ជាតិ
២៥ខេត្ត/រាជធានី
សហព័ន្ធស្រូវអង្ករកម្ពុជា ប្រកាសឲ្យអ្នកផលិតស្រូវ និងសហគមន៍កសិករ ចូលរួមប្រកួត«ស្រូវល្អបំផុតប្រចាំប្រទេស» ចាប់ពីថ្ងែនេះ
× ភ្នំពេញ៖ សហព័ន្ធស្រូវអង្ករកម្ពុជា (ស.អ.ក) ប្រកាសឲ្យសហគមន៍កសិកម្ម, រោងម៉ាស៊ីនកិនស្រូវ និងក្រមហ៊ុននានាដែលពាក់ព័ន្ធនឹងការដាំដុះស្រូវ ដាក់ពាក្យប្រកួតប្រជែង«ស្រូវល្អបំផុតប្រចាំប្រទេសកម្ពុជាលើកទី៣» ចាប់ពីថ្ងៃប្រកាសដំណឹងនេះរហូតដល់ថ្ងៃទី៣១ ខែធ្នូ ឆ្នាំ២០១៨។ នេះបើតាមសេចក្តីប្រកាសព័ត៌មានរបស់ ស.អ.ក កាលពីថ្ងៃទី៥ ធ្នូនេះ។ កម្មវិធីនេះធ្វើឡើងក្នុងគោលបំណង លើកទឹកចិត្តអ្នកផលិតស្រូវ និងសហគមន៍កសិករ ព្រមទាំងចូលរួមផ្សព្វផ្សាយពីប្រភេទស្រូវដែលមានសក្ដានុពលសម្រាប់នាំចេញអង្ករផងដែរ។
សេចក្តីប្រកាសព័ត៌មានដដែលបានឲ្យដឹងទៀតថា ស្រូវ៣ប្រភេទដែលសហព័ន្ធស្រូវអង្ករកម្ពុជា (ស.អ.ក) ត្រៀមរៀបចំឲ្យមានការប្រកួតនោះ មាន ទី១. ស្រូវផ្ការំដួល ទី២. ស្រូវសែនក្រអូប និងទី៣. ស្រូវអ៊ីអ៊ែរ។ កម្មវិធីប្រកួតប្រជែងស្វែងរកម្ចាស់ជ័យលាភី«ស្រូវល្អបំផុតប្រចាំប្រទេសកម្ពុជាលើកទី៣»នេះ នឹងប្រព្រឹត្តទៅនៅថ្ងៃទី ០៤ ខែមករា ឆ្នាំ២០១៩ ខាងមុខនេះ។
សម្រាប់ព័ត៌មាន និងការចុះឈ្មោះ សូមទំនាក់ទំនងលេខទូរស័ព្ទ ០២៣ ៥៥៩ ៨៨៩៩/០៨៩ ៨៩៩ ៥៨៤ ឬតាមរយៈអាសយដ្ឋាន៖ អគារពាណិជ្ជកម្មសោម៉ា ជាន់ទី៧ អគារលេខ២C ផ្លូវលេខ១២០ សង្កាត់ផ្សារថ្មីII ខណ្ឌដូនពេញ រាជធានីភ្នំពេញ៕
Tag:
កសិកម្ម
សហព័ន្ធស្រូវអង្ករកម្ពុជា
© រក្សាសិទ្ធិដោយ thmeythmey.com