របាយការណ៍៖ ស្ត្រីមីយ៉ាន់ម៉ារាប់ពាន់នាក់ត្រូវជួញដូរ និងបង្ខំឲ្យរៀបការជាមួយបុរសចិន

អន្តរជាតិ

របាយការណ៍៖ ស្ត្រីមីយ៉ាន់ម៉ារាប់ពាន់នាក់ត្រូវជួញដូរ និងបង្ខំឲ្យរៀបការជាមួយបុរសចិន

07, Dec 2018 , 4:27 pm

រូបភាព

ដោយ: សៅ ផលនិស្ស័យ (Sao Phal Niseiy)

ស្ត្រី និងក្មេងស្រីៗមីយ៉ាន់ម៉ារាប់ពាន់នាក់ដែលរស់នៅតំបន់ភាគខាងជើងកំពុងរងគ្រោះដោយសារ ការជួញដូរទៅកាន់ប្រទេសចិន និងត្រូវបង្ខំឲ្យរៀបការជាមួយបុរសជនជាតិចិនផង។ នេះជាការបញ្ជាក់របស់របាយការណ៍សិក្សាថ្មីមួយដែលចិនផ្សាយនៅសុក្រទី ៧ខែធ្នូនេះ។

របាយការណ៍សិក្សាមួយដោយសាលាសុខភាពសាធារណៈនៃសាកលវិទ្យាល័យ John Hopkins បានបង្ហាញថា ស្ត្រីនិងក្មេងស្រីៗជនជាតិមីយ៉ាន់ម៉ាច្រើនពាន់នាក់ដែលកំពុងស្ថិតក្រោមជួញដូរទៅកាន់ប្រទេសចិន។ ពួកគេភាគច្រើនជាពលរដ្ឋរស់នៅតំបន់ភាគខាងជើងមានរដ្ឋកាឈិន និងរដ្ឋសាន ដែលសុទ្ធសឹងជាកន្លែងដែលរងគ្រោះដោយសារជម្លោះប្រដាប់អាវុធ។

យោងតាទីភ្នាក់ងារព័ត៌មាន AFP ដែលដកស្រង់របាយការណ៍សិក្សាទីមួយរបស់ស្ថាប័នស្រាវជ្រាវខាងលើនេះ ស្ត្រី និងក្មេងស្រីមីយ៉ាន់ម៉ាប្រហែល ៧៥០០នាក់បានរងគ្រោះដោយសារការលក់ និងត្រូវបង្ខំឲ្យពួកគេរៀបការជាមួយបុរសជនជាតិចិន។ របាយការណ៍រកឃើញថា ស្ត្រីខ្លះដែលត្រូវបង្ខំឲ្យរៀបការនោះអាចមានជីវិតអាពាហ៍ពិពាហ៍ជោគជ័យ ប៉ុន្តែច្រើនផ្សេងទៀតត្រឹមតែត្រូវគេជួលឲ្យពពោះ ហើយបន្ទាប់មកត្រូវគេលក់បន្តទៀតប៉ុណ្ណោះ។

តាមពិតទៅ របាយការណ៍ស្រាវជ្រាវនេះដែរ ត្រូវបានចងក្រងដោយមានការជួបសម្ភាសជាមួយជនរងគ្រោះជាច្រើននាក់ដែលបានរត់គេចខ្លួននិងត្រឡប់មកមីយ៉ាន់ម៉ាវិញដោយសមត្ថភាព រួមជាមួយស្ត្រីមួយចំនួនដែលកំពុងរស់នៅប្រទេសចិនដែរ។

អ្នកស្រាវជ្រាវ និងចងក្រងរបាយការណ៍នេះលោក W. Courtland Robinson បានអះអាងថា ដើមហេតុចម្បងដែលធ្វើឲ្យប្រជាជនមីយ៉ាន់ម៉ាទាំងនោះធ្លាក់ខ្លួនជាជនរងគ្រោះក្នុងអំពើជួញដូរគឺ ភាពក្រីក្រហ បាត់បង់ជម្រក និងជម្លោះប្រដាប់អាវុធរ៉ាំរ៉ៃផងដែរ។ ហើយកត្តាតម្រូវការភរិយាខ្ពស់ក្នុងចំណោមបុរសជនជាតិចិនក៏ជាមូលហេតុសំខាន់ដែលធ្វើឲ្យការជួញដូរនេះផុសផុលដែរ។

