អន្តរជាតិ
ព្រំដែនខណ្ឌចែកកូរ៉េ៖ រូងក្រោមដី, ស្ថានីយ៍រថភ្លើង តំបន់គ្មានយោធា ជាគោលដៅទេសចរដ៏ទាក់ទាញ
× សេអ៊ូល៖ ព្រំដែនខណ្ឌចែកឧបទ្វីបកូរ៉េ ជាតំបន់គ្រោះថ្នាក់មួយ និងជាកន្លែងប្រឈមមុខផ្នែកយោធាដ៏ធំ និងមានសកម្មភាពខ្លាំងជាងគេមួយដែរលើពិភពលោក។ ប៉ុន្តែតំបន់នេះ ក៏ជាកន្លែងទេសចរណ៍ដ៏មានប្រជាប្រិយភាព និងគួរឲ្យទាក់ទាញមួយដែរ ដោយភ្ញៀវទេសចរមិនតិចឡើយមកពីសឹងគ្រប់ទិសទីក្នុងមួយៗឆ្នាំ បានទៅទស្សនាតំបន់មួយនេះ។ ស្ថានីយ៍រថភ្លើង រូងក្រោមដីជីកដោយកូរ៉េខាងជើង និងទីតាំងមើលទេសភាព ជាគោលដៅដែលស្រូបយកទេសចរមិនចេះដាច់។
ឧបទ្វីបកូរ៉េ ត្រូវបានបែងចែកជាពីរជាផ្លូវការក្រោយសង្គ្រាមកូរ៉េឆ្នាំ១៩៥០-១៩៥៣ ។ ចាប់ពីពេលនោះមក តំបន់នេះក្លាយជាទីតាំងដ៏គ្រោះថ្នាក់មួយ និងមានទាហានពង្រាយជាច្រើនមកពីភាគីទាំងសងខាង ក៏ដូចជាទាហានអន្តរជាតិចំណុះអង្គការសហប្រជាជាតិដែលឃ្លាំមើលការអនុវត្តបទឈប់បាញ់ដែរ។
ជាតំបន់ទេសចរណ៍ដ៏ទាក់ទាញ ព្រំដែនខណ្ឌចែកកូរ៉េទាំងពីរមានគោលដៅបីដែលមានអ្នកទៅទស្សនាមិនចេះដាច់។ ទីមួយ គឺស្ថានីយ៍រថភ្លើង Dorasan ដែលនៅមិនឆ្ងាយពីបន្ទាត់ព្រំដែនឡើយ។ ស្ថានីយ៍នេះ បើកជាផ្លូវការនៅឆ្នាំ២០០២ បន្ទាប់ពីកូរ៉េទាំងពីរប្រកាសភ្ជាប់ខ្សែរថភ្លើងគ្នា។ Dorasan មានចម្ងាយ៥៦គីឡូម៉ែត្រពីស្ថានីយ៍សេអ៊ូល ចម្ងាយ១៧គីឡូម៉ែត្រពីស្ថានីយ៍ Gaesong ដែលជាតំបន់ឧស្សាហកម្មក្នុងទឹកដីកូរ៉េខាងជើង និងចម្ងាយ២០៥គីឡូម៉ែត្រពីស្ថានីយ៍ព្យុងយ៉ាង។
ខណៈកូរ៉េទាំងពីរកំពុងសិក្សាលើស្ថានភាពផ្លូវដែករួមគ្នានោះ ស្ថានីយ៍ Dorasan បានក្លាយជាគោលដៅទាក់ទាញចំណាប់អារម្មណ៍នោះ។ នោះក៏ព្រោះតែ ស្ថានីយ៍នេះនឹងក្លាយជាច្រកទៅកាន់តំបន់អាស៊ីបូព៌ាដ៏ធំល្វឹងល្វើយ ពេលប្រព័ន្ធខ្សែរថភ្លើងអន្តរកូរ៉េ ត្រូវជាភ្ជាប់ជាមួយបណ្ដាយផ្លូវរថភ្លើងចិន និងប្រព័ន្ធរថភ្លើងរុស្ស៊ី ដែលជាបង្កើតទៅជាប្រព័ន្ធដឹកជញ្ជូនតាមផ្លូវដែកដ៏ធំមួយនៅតំបន់អឺរ៉ាស៊ីនៅថ្ងៃអនាគត។
នៅមិនឆ្ងាយប៉ុន្មានពីស្ថានីយ៍ Dorasan គឺទីតាំងសង្កេតដែលស្ថិតលើកំពូលភ្នំមួយក្នុងទឹកដីកូរ៉េខាងត្បូង ក្បែរព្រំដែនជាមួយកូរ៉េខាងជើង។ ផ្លូវទៅកាន់ទីនោះ អមព័ទ្ធដោយរបងបន្លាលួសខ្ពស់។ អាគារលើភ្នំ គេអាចមើលឃើញទឹកដីកូរ៉េខាងជើងយ៉ាងច្បាស់ ជាពិសេសទីក្រុងឧស្សាហកម្មកេសុង ដែលជានិមិត្តរូបកិច្ចសហប្រតិបត្តិការសេដ្ឋកិច្ចរវាងកូរ៉េទាំងពីរ ប៉ុន្តែត្រូវបានបិទដោយសារការឡើងកម្ដៅក្នុងទំនាក់ទំនងអន្តរកូរ៉េ។
គោលដៅដ៏មានប្រជាប្រិយភាពមួយទៀត គឺរូងក្រោមដីទីបី។ មានទីតាំងក្នុងតំបន់គ្មានយោធា រូងក្រោមដីទីបីនេះ ត្រូវបានជីកដោយកូរ៉េខាងជើង និងត្រូវបានកូរ៉េខាងត្បូងរកឃើញដោយចៃដន្យនៅទសវត្សរ៍ឆ្នាំ១៩៧០ ។ កូរ៉េខាងត្បូងចោទកូរ៉េខាងជើងថា ជីករូងក្រោមដីនេះដើម្បីឈ្លានពានខ្លួន តែកូរ៉េខាងជើងអះអាងថា ជាប្រតិបត្តិការជីករករ៉ែប៉ុណ្ណោះ។ រូងនេះមានប្រវែង១៦៣៥ម៉ែត្រ ជម្រៅ៧៣ម៉ែត្រពីផ្ទៃដី និងមានកម្ពស់២ម៉ែត្រ។
ដោយឡែក តំបន់សន្តិសុខរួម (JSA) ដែលស្ថិតក្នុងភូមិប៉ាន់មុនជុមនោះ ត្រូវបានបិទមិនឲ្យមានការចេញចូលឡើយសព្វថ្ងៃនេះ។ មន្ត្រីកូរ៉េទាំងពីរ និងមន្ត្រីអង្គការសហប្រជាជាតិ ជួបគ្នានៅទីនោះដើម្បីជជែកពីការអនុវត្តកិច្ចព្រមព្រៀងរវាងកូរ៉េទាំងពីរ ជុំវិញការដកអាវុធចេញពី JSA ។ គេរំពឹងថា ក្រោយរំសាយអាវុធ ទេសចរអាចធ្វើដំណើរទៅកាន់ទីនោះដោយគ្មានបារម្ភពីគ្រោះថ្នាក់អ្វីឡើយ៕
Tag:
កូរ៉េខាងជើង
កូរ៉េខាងត្បូង
© រក្សាសិទ្ធិដោយ thmeythmey.com