កម្ពុជា-ឡាវ ចុះហត្ថលេខាលើឯកសារចំនួន៤ ផ្តោតលើសហប្រតិបត្តការក្នុងវិស័យអប់រំ,សិល្បៈវប្បធម៌ និងការទិញ-លក់អគ្គិសនី

ជាតិ

កម្ពុជា-ឡាវ ចុះហត្ថលេខាលើឯកសារចំនួន៤ ផ្តោតលើសហប្រតិបត្តការក្នុងវិស័យអប់រំ,សិល្បៈវប្បធម៌ និងការទិញ-លក់អគ្គិសនី

09, Dec 2018 , 8:29 pm

រូបភាព

រូបភាពពីទំព័រហ្វេសប៊ុកផ្លូវការរបស់សម្ដេច ហ៊ុន សែន

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ កាលពីថ្ងៃទី ៥-៦ ខែធ្នូកន្លងទៅ សម្តេចនាយករដ្ឋមន្ត្រី ហ៊ុន សែន បានធ្វើដំណើរទៅបំពេញទស្សនកិច្ចនៅប្រទេសឡាវ តបតាមការអញ្ជើញរបស់លោក ថោងលូន ស៊ីសូលីត នាយករដ្ឋមន្ត្រីឡាវ។ ក្នុងដំណើរទស្សនកិច្ចនេះ កម្ពុជា និងឡាវ បានចុះហត្ថលេខាលើឯកសារសំខាន់ចំនួន ៤ រួមទាំងកិច្ចសហប្រតិបត្តិការមួយចំនួន។ នេះបើតាមសេចក្ដីប្រកាសព័ត៌មានរបស់ក្រសួងការបរទេស។

ដំណើរទស្សនកិច្ចរបស់សម្ដេច ហ៊ុន សែន ទៅកាន់ប្រទេសឡាវ ជាព្រឹត្តិការណ៍មួយឆ្លុះបញ្ចាំងពីទំនាក់ទំនងមិត្តភាពយូរអង្វែង និងការប្ដេជ្ញាចិត្តជំរុញកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ។ បើតាមសេចក្ដីប្រកាសខាងលើ ជំនួបទ្វេភាគីរវាងសម្ដេច ហ៊ុន សែន និងនាយករដ្ឋមន្ត្រីឡាវ លោក ថោងលូន ស៊ីសូលីត បានបញ្ជាក់ពីការប្ដេជ្ញាចិត្តក្នុងការលើកកម្ពស់ទំនាក់ទំនង និងកិច្ចសហប្រតិបត្តិការដែលផ្ដល់ផលប្រយោជន៍រវាងប្រទេសទាំងពីរ។

បន្ទាប់ពីជំនួបទ្វេភាគី នាយករដ្ឋមន្ត្រីនៃប្រទេសទាំងពីរ បានចុះហត្ថលេខាលើឯកសារសំខាន់ចំនួន ៤រួមមាន កិច្ចព្រមព្រៀងស្ដីពីកិច្ចសហប្រតិបត្តិការវិស័យអប់រំសម្រាប់រយៈពេល ៥ឆ្នាំ (២០១៩-២០២៣), អនុស្សរណៈយោគយល់គ្នាស្ដីពីកិច្ចសហប្រតិបត្តិការលើវិស័យវប្បធម៌ និងសិល្បៈឆ្នាំ២០១៩-២០២១, អនុស្សរណៈយោគយល់គ្នាស្ដីពីការបញ្ជូនសត្វដំរីសម្រាប់ការបង្ហាញសិល្បៈ និងផ្លាស់ប្តូរវប្បធម៌ និងអនុស្សរណៈស្ដីពីកិច្ចព្រមព្រៀងទិញ-លក់ថាមពលអគ្គិសនីពីស្ថានីយ បានហាត ប្រទេសឡាវ មកស្ថានីយស្ទឹងត្រែង ប្រទេសកម្ពុជា។ នេះបើតាមសេចក្ដីប្រកាសព័ត៌មានដដែល។

ដោយឡែក ទាក់ទងនឹងវិស័យសេដ្ឋកិច្ចវិញ នាយករដ្ឋមន្ត្រីទាំងពីរ បានឯកភាពគ្នាបង្កើត និងពង្រឹងបរិយាកាសអនុគ្រោះដល់ការធ្វើពាណិជ្ជកម្ម តាមរយៈការតាំងពិព័រណ៍។ ជាមួយគ្នា សម្ដេច ហ៊ុន សែន និងលោក ថោងលូន ស៊ីសូលីត បានលើកទឹកចិត្តឲ្យស្ថាប័នពាក់ព័ន្ធពន្លