៏បានផ្ដល់ផងដែរ នូវភាពរីករាយជាច្រើន ដល់មហាជនដែលបានចូលរួមទស្សនា នៅតាមស្ដង់បង្ហាញគម្រោងនានា និងស្វែងយល់ពីទ្រឹស្ដី គួរឱ្យចាប់អារម្មណ៍ផ្សេងៗ រួមទាំងអាថ៌កំបាំងវិទ្យាសាស្ត្រពិសេសៗផងដែរ។
ព្រឹត្តិការណ៍នេះ បានផ្ដល់ជូនផងដែរ នូវការបង្ហាញលើឆាកដែលគួរជាទីចាប់អារម្មណ៍ ជាមួយនឹងលក្ខណៈវិទ្យាសាស្ត្រពិសេសៗ បឋកថាដែលបង្ហាញដោយអ្នកជំនាញ ក្នុងការងារស្ទែម ក្រោមប្រធានបទនៃការអប់រំស្ទែម អាជីពការងារស្ទែម រួមនឹងប្រធានបទបរិស្ថាននានា សម្រាប់កម្ពុជានាពេលបច្ចុប្បន្ន។ ក្រៅពីនេះ យើងក៏មានជាការប្រគំតន្ត្រី សម្រាប់ថ្ងៃនីមួយៗ នៃព្រឹត្តិការណ៍ទាំងពីរថ្ងៃនេះផងដែរ។ ម្យ៉ាងវិញទៀត យើងបានទទួលការចូលរួមពីសំណាក់ «Nutty Scientists Cambodia»ដែលញុំាងឱ្យកម្មវិធីនេះ មានបរិយាកាសកាន់តែរីករាយ។
ដោយឡែក ការប្រកួតសំណេរប្រកបដោយភាពច្នៃប្រឌិត និងការប្រកួតសិល្បៈគំនូរ ដែលបង្កើតឡើងដើម្បីអបអរ មហោស្រពពិព័រណ៍វិទ្យាសាស្ត្រកម្ពុជាប្រចាំឆ្នាំនេះ ក៏បានផ្ដល់នូវឱកាសដល់សិស្សានុសិស្សស្វែងយល់អំពីការអប់រំស្ទែមដែរ។ ស្នាដៃរបស់ជ័យលាភី ត្រូវបានដាក់តាំងបង្ហាញជូនមហាជនទស្សនា។
រីឯការប្រកួតរ៉ូបូត របស់សមាគមរ៉ូបូតអូឡាំព្យាដពិភពលោក បានទាក់ទាញចំណាប់អារម្មណ៍របស់សិស្សានុសិស្ស ក្នុងក្រុងភ្នំពេញយ៉ាងខ្លាំង រួចមកហើយ នៅដើមឆ្នាំនេះ ហើយមហោស្រពពិព័រណ៍វិទ្យាសាស្ត្ររបស់យើង ក៏បានពាំនាំការបង្ហាញរ៉ូបូតនេះ ជូនដល់សិស្សានុសិស្សបន្ថែមទៀត ដើម្បីឲ្យពួកគាត់បានស្វែងយល់អំពីបច្ចេកវិទ្យា។ ម្យ៉ាងវិញទៀត យើងក៏មានការដាក់តាំងបង្ហាញរ៉ូបូតផ្សេងៗ រួមទាំង «ស៊ូម៉ូរ៉ូបូត» ដែលផ្ដល់នូវទិដ្ឋភាពដ៏ពិសេសមួយ នៃបច្ចេកវិទ្យា និងដែលបានទាក់ទាញចំណាប់អារម្មណ៍ របស់អ្នកចូលរួមទស្សនា។
គួរបញ្ជាក់ផងដែរថា យើងក៏មានគម្រោងស្ទែមរបស់កុមារតូចៗ (Kids Corner) ក្នុងគោលបំណងដាក់តាំងបង្ហាញភាពច្នៃប្រឌិត និងចំណាប់អារម្មណ៍របស់ពួកគាត់ តាមបែបវិទ្យាសាស្ត្រដែរ។
ជាការពិត មុខវិជ្ជាស្ទែមនឹងបន្តទទួលបានការយកចិត្តទុកដាក់ និងប្ដេជ្ញាខ្ពស់លើការអប់រំ នាពេលអនាគត នៅទូទាំងពិភពលោក ហើយជានិច្ចកាលព្រឹត្តិការណ៍ដូចនេះ គឺជាមធ្យោបាយមួយដ៏មានប្រសិទ្ធភាព ក្នុងការបំផុស និងជំរុញគំនិតរបស់សិស្ស-និស្សិត ឱ្យរួមចំណែកក្នុងមុខវិជ្ជាស្ទែមនេះ។
យើងខ្ញុំបានចាប់ផ្ដើមត្រៀមលក្ខណៈ រៀបចំមហោស្រពពិព័រណ៍វិទ្យាសាស្ត្រកម្ពុជាប្រចាំឆ្នាំ លើកទី១៥ សម្រាប់ឆ្នាំក្រោយរួចហើយ និងសូមស្វាមគន៍ចំពោះការចូលរួមទស្សនាកាន់តែច្រើនកុះកររបស់អ្នកចូលរួម និងមហាជន៕
(អត្ថបទពាណិជ្ជកម្ម)