អន្តរជាតិ
×![]()
ប្រធានាធិបតីអាមេរិក ដូណាល់ ត្រាំ បានសម្រេចចិត្តតែងតាំងអ្នកនាំពាក្យក្រសួងការបរទេស និងអតីតអ្នកកាសែត Fox News លោកស្រី Heather Nauert ជំនួសឲ្យអគ្គរដ្ឋទូតប្រចាំអង្គការសហប្រជាជាតិបច្ចុប្បន្ន លោកស្រី Nikki Haley។ នេះបើតាមប្រភពដែលដឹងលឺពីការសម្រេចចិត្តនេះ ប្រាប់ទៅកាន់សារព័ត៌មាន Bloomberg នៅថ្ងៃទី០៦ ខែធ្នូ។ 
លោកស្រី Nauert បានសម្រេចទទួលយកតំណែងនេះ ជំនួសឲ្យលោកស្រី Haley ដែលបានប្រកាសកាលពីខែតុលាថា នឹងលាលែងពីតំណែងនាដំណាច់ឆ្នាំ២០១៨ខាងមុខ។ យោងតាមប្រភពដដែលនេះ ការតែងតាំងរបស់លោកស្រី នឹងត្រូវប្រកាសនៅថ្ងៃសុក្រទី ០៧ ខែធ្នូ។
តាមពិតទៅ លោកស្រី Heather Nauert វ័យ ៤៨ឆ្នាំ ហាក់មិនសូវសាកសមនឹងតួនាទីជាបេសកជនការទូតប្រចាំអង្គការអន្តររដ្ឋាភិបាលនេះឡើយ ដ្បិតលោកស្រី មានបទពិសោធន៍តិចតួចខាងផ្នែកនយោបាយ និងការទូត។ ហើយមុននឹងក្លាយអ្នកនាំពាក្យក្រសួងការបរទេសកាលពីខែមេសា ឆ្នាំ២០១៧ លោកស្រី Nauert ជាអតីតអ្នកសារព័ត៌មានបម្រើការនៅទូរទស្សន៍ Fox News។
យ៉ាងណាក៏ដោយ លោកស្រី Nauert បានទទួលការទុកចិត្តទុកថ្លើមពីរដ្ឋមន្ត្រីការបរទេសអាមេរិក លោក ម៉ៃ ប៉ុមប៉េអូ។ លើសពីនេះ លោកស្រីក៏មានភាពស្និទ្ធស្នាលជាមួយកូនស្រីលោកត្រាំ គឺលោកស្រី Ivanka Trump និងស្វាមីលោកស្រី គឺលោក Jared Kushner ថែមទៀតផង៕
Tag:
ដូណាល់ ត្រាំ
អគ្គរដ្ឋទូតប្រចាំUN
© រក្សាសិទ្ធិដោយ thmeythmey.com
