អន្តរជាតិ
×![]()
រដ្ឋមន្ត្រីហិរញ្ញវត្ថុបារាំង លោក Bruno Le Maire ប្រកាសថាក្រុងប៉ារីស នឹងចាប់ផ្តើមយកពន្ធពីក្រុមហ៊ុនបច្ចេកវិទ្យានៅក្នុងកម្រិតជាតិ ចាប់ពីឆ្នាំ២០១៩ តទៅ ប្រសិនបើបណ្តារដ្ឋនៃសហភាពអឺរ៉ុបមិនអាចឈានដល់កិច្ចព្រមព្រៀងស្តីពី ការដាក់ពន្ធលើប្រាក់ចំណូលក្រុមហ៊ុនបច្ចេកវិទ្យាឌីជីថលក្នុងតំបន់ទេនោះ។
កាលពីថ្ងៃអង្គារទី០៤ ខែធ្នូ បណ្តារដ្ឋមន្ត្រីហិរញ្ញវត្ថុ បានបរាជ័យក្នុងការយល់ព្រមលើការយកពន្ធទៅលើប្រាក់ចំណូលលើក្រុមហ៊ុនបច្ចេកវិទ្យាឌីជីថល ទោះបីជាបារាំង រួមជាមួយអាល្លឺម៉ង់ គ្រោងនឹងជួយសង្គ្រោះសំណើ ដែលបានដាក់ចេញពីគោលដៅរបស់ខ្លួន ក្នុងការយកពន្ធពីក្រុមហ៊ុនបច្ចេកវិទ្យាធំៗ ដូចជា Google និង Facebookជាដើម។
បន្ទាប់ពីការបរាជ័យនេះ លោក Le Maire បានថ្លែងនៅលើកញ្ចក់ទូរទស្សន៍ France 2 ថ្ងៃ ៦ ខែធ្នូថា៖ «ខ្ញុំទុកពេលឲ្យបារាំងខ្លួនឯង រហូតដល់ខែមីនាឆ្នាំក្រោយ ដើម្បីឈានទៅសម្រេចកិច្ចព្រមព្រៀងមួយស្តីពី ការយកពន្ធក្នុងតំបន់អឺរ៉ុបលើក្រុមហ៊ុនបច្ចេកវិទ្យាធំៗ»។ យោងតាមទីភ្នាក់ងារព័ត៌មាន AFP រដ្ឋមន្ត្រីហិរញ្ញវត្ថុបារាំងរូបនេះបានបញ្ជាក់បន្ថែមទៀត ប្រសិនបើកិច្ចព្រមព្រៀងនេះ ពុំអាចលេចចេញជារូបរាងទេនោះ រដ្ឋាភិបាលបារាំងនឹងធ្វើវាឲ្យបាន ដោយកំណត់ពន្ធថ្នាក់ជាតិតែម្តង គិតចាប់ពីឆ្នាំ២០១៩តទៅ។
គួរបញ្ជាក់ផងដែរថា ការលើកឡើងរបស់រដ្ឋមន្ត្រីបារាំងជុំវិញការយកពន្ធពីក្រុមហ៊ុនបច្ចេកវិទ្យាយក្សនេះគឺធ្វើឡើងចំពេលដែល រដ្ឋាភិបាលលោកប្រធានាធិបតី អេម៉ានុយអែល ម៉ាក្រុង ប្រឈមមុខនឹងការប្រឆាំងតវ៉ាខ្លាំងពីប្រជាពលរដ្ឋបារាំង។ ការប្រឆាំងតវ៉ាដឹកនាំដោយ«ក្រុមពាក់អាវកាក់ពណ៌លឿន» នេះ គឺមានគោលដៅប្រឆាំងនឹងការដំឡើងថ្លៃលើប្រេង និងគោលនយោបាយសេដ្ឋកិច្ច ដែលមានភាពលម្អៀងទៅកាន់ក្រុមអ្នកជំនួញធំៗ និងក្រុមអ្នកមាន៕
Tag:
បារាំង
ពន្ធលើក្រុមហ៊ុនបច្ចេកវិទ្យា
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
