ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បកស្រាយថា លោកនិយាយលេងសើចទេរឿងដែលថាលោកជក់កញ្ឆាដើម្បីឲ្យស្វាងអាចធ្វើការងារបានយូរ។ ការបកស្រាយថា វាជាការលេងសើចនេះទំនងជាឆ្លើយតបនឹងមតិរិះគន់ ដ្បិតសង្គ្រាមគ្រឿងញៀនដ៏ចម្រូងចម្រាសរបស់លោក ឌូទើតេ បន្តឆាបឆក់យកជីវិតមនុស្សរាប់ពាន់នាក់ ។
សម្តីរបស់ប្រធានាធិបតីហ្វីលីពីនដើមសប្តាហ៍កន្លងទៅដែលថា លោកបានប្រើប្រាស់កញ្ឆាដើម្បីឲ្យស្វាងងងុយ និងមានកម្លាំងចូលរួមប្រជុំអាស៊ាននៅសិង្ហបុរី កំពុងធ្វើឲ្យផ្ទុះមតិរិះគន់ខ្លាំងក្នុងចំណោមមជ្ឈដ្ឋានហ្វីលីពីន។
សារឃើញស្ថានការណ៍មិនសូវស្រួល នៅថ្ងៃអង្គារទី ៤ខែធ្នូ មេដឹកនាំហ្វីលពីនរូបនេះបានចេញមុខបកស្រាយតែម្តងថាលោកនិយាយលេងសើចប៉ុណ្ណោះ។ តាមការចុះផ្សាយរបស់ទូរទស្សន៍ ABS-CBN លោក ឌូទើតេ បកស្រាយដូច្នេះ៖ «វាជាសម្តីលេងសើចប៉ុណ្ណោះ។ ប៉ុន្តែគ្មានអ្នកណាម្នាក់ដែលអាចបញ្ឈប់ខ្ញុំមិនឲ្យធ្វើអ្វីជាទម្លាប់របស់ខ្ញុំឡើយ។ បើសិនជាខ្ញុំចង់និយាយលេងសើច ខ្ញុំនឹងនិយាយ។ ឥឡូវនេះបើសុនជាអ្នកឯងជឿលើអ្វីដែលខ្ញុំនិយាយលេងនោះ អ្នកឯងឆ្កួតហើយ»។
វាជារឿងធម្មតាទេដែលប្រជាជនហ្វីលីពីនថ្កោលទោសសម្តីរបស់លោក ឌូទើតេ ជុំវិញការប្រើប្រាស់កញ្ឆាដើម្បីឲ្យស្វាង ដ្បិតថា លោក ឌូទើតេ កំពុងបន្តអនុវត្តសង្គ្រាមប្រឆាំងគ្រឿងញៀននៅទូទាំងប្រទេស និងបានសម្លាប់មនុស្សអស់រាប់ពាន់នាក់ហើយ។
គេយល់ថា វាជារឿងអយុត្តិធម៌បំផុត ដែលក្នុងនាមជាអ្នកអនុវត្តច្បាប់ លោក ឌូទើតេ ហ៊ានប្រើប្រាស់គ្រឿងញៀនខ្លួនឯង ខណៈដែលលោកបញ្ជាឲ្យប៉ូលិសបាញ់សម្លាប់មនុស្សដទៃដែលប្រើប្រាស់គ្រឿងញៀននោះ។
តាមពិតទៅសង្គ្រាមគ្រឿងញៀនរបស់លោករងការថ្កោលទោសខ្លាំងពីក្រុមសិទ្ធិមនុស្ស ដ្បិតថាមកដល់ឥឡូវសង្គ្រាមនេះឆក់យកជីវិតមនុស្សប្រហែល ៤៨០០នាក់ហើយរាប់ចាប់ពីខែកក្កដាឆ្នាំ ២០១៦មក។ ក្រុមសិទ្ធិមនុស្សក៏ចោទប្រកាន់ផងដែរថា សង្គ្រាមនេះហ៊ុមព័ទ្ធដោយការសម្លាប់ក្រៅប្រព័ន្ធតុលាការ ហើយវាមានគោលដៅតែលើប្រជាជនក្រីក្រដែលប្រើប្រាស់ជាងក្រុមឈ្មួញលក់គ្រឿងញៀនធំៗ។
វាមិនមែនជារឿងគួរឲ្យភ្ញាក់ផ្អើលឡើយដែលមេដឹកនាំហ្វីលីពីនរូបនេះព្យាយាមក្រឡាស់សម្តីរបស់ខ្លួន និងបកស្រាយថា លោកនិយាយលេងសើច។ កាលពីឆ្នាំ ២០១៦ ក្រោយពេលឡើងកាន់អំណាច លោកបានពន្យល់ថា លោកនិយាយលេងសើចពីអ្នកផ្សព្វផ្សាយសាសនាជាតិអូស្ត្រាលីដែលត្រូវបានរំលោភ និងសម្លាប់នៅហ្វីលីពីនតាំងពីឆ្នាំ ១៩៨៩មក ហើយសម្តីលោកបានបង្កើតឲ្យភាពល្អក់កករខ្លាំងក្នុងចំណងទំនាក់ទំនងទ្វេភាគីជាមួយអូស្ត្រាលីផង។
ត្រឡប់មកវិញ កាលដើមឡើយលោក ឌូទើតេ ធ្លាប់ប្រកាសថា លោកចង់ឲ្យមានការប្រើប្រាស់កញ្ឆាក្នុងការពិសោធន៍បម្រើសុខាភិបាល។ ប៉ុន្តែចាប់ពីខែឧសភា លោក ឌូទើតេបានប្រកាសថាលោកប្តូរជំហរឈប់គាំទ្រគម្រោងនេះវិញ។ នៅហ្វីលីពីនការរក្សាទុកកញ្ឆា ត្រូវប្រឈមនឹងការដាក់ទណ្ឌកម្មធ្ងន់ធ្ងរក្នុងនោះមានការជាប់ពន្ធនាគាររយៈពេលយូរនិងរងការពិន័យជាសាច់ប្រាក់ក្នុងទំហំច្រើនដែរ៕