ជាតិ
×![]()
ភ្នំពេញ៖ ក្រោយបញ្ចប់សវនការលើសំណុំរឿងរបស់មេសហជីពទាំង៦រូប ពាក់ព័ន្ធនឹងការប្រព្រឹត្តហិង្សាដោយចេតនា តុលាការរាជធានីភ្នំពេញ ពុំទាន់ប្រកាសសាលក្រមភ្លាមៗនោះទេ ដោយលើកពេលទៅប្រកាសនៅថ្ងៃទី១១ ខែធ្នូ ឆ្នាំ២០១៨វិញ។
ក្នុងសាលសវនាការ នាព្រឹក ថ្ងៃទី៧ ខែធ្នូនេះ ដើមបណ្តឹង និងជាជនរងគ្រោះ លោក ទឹម វុទ្ធី ដែលជានាយរងប៉ុស្តិ៍នគរបាលរដ្ឋបាលវាលវង់ ខណ្ឌ៧មករា បានទាមទារសំណងជំងឺចិត្ត៤០លានរៀល។ នេះបើអ្នកស្រី សារីបុត្រ ចរិយា ប្រធានការពារចុងបណ្តឹង។
អ្នកស្រី បានបន្តថា ចំពោះប្រាក់សំណង៤០លានរៀល របស់ដើមបណ្តឹងខាងលើ គឺវាមិនបានបង្ហាញ និងសំដៅលើបុគ្គលណាម្នាក់ ក្នុងចំណោមមេសហជីពទាំង៦នាក់ ឬជាសំណងរួមនោះទេ ដោយត្រូវរង់ចាំ តុលាការជាអ្នកសម្រេចលទ្ធផលនៅថ្ងៃមុខ។
លោក រ៉ុង ឈុន មេសហជីពមួយរូប ក្នុងចំណោមមេសហជីពទាំង៦រូប ដែលបានជាប់បទចោទខាងលើ បានមានប្រតិកម្ម ចំពោះការទាមទារប្រាក់សំណងជំងឺចិត្ត៤០លានរៀលនេះ។ លោក ប្រាប់សារព័ត៌មានថ្មីៗតាមទូរសព្ទយ៉ាងដូច្នេះ៖«យើងមិនបានប្រព្រឹត្តខុស ទៅតាមបណ្តឹងរបស់ជនរងគ្រោះទេ ព្រោះយើងមិនបាននៅកន្លែងកើតហេតុ។ ចំពោះការដឹកនាំធ្វើកូដកម្មហ្នឹង ក្នុងគោលបំណងតែមួយគត់ គឺទាមទារប្រាក់ឈ្មួលឲ្យកម្មករ។ ពេលទទួលបណ្តឹង និងត្រូវទាមទារឲ្យបង់ប្រាក់បែបហ្នឹង វាគឺជារឿងអយុតិ្តធម៌ សម្រាប់ពួកខ្ញុំ។ ហើយអ្វីដែលយើងចង់បាន គឺការទម្លាប់បទចោទទាំងស្រុង ដោយគ្មានលក្ខខណ្ឌ»។
សូមបញ្ជាក់ថា មេសហជីពទាំង៦រូប គឺ លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា, លោក អាត់ ធន់ ប្រធានសហភាពការងារកម្ពុជា, លោក ប៉ាវ ស៊ីណា ប្រធានសហភាពចលនាកម្មករកម្ពុជា, លោក រ៉ុន ឈុន ប្រធានសហភាពសហជីពកម្ពុជា, អ្នកស្រី យ៉ាង សោភ័ណ្ឌ ប្រធានសម្ព័ន្ធសហជីពកម្មករកម្ពុជា និង អ្នកស្រី ម៉ម ញឹម ប្រធានសហព័ន្ធសហជីពនៃឧស្សាហកម្មកាត់ដេរកម្ពុជា៕
Tag:
សហជីព
សាលក្រម
មេធាវី
© រក្សាសិទ្ធិដោយ thmeythmey.com
