អន្តរជាតិ
ម៉ាឡេស៊ីត្រៀមកាត់ទោសជនជាតិវៀតណាម ២១នាក់ ឆ្លងចូលនេសាទត្រីខុសច្បាប់ដែនទឹកខ្លួន
× ជនជាតិវៀតណាម ២១នាក់ត្រូវបានតុលាការម៉ាឡេស៊ីចោទប្រកាន់នៅសប្តាហ៍មុនទាក់ទិននឹងបទល្មើសឆ្លងចូលនេសាទត្រីខុសច្បាប់ក្នុងដែនទឹករបស់ខ្លួន។ តាមច្បាប់គ្រប់គ្រងការនេសាទម៉ាឡេស៊ី ម្ចាស់កប៉ាល់ និងកម្មករនេសាទវៀតណាមនេះអាចប្រឈមមុខនឹងការបង់លុយពិន័យធ្ងន់ធ្ងរផងដែរ។
តុលាការម៉ាឡេស៊ីនៅថ្ងៃ ១ខែធ្នូបានចោទប្រកាន់ជាផ្លូវការប្រឆាំងអ្នកនេសាទជនជាតិវៀតណាម ២១នាក់ដែលបានឆ្លងចូលមកនេសាទត្រីខុសច្បាប់ក្នុងដែនសមុទ្រម៉ាឡេស៊ី។
យោងតាមសារព័ត៌មានវៀតណាម VN express ពេលត្រូវបានចាប់ខ្លួន ជនជាតិវៀតណាមទាំងនោះគ្មានលិខិតអនុញ្ញាតត្រឹមត្រូវឡើយ ហើយខ្លះទៀតប្រើប្រាស់លិខិតអនុញ្ញាតក្លែងក្លាយសម្រាប់ប្រើប្រាស់នាវានេសាទក្នុងដែនទឹកម៉ាឡេស៊ីថែមទៀត។ ដូច្នេះហើយ តុលាការសម្រេចចោទប្រកាន់ពួកគេពីបទនេសាទខុសច្បាប់ និងប្រើប្រាស់នាវានេសាទខុសច្បាប់ ក្រោមច្បាប់គ្រប់គ្រងការនេសាទម៉ាឡេស៊ីឆ្នាំ ១៩៨៥។
គេមិនទាន់ដឹងច្បាស់នៅឡើយទេថា ក្រុមអ្នកនេសាទទាំងនេះនឹងត្រូវប្រឈមមុខទោសទណ្ឌអ្វីខ្លះ ដ្បិតថានៅថ្ងៃ ១៤ និង ១៥ ខែធ្នូ ចៅក្រមតុលាការម៉ាឡេស៊ីសម្រេចកាត់ទោសអ្នកនេសាទទាំងអស់នេះជាផ្លូវការ។ អ្នកនេសាទវៀតណាមទាំងអស់ស្ថិតក្រោមការឃុំឃាំងនៅឡើយ ហើយពួកគេនឹងអាចរួចខ្លួនក្រោយថ្ងៃសវនាការដែរ។
ប៉ុន្តែក្នុងសំណុំរឿងមុនៗ អ្នកនេសាទវៀតណាមខ្លះត្រូវកាត់ទោសឲ្យបង់លុយពិន័យធ្ងន់ធ្ងរ។ ម្ចាស់នាវាអាចនឹងត្រូវតុលាការតម្រូវឲ្យបង់លុយប្រមាណ ពីរសែនដុល្លារ ខណៈដែលកម្មករនេសាទត្រូវបង់លុយពិន័យជាងពីរម៉ឺនដុល្លារផងដែរដើម្បីរួចពីទោសពន្ធនាគារ។
ក្រៅពីអ្នកនេសាទ ២១នាក់ អ្នកនេសាទវៀតណាម ៣៦នាក់ផ្សេងទៀតនឹងត្រូវឡើងសវនាការក្នុងខែកុម្ភៈនិងមីនាឆ្នាំ ២០១៩ ក្រោយរងការចោទប្រកាន់ពាក់ព័ន្ធនឹងការនេសាទខុសច្បាប់នេះ។ ប៉ុន្តែពួកគេបានច្រានចោលរាល់ការចោទប្រកាន់ដែលមានប្រឆាំងនឹងពួកគេពីសំណាក់តុលាការម៉ាឡេស៊ី៕
Tag:
ម៉ាឡេស៊ី
នេសាទ
វៀតណាម
© រក្សាសិទ្ធិដោយ thmeythmey.com