របាយការណ៍វិទ្យាសាស្ត្រថ្មីមួយបានបង្ហាញឲ្យឃើញថា កម្រិតឧស្ម័នកាបូនិចដែលបំភាយចេញទៅបរិយាកាសទូទាំងពិភពលោកកើនឡើងខ្លាំងនៅក្នុងឆ្នាំ ២០១៨។ ទិន្នន័យនេះអាចបញ្ជាក់ឲ្យឃើញថា ពិភពលោកកំពុងខិតចាកឆ្ងាយពីគោលដៅឈានទៅដោះស្រាយបញ្ហាប្រែប្រួលអាកាសធាតុសាកល។
កម្រិតបំភាយឧស្ម័នកាបូនិចដែលចេញពីការដុតផូស៊ីលឥន្ធនៈបានកើនឡើងដល់ ២,៧ភាគរយនៅក្នុងឆ្នាំ ២០១៨។ នេះជាការអះអាងរបស់ប្រធានវិទ្យាស្ថានស្រាវជ្រាវប្រែប្រួលអាកាសធាតុ Tyndall លោកស្រី Corinne Le Quere នៅថ្ងៃពុធទី ៥ខែធ្នូ នៅក្នុងសាកលវិទ្យាល័យ East Anglia។
បើតាមការចុះផ្សាយរបស់ទីភ្នាក់ងារព័ត៌មាន AFP លោកស្រី Corinne Le Quere ដែលជាអ្នកដឹកនាំអ្នកវិទ្យាសាស្ត្រផ្សេងទៀតជិត ៨០រូបនេះដើម្បីចងក្រងរបាយការណ៍ស្រាវជ្រាវវិទ្យាសាស្ត្រនេះ បានសង្កត់ធ្ងន់ថា ទិន្នន័យថ្មីនេះអាចធ្វើឲ្យលទ្ធភាពសម្រេចតាមគោលដៅកំណត់ក្នុងកិច្ចព្រមព្រៀងអាកាសធាតុក្រុងប៉ារីសឆ្នាំ២០១៥ កាន់តែស្តួចស្តើងដែរ។
«កំណើននៃការបំភាយឧស្ម័នកាបូនិចទូទាំងពិភពលោកកំពុងធ្វើឲ្យគោលដៅមានចែងក្នុងកិច្ចព្រមព្រៀងអាកាសធាតុក្រុងប៉ារីសស្ថិតក្នុងគ្រោះថ្នាក់។ វាមិនគ្រប់គ្រាន់ឡើយដោយត្រឹមគាំទ្រថាមពលកកើតឡើងវិញនោះ។ ការប្រឹងប្រែងបញ្ចប់ការបញ្ចេញឧស្ម័នកាបូនិចក្នុងវិស័យសេដ្ឋកិច្ចចាំបាច់ត្រូវបង្កើនឡើងថែមទៀត»។ លោកស្រី Corinne និយាយដូច្នេះ។
របាយការណ៍វិទ្យាសាស្ត្រដដែលនេះបានរកឃើញផងដែរថា ការប្រើប្រាស់ថាមពលស្អាតមានថាមពលសូឡា ឬពន្លឺព្រះអាទិត្យ និងថាមពលខ្យល់ដើម្បីធានាប្រសិទ្ធិភាព និង និរន្តរភាពនៃថាមពល នៅតែតិចតួចជាងកំណើនការដឹកជញ្ជូនទំនិញ កំណើនមធ្យោបាយធ្វើដំណើរ និងការហោះហើរផ្លូវអាកាស។
គេរកឃើញផងដែរថា ឧស្ម័នកាបូនិចដែលចេញពីរោងចក្រធ្យូងថ្មមានចំណែកដល់ ៤០ភាគរយនៃឧស្ម័នកាបូនិចដែលភាយចេញទៅកាន់បរិយាកាសលើពិភពលោក។ ចំណែកការប្រើប្រាស់ប្រេង និងឧស្ម័នក៏បន្តកើនឡើងខ្លាំងដែរក្នុងរយៈពេលមួយទសវត្សរ៍ចុងក្រោយ។ មហាអំណាចសេដ្ឋកិច្ចទីពីរ «ចិន» បញ្ចេញឧស្ម័នកាបូនិចក្នុងទំហំ ២៧ ភាគរយនៃបរិមាណឧស្ម័នកាបូនិចទាំងអស់ ហើយសំខាន់បំផុតក្នុងឆ្នាំ ២០១៨នេះ កម្រិតបញ្ចេញឧស្ម័នកាបូនិចនៅចិនកើនឡើងរហូតដល់ ៤,៧ភាគរយថែមទៀត។ ចំណែកមហាអំណាចសេដ្ឋកិច្ចទីមួយ សហរដ្ឋអាមេរិកឯណោះវិញ ក៏មានចំណែក ១៥ ភាគរយក្នុងបរិមាណឧស្ម័នកាបូនិចដែលបញ្ចញទៅបរិយាកាសទូទាំងពិភពលោកដែរ ដែលវាមានកំណើនរហូតដល់ ២,៥ភាគរយដែរ បើប្រៀបធៀបនឹងឆ្នាំមុន។
តាមពិតទៅកម្រិតសាយភាយឧស្ម័នកាបូនិចកើនឡើងពីរឆ្នាំជាប់គ្នាក្រោយស្ថិតនៅកម្រិតមួយថេរអស់បីឆ្នាំ ហើយឆ្នាំមុនកម្រិតបំភាយនេះកើនឡើងត្រឹម ១,៦ ភាគរយប៉ុណ្ណោះ។ ប៉ុន្តែដល់ឆ្នាំនេះកម្រិតឧស្ម័នផ្ទះកញ្ចក់នេះស្រាប់តែកើនឡើងកាន់តែខ្លាំងថែមទៀត។
កិច្ចព្រមព្រៀងអាកាសធាតុក្រុងប៉ារីសមានគោលដៅទប់ស្កាត់ការកើនឡើងកម្តៅនៃភពផែនដីឲ្យត្រឹម ២ អង្សា ហើយបើអាចឲ្យកាន់តែទាបត្រឹម ១,៥អង្សានៅត្រឹមឆ្នាំ ២១០០ ធៀបនឹងកម្រិតមុនសម័យបដិវត្តន៍ឧស្សាហកម្ម។ កិច្ចព្រមព្រៀងដដែលនេះក៏តម្រូវឲ្យបណ្តាប្រទេសអភិវឌ្ឍទាំងអស់កៀងគរហិរញ្ញវត្ថុឲ្យបាន ១០០ពាន់លានដុល្លារត្រឹមឆ្នាំ ២០២០ ដើម្បីជួយគាំទ្រប្រទេសកំពុងអភិវឌ្ឍដោះស្រាយបញ្ហាប្រែប្រួលអាកាសធាតុនេះ។
គណៈកម្មការអន្តររដ្ឋាភិបាលអង្គការសហប្រជាជាតិស្តីពីការប្រែប្រួលអាកាសធាតុ(IPCC) បានបញ្ជាក់ថា កម្រិតឧស្ម័នកាបូនិចបំភាយទៅកាន់បរិយាកាសត្រូវតែកាត់បន្ថយឲ្យបាន ៥០ភាគរយត្រឹម ២០៣០ និងកាត់បន្ថយឲ្យអស់ទាំងស្រុងត្រឹមឆ្នាំ ២០៥០ខាងមុខផង បើសិនជាពិភពលោកចង់រក្សាកម្រិតសីតុណ្ហភាពត្រឹម ១,៥អង្សា។
តាមពិតទៅ ការបញ្ចេញរបាយការណ៍ថ្មីនេះដែរក៏កើតឡើងស្របពេលដែលប្រជាជនជិត ២០០ទូទាំងពិភពលោកប្រមូលផ្តុំគ្នានៅវេទិកាអាកាសធាតុលើកទី ២៤ក្រោមក្របខណ្ឌអង្គការសហប្រជាជាតិនៅ ទីក្រុងKatowice ប្រទេសប៉ូឡូញដើមសប្តាហ៍នេះ។ គោលដៅសំខាន់នៃកិច្ចប្រជុំឆ្នាំនេះគឺបញ្ចប់ការចរចាបង្កើតសៀវភៅណែនាំក្នុងការអនុវត្តកិច្ចព្រមព្រៀងអាកាសធាតុក្រុងប៉ារីសឆ្នាំ ២០១៥ដែលផ្តោតលើការតាមដាន វាយតម្លៃ និងកំណត់ពីវិធីសាស្ត្រផ្គត់ផ្គង់ហិរញ្ញវត្ថុសម្រាប់ការដោះស្រាយបញ្ហាប្រែប្រួលអាកាសធាតុសាកលនេះដូចគ្នា។