ប្រធាន UN ប្រចាំកម្ពុជា៖ «រឿងសំខាន់ៗពីរ ប្រទេសដទៃអាចរៀនពីកម្ពុជាក្នុងប្រតិបត្តិការរក្សាសន្តិភាព»

ជាតិ

ប្រធាន UN ប្រចាំកម្ពុជា៖ «រឿងសំខាន់ៗពីរ ប្រទេសដទៃអាចរៀនពីកម្ពុជាក្នុងប្រតិបត្តិការរក្សាសន្តិភាព»

05, Dec 2018 , 5:32 pm

រូបភាព

កងទ័ពថែរក្សាសន្តិភាពកម្ពុជា (រូបភាព៖ Cambodia's Peace Keeping Center)

ដោយ: សៅ ផលនិស្ស័យ (Sao Phal Niseiy)

ប្រធានអង្គការសហប្រជាជាតិលោកស្រី ផូលីន ថាម៉េស៊ីស (Pauline Tamesis) បានកោតសរសើរកម្ពុជាដែលរួមចំណែកក្នុងបុព្វហេតុរក្សាសន្តិភាពពិភពលោកតាមរយៈការបញ្ជូនកងទ័ពខ្លួនយ៉ាងសកម្មទៅចូលរួមប្រតិបត្តិការរក្សាសន្តិភាពក្រោមឆត្រអង្គការសហប្រជាតិ។ មេរៀនធំៗពីរដែលតំណាងអង្គការសហប្រជាជាតិរូបនេះជឿជាក់ថាបណ្តាប្រទេសឯទៀតអាចរៀនសូត្រពីកម្ពុជាបានក្នុងប្រតិបត្តិការថែរក្សាសន្តិភាពពិភពលោកនេះ។

ការប្រែក្លាយខ្លួនពីប្រជាជាតិរងគ្រោះដោយសារភ្លើងសង្គ្រាម និងទទួលកងទ័ពរក្សាសន្តិភាពអង្គការសហប្រជាជាតិមកជាប្រទេសចូលរួមយ៉ាងសកម្មក្នុងការថែរក្សាសន្តិភាពពិភពលោកជារឿងជោគជ័យដ៏ធំមួយរបស់កម្ពុជា។ នេះជាការលើកឡើងរបស់ប្រធានអង្គការសហប្រជាជាតិនៅកម្ពុជាលោកស្រី ផូលីន ថាម៉េស៊ីស ក្នុងបទសម្ភាសន៍ផ្តាច់មុខមួយជាមួយសារព័ត៌មានថ្មីៗ (Thmey Thmey) ចុងខែវិច្ឆិកាកន្លងទៅ។

លោកស្រីនិយាយដូច្នេះ៖ «យើងត្រូវទទួលស្គាល់ថា កម្ពុជាជារឿងជោគជ័យមួយពេលនិយាយដល់ការថែរក្សាសន្តិភាព។ ក្នុងរយៈពេលតិចជាង ២០ឆ្នាំ កម្ពុជាបានប្រែខ្លួនពីប្រទេសដែលធ្លាប់ទទួលយកកងទ័ពថែរក្សាសន្តិភាពមកជាប្រទេសដែលផ្តល់កងទ័ពទៅចូលរួមថែរក្សាសន្តិភាពពិភពលោកវិញ»។

លោកស្រី ផូលីន ថាម៉េស៊ីសថ្លែងសុន្ទរកថានៅក្នុងពិធីជូនដំណើរកងទ័ពកម្ពុជាទៅបំពេញបេសកកម្មនៅអាហ្វ្រិកកណ្តាលថ្ងៃ ២ ខែវិច្ឆិកាឆ្នាំ ២០១៨ (រូបភាព៖ UN Cambodia)

ក្រោយឆ្លងកាត់ភ្លើងសង្គ្រាមអស់រាប់ទសវត្សរ៍ កម្ពុជាបានបើកទ្វារទទួលកងទ័ពរក្សាសន្តិភាពអង្គការសហប្រជាជាតិបន្ទាប់ពីកិច្ចព្រមព្រៀងសន្តិភាពក្រុងប៉ារីសត្រូវបានភាគីជម្លោះទទួលយកជាផ្លូវការថ្ងៃ ២៣ ខែតុលាឆ្នាំ ១៩៩១។ អាជ្ញាធរបណ្តោះអាសន្នរបស់អង្គការសហប្រជាជាតិនៅកម្ពុជាហៅកាត់ថា អ៊ុនតាក់ (UNTAC) ត្រូវបានបង្កើតឡើងដោយដំណោះស្រាយដាក់ចេញដោយក្រុមប្រឹក្សាសន្តិសុខអង្គការសហប្រជាជាតិខែកុម្ភៈឆ្នាំ ១៩៩២ ដើម្បីទទួលខុសត្រូវលើការថែរក្សាសន្តិភាព និងរៀបចំសម័យអន្តរកាលនយោបាយផង។