តាមពិតទៅ ការអនុវត្តគោលនយោបាយកូនមួយរាប់ទសវត្សរ៍មកនេះ ធ្វើឲ្យចំនួនស្ត្រីចិនមានតិចជាងបុរសរហូតដល់ ៣៣លាននាក់ឯណោះ។ វាជាកត្តាជំរុញឲ្យបុរសចិនភាគច្រើននៅលីវ និងត្រូវស្វែងរកភរិយាមកពីបរទេស។ ទីភ្នាក់ងារព័ត៌មាន AFP ដដែលបានបញ្ជាក់ថា ដើម្បីដោះស្រាយខ្វះស្ត្រីក្នុងស្រុកនេះ ស្ត្រីបរទេសជាច្រើនម៉ឺននាក់ដែលភាគច្រើនមកប្រទេសក្រីក្ររួមមានឡាវ វៀតណាម កម្ពុជា និងមីយ៉ាន់ម៉ា ត្រូវបានលក់ទៅកាន់ប្រទេសចិន ហើយខ្លះទៀតស្ម័គ្រចិត្តរៀបការដោយខ្លួនហើយ និងមានខ្លះចាញ់បោកមេខ្យល់ដែរ។

ពាក់ព័ន្ធនឹងការបង្ខំឲ្យរៀបការជាមួយបុរសជនជាតិចិននេះដែរលោកស្រី Moon Nay Li ដែលជាសមាជិកសមាគមស្ត្រីថៃនៅក្នុងរដ្ឋកាឈិន ដែលដឹកនាំការស្រាវជ្រាវផ្ទាល់ក្នុងរដ្ឋកាឈិនផង និងរដ្ឋសានផងនោះបានលើកឡើងផងដែរថា ស្ត្រីដែលរងគ្រោះភាគច្រើនត្រូវបង្ខំឲ្យយកកូនដែរ។

របាយការណ៍ដដែលនោះបង្ហាញដែរថា រៀបការជាមួយបុរសចិននោះភាគច្រើនត្រូវបានរៀបចំ និងផ្តួចផ្តើមដោយគ្រួសារស្ត្រីខ្លួនឯងផ្ទាល់ផងដោយសារជីវភាពក្រីក្រ និងមនុស្សចាស់ក្នុងភូមិផង ហើយស្ត្រីនិងក្មេងស្រីៗមិនអាចបដិសេធបានឡើយដោយសារទំនៀមទម្លាប់ និងបែបផែនរចនាសម្ព័ន្ធសង្គមដែលផ្តល់អំណាចច្រើនដល់ចាស់ទុំនោះ។

ភាគច្រើនស្ត្រីក្មេងដែលត្រូវបង្ខំឲ្យរៀបការនោះ ត្រូវគេផ្តល់តម្លៃខ្លួនម្នាក់ៗចន្លោះពីមួយម៉ឺន ទៅដល់ មួយម៉ឺនប្រាំពាន់ដុល្លារអាមេរិក។ ប៉ុន្តែអ្វីគួរឲ្យកត់សម្គាល់នោះពួកគេត្រូវបង្ខំឲ្យរៀបការជាមួយបុរសមានវ័យចំណាស់ៗ មានជំងឺ និងពិការដែលភាគច្រើនរស់នៅតាមទីជនបទដែលពិបាករកភរិយា។

យ៉ាងណាមិញ របាយការណ៍ដដែលនោះក៏បានអំពាវនាវឲ្យរដ្ឋាភិបាលមីយ៉ាន់ម៉ាចេញចំណាត់ការ បញ្ចប់ឲ្យបាននូវជម្លោះប្រដាប់អាវុធរ៉ាំរ៉ៃនៅរដ្ឋកាឈិន និងរដ្ឋសាន ដើម្បីបញ្ចប់ចលនាភៀសខ្លួនរបស់ប្រជាជនជាពិសេសស្ត្រី និងឈានទៅពង្រឹសមត្ថភាពមន្ត្រីដើម្បីប្រឆាំងការជួញដូរមនុស្សផងដែរ៕