ព័ត៍មានសុខភាព
អន្តរជាតិ
ទារកដំបូងបំផុតលើលោកកើតចេញពីម្តាយដែលប្តូរស្បូនពីអ្នកស្លាប់ម្នាក់
× ក្រុមអ្នកស្រាវជ្រាវ បានចេញផ្សាយលទ្ធផលសិក្សាមួយនៅលើទស្សនាវដ្តីវេជ្ជសាស្ត្រ The Lancet ទាក់ទងនឹងជោគជ័យនៃការបង្កើតទារកចេញពីមាតាម្នាក់ដែលបានប្តូរស្បូនពីអ្នកបរិច្ចាគម្នាក់ដែលបានទទួលមរណភាពទៅហើយ។ ករណីលើកដំបូងក្នុងប្រវត្តិវេជ្ជសាស្ត្រនេះ កើតឡើងកាលពីខែធ្នូ ឆ្នាំ២០១៧ នៅមន្ទីរពេទ្យ Hospital das Clinicas នៃសាកលវិទ្យាល័យក្រុងសៅប៉ូឡូ ប្រទេសប្រេស៊ីល។
ទារិកា ត្រូវបានប្រសូតតាមរយៈការវះកាត់ក្រោយម្តាយពរពោះ៣៦សប្តាហ៍។ បើតាមការសិក្សា នេះជាជោគជ័យជាប្រវត្តិសាស្ត្រ ដែលទារកកើតចេញពីម្តាយដែលប្រើប្រាស់ស្បួនរបស់អ្នកស្លាប់ម្នាក់ ខណៈករណី១០លើកដូចគ្នាកន្លងនៅសាធារណរដ្ឋឆេក តួកគី និងសហរដ្ឋអាមេរិក សុទ្ធតែរងបរាជ័យ។
កន្លងមក ទារកជាង១០នាក់នៅស៊ុយអែត និងសហរដ្ឋអាមេរិក បានកើតចេញពីម្តាយដែលទទួលបានស្បូនពីការបរិច្ចាគរបស់សប្បុរសជនដែលនៅរស់ ប៉ុន្តែក្រុមអ្នកជំនាញវេជ្ជសាស្ត្រទើបតែសម្រេចបានជោគជ័យជាលើកដំបូងចំពោះម្តាយដែលបានប្រើប្រាស់ស្បូនរបស់អ្នកដែលស្លាប់ទៅហើយ។
ម្ចាស់ស្បូននោះ គឺជាម្តាយអាយុ៤៥ម្នាក់ ដែលបានទទួលមរណភាពដោយសារដាច់សរសៃឈាមខួរក្បាល។ ស្បូនរបស់គាត់ត្រូវបានបរិច្ចាគឲ្យស្ត្រីអាយុ៣២ម្នាក់ទៀតដែលមានរោគសញ្ញាដ៏កម្រ ពោលគឺកើតមកដោយគ្មានស្បូន។
វេជ្ជបណ្ឌិត Dani Ejzenberg ប្រធានក្រុមផ្នែកវះកាត់ បានបញ្ជាក់ប្រាប់ AP ថា ស្ត្រីរូបនោះ ព្រួយបារម្ភយ៉ាងខ្លាំងពីការវះកាត់ព្រោះវាពិតជាមានសារសំខាន់ខ្លាំងណាស់សម្រាប់ជីវិតរបស់គាត់។ «ពេលនេះ គាត់បានបង្កើតកូនដោយជោគជ័យ។ គាត់សប្បាយចិត្តខ្លាំងណាស់»។ នេះជាការលើកឡើងរបស់វេជ្ជបណ្ឌិតជំនាញ។
ទាក់ទងនឹងករណីនេះ ស្ត្រីដែលកើតមកគ្មានស្បូន បានមានផ្ទៃពោះ បន្ទាប់ពីទទួលបានការបរិច្ចាគស្បួន។ ប៉ុន្តែការបង្កកំណើតធ្វើឡើងតាមបច្ចេកវិទ្យាបង្កកំណើតក្រៅស្បួន In Vitro Fertilization (IVF) ក្នុងរយៈពេល៧ខែ ដោយទារិកាមានការវិវត្តដូចក្មេងទូទៅ៕
Tag:
ទារក
IVF
ប្រេស៊ីល
© រក្សាសិទ្ធិដោយ thmeythmey.com