អន្តរជាតិ
របាយការណ៍៖ ព្រោះខួរក្បាលស្ត្រីសកម្មជាងខួរក្បាលបុរស ទើបស្ត្រីងាយមានជំងឺភ័យខ្លាច និងបាក់ទឹកចិត្ត
× របាយការណ៍ស្រាវជ្រាវមួយដែលសិក្សាលើខួរក្បាលមនុស្សប្រមាណ ៤៦០០០នាក់ដោយការប្រើឧបករណ៍ស្កែនទំនើបៗ បានទាញសេចក្តីសន្និដ្ឋានថា ខួរក្បាលរបស់ស្ត្រីមានលក្ខណៈសកម្មជាងខួរក្បាលរបស់បុរស។
របាយការណ៍ស្តីពីភាពសកម្មនៃខួរក្បាលមនុស្សនេះចងក្រងឡើងដោយក្រុមអ្នកវិទ្យាសាស្ត្រនៅឯគ្លីនិក Amen នៃកាលីហ្វ័រនីញ៉ា និងត្រូវបានចុះផ្សាយលើគេហទំព័រវេទិកាសេដ្ឋកិច្ចពិភពលោក (World Economic Forum)ថ្មីៗ។
របាយការណ៍ដដែលនេះបានបញ្ជាក់ ដោយសារភាពសកម្មដែលមាននៅក្នុងខួរក្បាលរបស់ស្ត្រីនេះហើយ ទើបជំងឺមួយចំនួនដូចជាជំងឺបាក់ទឹកចិត្ត ជំងឺភ័យខ្លាច ជំងឺគេងមិនសូវលក់ និងការហូបអាហារមិនបានទៀងទាត់ភាគច្រើនតែងកើតមាននៅលើស្ត្រីភេទ។
ការសិក្សាពីភាពខុសគ្នាក្នុងខួរក្បាលបុរស និងស្ត្រីនេះដែលមានសារសំខាន់ណាស់ ដ្បិតវាជួយឲ្យអ្នកស្រាវជ្រាវខាងផ្នែកសុខភាព និងវេជ្ជបណ្ឌិតនានាកាន់តែងាយស្រួលក្នុងការព្យបាលជំងឺដែលកើតមានជារឿយៗទាក់ទងនឹងខួរក្បាលរបស់មនុស្ស។
ភាពសកម្មនៃខួរក្បាលមនុស្សស្រីអំណោយផលដល់ការគ្រប់គ្រង់អារម្មណ៍និងរឿងរ៉ាវដែលទាក់ទងទៅនឹងផ្លូវចិត្ត។ ប៉ុន្តែភាពសកម្មនៃខួរក្បាលរបស់មនុស្សប្រុសវិញនោះអំណោយផលដល់ចក្ខុវិញ្ញាណដែរ។
តាមពិតទៅ របាយការណ៍ស្រាវជ្រាវនេះបានធ្វើឡើងក្នុងចំណោមអ្នកស្ម័គ្រចិត្ត ដែលនៅក្នុងនោះមានទាំងអ្នកជំងឺ និងអ្នកមានសុខភាពមាំមួន។ ពួកគេធ្វើសកម្មភាពសាមញ្ញមួយចំនួនក្នុងបន្ទប់ពិសោធន៍ ហើយអ្នកស្រាវជ្រាវបានប្រើឧបករណ៍ពិនិត្យខួរក្បាលពិសេសម្យ៉ាងដែលមានឈ្មោះថា Single photon emission computed tomography (SPECT) ដើម្បីចាប់យកបរិមាណលំហូរឈាមនៅក្នុងផ្នែកនីមួយៗនៃខួរក្បាល។
វេជ្ជបណ្ឌិត Gina Rippon មកពីវិទ្យាល័យ Ashton ដែលសិក្សាខាងផ្នែកខួរក្បាលមនុស្សបាននិយាយថា ការសិក្សានេះនៅតែមានភាពលំបាកសម្រាប់អ្នកវិទ្យាសាស្ត្រ ព្រោះខួរក្បាលគឺជាសារីរាង្គមួយដែលពិបាកក្នុងការស្រាវជ្រាវជាងគេក្នុងរាង្គកាយមនុស្ស ហើយវាអាចមានការផ្លាស់ប្តូររហ័សអាស្រ័យលើកត្តាសង្គម កត្តាគ្រួសារ ការអប់រំ រួមទាំងអាហារហូបចុកផងដែរ។
Tag:
សុខភាព
ខួរក្បាល
បុរស
ស្ត្រី
© រក្សាសិទ្ធិដោយ thmeythmey.com