បើតាមលោកស្រី ផូលីន ចាប់ពីឆ្នាំ ២០០៦មក កម្ពុជាបានបញ្ជូនកងទ័ពសរុបទាំងអស់ ៥៧៨៣នាក់ក្នុងនោះមានស្រី ២៧៧ ទៅចូលរួមក្នុងប្រតិបត្តិការសន្តិភាព។ បច្ចុប្បន្នកម្ពុជាមានកងទ័ព ៧៩៩នាក់ដែលឈរជើងនៅទឹកដីអាហ្វ្រិក និងមជ្ឈិមបូព៌ា។ តាមចំនួនទ័ពដ៏ច្រើននេះ កម្ពុជាជាប់ចំណាត់ថ្នាក់ទី ២៩ ក្នុងចំណោមប្រទេស ១២២ លើពិភពលោក និងស្ថិតក្នុងចំណោមប្រទេសបញ្ជូនកងទ័ពទៅចូលរួមប្រតិបត្តិការថែរក្សាច្រើនជាងគេក្នុងតំបន់អាស៊ានផងដែរ។

កងទ័ពកម្ពុជាស្ថិតក្នុងពិធីជូនដំណើរកងទ័ពកម្ពុជាទៅបំពេញបេសកកម្មនៅអាហ្វ្រិកកណ្តាលថ្ងៃ ២ ខែវិច្ឆិកាឆ្នាំ ២០១៨ (រូបភាព៖ UN Cambodia)

ពេលសាកសួរថា តើប្រទេសដទៃអាចរៀនសូត្របានអ្វីខ្លះពីកម្ពុជាក្នុងការចូលរួមយ៉ាងសកម្មក្នុងការរក្សាសន្តិភាពនេះ លោកស្រីបានឆ្លើយតបថា វាមានរឿងសំខាន់ចំនួនពីរ។ លោកស្រីបន្តថា រឿងសំខាន់ទីមួយគឺ ការរក្សាបានឆន្ទៈនយោបាយរបស់រដ្ឋាភិបាល ខណៈដែលរឿងសំខាន់ទីពីរគឺ ការប្តេជ្ញាចិត្តក្នុងការផ្តល់ត្រឡប់ទៅសហគមន៍អន្តរជាតិវិញ។

ត្រង់ឆន្ទៈនយោបាយនេះ លោកស្រីសំដៅលើការប្តេជ្ញាចិត្តរបស់រដ្ឋាភិបាលកម្ពុជាក្នុងការបន្តគាំទ្រអង្គការសហប្រជាជាតិជាពិសេស កិច្ចប្រតិបត្តិការរក្សាសន្តិភាពនេះតែម្តង។ លោកស្រី ផូលីន លើកយកការប្តេជ្ញាចិត្តរបស់នាយករដ្ឋមន្ត្រីកម្ពុជាថ្លែងទៅកាន់មហាសន្នបាតអង្គការសហប្រជាជាតិលើកទី ៧៣ កាលពីខែ កញ្ញាកន្លងទៅជាសម្អាង។ នាពេលនោះ សម្តេច ហ៊ុន សែនបានថ្លែងប្រាប់អង្គប្រជុំទាំងមូលថា កម្ពុជាតែមានការប្តេជ្ញាចិត្តខ្ពស់ក្នុងការគាំទ្រឥតងាករេចំពោះប្រតិបត្តិការរក្សាសន្តិភាពនិងគំនិតផ្តួចផ្តើមនានាដែលធានាបាននូវសន្តិភាពនិងវិបុលភាពយូរអង្វែងជូនពិភពលោក។

ចំណែក ការប្តេជ្ញាចិត្តផ្តល់ត្រឡប់ទៅសហគមន៍អន្តរជាតិវិញនោះ លោកស្រីចង់សំដៅលើឆន្ទៈរបស់កម្ពុជាក្នុងការតបស្នងទៅកាន់សហគមន៍អន្តរជាតិវិញ ទៅតាមលទ្ធភាពរបស់ខ្លួន ដ្បិតសហគមន៍អន្តរជាតិបានរួមចំណែកជួយត្រួសត្រាយផ្លូវសម្រាប់ការស្តារសន្តិភាព និងកសាងប្រទេសវិញដែរ។

«ជុំវិញមេរៀនដែលប្រទេសដទៃអាចរៀនបានពីកម្ពុជានេះ ខ្ញុំចង់ភ្ជាប់ទៅដល់ការអនុវត្តគោលដៅអភិវឌ្ឍប្រកបដោយចីរភាពដែរ។ បច្ចុប្បន្ននេះ អង្គការសហប្រជាជាតិត្រូវការខ្លាំងណាស់នូវការប្តេជ្ញាចិត្តនិងឆន្ទៈនយោបាយរបស់រដ្ឋក្នុងការគាំទ្រកិច្ចព្រមព្រៀង និងយន្តការអន្តរជាតិ។ បើសិនជាយើងគ្មានឆន្ទៈនយោបាយ និងការប្តេជ្ញាចិត្តខ្ពស់ដូចកម្ពុជាទេ រាល់កិច្ចព្រមព្រៀងអន្តរជាតិនឹងដួលរលំមិនខាន»។ លោកស្រី ផូលីន បានពន្យល់បន្ថែមដូច្នេះ។

«យើងឃើញស្រាប់ហើយ ប្រទេសខ្លះចាប់ផ្តើមបិទទ្វារ និងចង់សាងសង់ជញ្ជាំងបិទឈប់ទាក់ទងសហគមន៍អន្តរជាតិ។ ប៉ុន្តែនៅទីនេះវិញ ជំនួសឲ្យការសាងសង់ជញ្ជាំង កម្ពុជាព្យាយាមរួមចំណែកផ្តល់ត្រឡប់វិញទៅសហគមន៍អន្តរជាតិដែលបានជួយខ្លួនកសាងប្រទេសជាតិតាំងពីសង្គ្រាមផុតរលត់ទៅ»៕