ជាតិ
វត្តបទុមវត្តី បើកវគ្គបដិបត្តិធុតង្គជាលើកទី៣ ដើម្បីអប់រំផ្លូវចិត្ត រូបពីបណ្ណាល័យចែករំលែក
× ភ្នំពេញ៖ ដើម្បីបានជាគ្រាប់ពូជនៃការសន្សំបុណ្យ តាមមនោទ្វារនៃវិបស្សនាធុរៈ ដែលជាមាគ៌ាអប់រំចិត្តដ៏សុក្រឹត្យ ក្នុងព្រះពុទ្ធសាសនា វត្តបទុមវតី្ត នឹងបើកវគ្គបដិបត្តិធុតង្គជាលើកទី៣ សម្រាប់ព្រះសង្ឃ សិស្សនិស្សិត និងពុទ្ធបរិស័ទទូទៅ ដោយមិនគិតថ្ងៃ។ ការបដិបត្តិនេះ មានរយៈពេល៥ថ្ងៃពេញ ចាប់ពីថ្ងៃទី១២ ដល់ថ្ងៃទី១៦ ខែមករា ឆ្នាំ១០១៩។
វគ្គបដិបត្តិធុតង្គនេះ ធ្វើឡើងដើម្បីជាការសិក្សាអប់រំចិត្តឲ្យស្ងប់រម្ងាប់ប្រាសចាកនីវរណធម៌ និងកិលេសទាំងពួង តាមមាគ៌ាព្រះពុទ្ធ ក្នុងគោលដៅលើកកម្ពស់តម្លៃសីលធម៌សង្គម និងសុខដុមនីយកម្មសាសនា ព្រមទាំងញ៉ាំងឲ្យការបដិបត្តិនូវព្រហ្មចរិយធម៌ក្នុងពុទ្ធសាសនមណ្ឌល ឲ្យកាន់តែទូលំទូលាយ និងប្រសើរឡើង។
អ្នកចូលរួមទាំងព្រះសង្ឃ និងគ្រហស្ថ នឹងទទួលបានការឧបត្ថម្ភចង្ហាន់ និងអាហារ ភេសជ្ជៈ ព្រមទាំងកន្លែងស្នាក់នៅ។ អ្នកមានចំណាប់អារម្មណ៍ចង់ចូលរួម សូមចុះឈ្មោះនៅវត្តបទុមវតី្ត(សាលាធម្មសភា) ដែលស្ថិតក្នុងសង្កាត់ចតុមុខ ខណ្ឌដូនពេញ ចាប់ពីពេលនេះ រហូតដល់ថ្ងៃទី៩ខែមករាឆ្នាំ២០១៩ ដោយភ្ជាប់មកជាមួយរូបថត ៤x៦ ចំនួន១សន្លឹក ដើម្បីរៀបចំប្រកាសនីយបត្រ៕
Tag:
ភ្នំពេញ
សាសនា
បដិបត្តិធុតង្គ
© រក្សាសិទ្ធិដោយ thmeythmey.com