មុនផ្អាកសង្គ្រាមពាណិជ្ជកម្មជាមួយអាមេរិក លោក ស៊ី ធ្លាប់សុំយោបល់ពីលោក អាបេ ដែរ

អន្តរជាតិ

មុនផ្អាកសង្គ្រាមពាណិជ្ជកម្មជាមួយអាមេរិក លោក ស៊ី ធ្លាប់សុំយោបល់ពីលោក អាបេ ដែរ

07, Dec 2018 , 8:59 am

រូបភាព

ដោយ:

កាលពីសប្តាហ៍មុន នៅក្រៅកិច្ចប្រជុំប្រទេសម្ភៃ G-20 នៅប៊ុយណូស៊ែរដ្ឋធានីរបស់អាហ្សង់ទីន ប្រធានាធិបតីចិន ស៊ី ជិនភីង និងសមភាគីអាមេរិក ដូណាល់ ត្រាំ ឯកភាពគ្នាផ្អាកសង្គ្រាម ក្នុងគោលបំណងបន្ធូរបន្ថយភាពតានតឹងនៃជម្លោះពាណិជ្ជកម្ម។ គេលេចលឺថា លោក ស៊ី ធ្លាប់សួរនាំ និងសុំយោបល់ពីមេដឹកនាំជប៉ុន ដែរមុនឈានដល់ការដោះស្រាយជម្លោះពាណិជ្ជកម្មនេះ។

កាលពីខែតុលាកន្លងទៅ នាជំនួបមួយនៅក្រុងប៉េកាំងជាមួយនាយករដ្ឋមន្ត្រីជប៉ុន ស៊ីនហ្សូ អាបេ ប្រមុខរដ្ឋចិន លោក ស៊ី ជិនភីង បានបង្ហាញក្តីកង្វល់ជុំវិញសង្គ្រាមពាណិជ្ជកម្ម។ ដ្បិតលោកពុំដឹងច្បាស់ទេថា តើលោកគួរលើកយកចំណុចអ្វីមកពិភាក្សាជាមួយលោកត្រាំ នៅពេលជួបមុខគ្នាផ្ទាល់គ្នា។

បើតាមប្រភពដែលដឹងច្បាស់ពីកិច្ចសន្ទនាទ្វេភាគីនេះដែលដកស្រង់ដោយសារព័ត៌មានហុងកុង South China Morning Post។ អំឡុងជំនួបនេះ លោក ស៊ី ជិនភីង ដែលព្យាយាមផ្តើមពង្រឹងទំនាក់ទំនង ជាមួយរដ្ឋាភិបាលក្រុងតូក្យូ បានសួរយោបល់មេដឹកនាំជប៉ុនលោក ស៊ីនហ្សូ អាបេ ដែរ។

យោងតាមប្រភពដដែល លោក អាបេ បានឆ្លើយតបថា៖ «លោក [ស៊ី ជីនភីង] គួរតែនិយាយទៅកាន់លោក [ត្រាំ]»។ ទន្ទឹមនឹងនេះ នាយករដ្ឋមន្ត្រីជប៉ុនរូបនេះក៏បានលើកទឹកចិត្តឲ្យលោកស៊ី បង្កើតកិច្ចសន្ទនាផ្ទាល់ជាមួយ លោក ត្រាំ ផងដែរ ដ្បិតលោកអាបេ ដឹងថា លោក ត្រាំ ពិតជាមានការគោរពចំពោះមេដឹកនាំចិន។

មែនទែនទៅ លោក អាបេ ទំនងជាមេដឹកនាំតែមួយគត់ដែលអាចផ្តល់យោបល់ឲ្យលោកស៊ី ដើម្បីតតាំងជាមួយលោក ត្រាំ ដែលត្រូវបានគេស្គាល់ថា ជាមនុស្សនិយាយបាតដៃខ្នងដៃ។ ដោយហេតុផលនេះហើយទើប មេដឹកនាំជប៉ុនរូបនេះ បានប្រឹងប្រែងយ៉ាងសស្រាក់សស្រាំ ដើម្បីកសាងទំនាក់ទំនងកាន់តែស្អិតល្មួតជាមួយប្រធានាធិបតីអាមេរិកទី ៤៥ រូបនេះ ដោយមានជំនួបផ្ទាល់ជារឿយៗ និងចំណាយពេលលេងវាយកូនហ្គោល (golf) ជាមួយគ្នាផង។

ម្យ៉ាងវិញទៀត លោក អាបេ ជាមេដឹកនាំបរទេសដំបូងបង្អស់ ដែលបានធ្វើដំណើរទៅកាន់ក្រុងញូវយ៉ូក ដើម្បីជួប និងអបអរ លោក ដូណាល់ ត្រាំ ផ្ទាល់ ក្រោយពីលោក ត្រាំ ឈ្នះការបោះឆ្នោតអាមេរិកកាលពីចុងឆ្នាំ២០១៦។ ហើយកាលពីថ្មីៗនេះ នៅជំនួបកំពូលប្រទេសជឿនលឿនទាំងម្ភៃ (G-20) កាលថ្ងៃសុក្រទី៣០ ខែវិច្ឆិកា នាយករដ្ឋមន្ត្រីជប៉ុន អាបេ ជាថ្មីម្តងទៀតបានសាទរចំពោះជ័យជម្នះរបស់បក្សសាធារណៈរដ្ឋដែលបន្តក្តោបក្តាប់ព្រឹទ្ធសភា ក្នុងការបោះឆ្នោតពាក់កណ្តាលអាណត្តិ ដោយលើកឡើងថា វាជា «ជ័យជម្នះជាប្រវតិ្តសាស្ត្រ» ។

សម្រាប់លោក អាបេ ការពិភាក្សាទល់មុខគ្នារវាងមេដឹកនាំពិភពលោក ជាវិធីសាស្ត្រល្អបំផុតសម្រាប់ដោះស្រាយជម្លោះពាណិជ្ជកម្មនានា។ ហើយ ដំណើរការទៅមុខនៃកិច្ចពិភាក្សាពាណិជ្ជកម្មរវាងសហរដ្ឋអាមេរិកនិងចិន មានន័យថា ជាការទ្វារបើកចំហកាន់តែធំទូលាយទៅកាន់ទីផ្សារចិនសម្រាប់ក្រុមហ៊ុនបរទេស ក្នុងនោះរួមមាន បណ្តាក្រុនហ៊ុនរបស់ជប៉ុនផងដែរ។

ដូច្នេះហើយទើបអំឡុងជំនួបកាលពីពីរខែមុន មេដឹកនាំជប៉ុនក៏បានលើកឡើងពីបញ្ហាមួយចំនួន រួមមាន ការជួយគាំទ្ររបស់រដ្ឋាភិបាលចិនលើសហគ្រាសរដ្ឋ និងការពារកម្មសិទ្ធិបញ្ញាជាដើម ដោយសង្ឃឹមថា ក្រុងប៉េកាំងអាចធ្វើបានច្រើនជាងនេះ។ ហើយបញ្ហាទាំងនេះ ក៏ស្ថិតក្នុងចំណោមកង្វល់ធំៗរបស់រដ្ឋបាលលោក ត្រាំ ផងដែរ៕