សិល្បករ៣ជំនាន់ នឹងរួមគ្នាសម្តែងល្ខោនយីកេ«រឿងទុំទាវ»ជូនសាធារណជនទស្សនាឥតគិតថ្លៃ

ជាតិ

សិល្បករ៣ជំនាន់ នឹងរួមគ្នាសម្តែងល្ខោនយីកេ«រឿងទុំទាវ»ជូនសាធារណជនទស្សនាឥតគិតថ្លៃ

09, Dec 2018 , 2:59 pm

រូបភាព

ដោយ: ប៉ូ សាគុន

ភ្នំពេញ៖ផ្ទាំងទស្សនីយភាពល្ខោនយីកេរឿងទុំទាវ ក្រោមប្រធានបទ«ទុំទាវបីជំនាន់» នឹងសម្តែងជូនទស្សនិកជនទស្សនាដោយឥតគិតថ្លៃ នៅថ្ងៃទី១០ ខែធ្នូនេះ នៅសាលមហោស្រពចតុមុខ។ ជាទស្សនីយភាពដ៏កម្រ ដែលនឹងប្រមូលផ្ដុំសម្តែងដោយសិល្បករជំនាន់ទស្សវត្សរ៍៦០ និង៨០ និងសម័យបច្ចុប្បន្នជាង១០០នាក់។

លោក ប៊ុត ចាន់ណា ប្រធាននាយកដ្ឋានសិល្បៈទស្សនីយភាព បានបញ្ជាក់ប្រាប់សាព័ត៌មានថ្មីៗថា ការសម្ដែងនេះរៀបចំឡើងដើម្បីរំឭកដល់ការសម្ដែងរបស់សិល្បករចាស់ៗ ដែលបានរួចជីវិតពីសម័យសង្គ្រាម និងដើម្បីឱ្យក្មេងជំនាន់ក្រោយបានស្វែងយល់ ពីទម្រង់សិល្បៈខ្មែរផង។ បើតាម លោក ចាន់ណា កាលពីទសវត្សន៍ទី៨០ ល្ខោនយីកេធ្លាប់សម្ដែងបានម្ដងដែរ ដោយគ្រានោះ សិល្បកររួចជីវិតពីសង្គ្រាមនៅសល់តិចតួច។ លោក ប៊ុត ចាន់ណាបញ្ជាក់ដូច្នេះ៖«យើងចង់ឱ្យសិល្បករចាស់ៗគាត់មានការសម្ដែងជាមួយសិល្បករថ្មីៗ ដែលគាត់បានបង្ហាត់ពីមួយជំនាន់ទៅមួយជំនាន់នោះឱ្យមានស្នាដៃរួមគ្នា។ យើងក៏ចង់ឱ្យក្មេងជំនាន់ក្រោយ បានដឹងនិងស្វែងយល់ពីសិល្បៈវប្បធម៌ខ្មែរយើងដែរ»។

បើតាម លោក ចាន់ណា នាយកដ្ឋានសិល្បៈទស្សនីភាព នឹងរៀបចំឲ្យមានការសម្ដែងសិល្បៈផ្សេងៗទៀតនៅថ្ងៃខាងមុខ បើសិនមានការគាំទ្រច្រើន។

សូមបញ្ជាក់ថា ផ្ទាំងទស្សនីយភាពល្ខោនយីកេរឿងទុំទាវដ៏កម្រនេះ ចាប់ផ្តើមនៅម៉ោង៤រសៀល ថ្ងៃទី១០ ខែធ្នូ។ សាធារណជន អាចទាក់ទងទៅទូរសព្ទលេខ 086 97 97 75 និងលេខ 077 68 76 44 ដើម្បីទទួលយកសំបុត្រដោយឥតគិតថ្លៃ៕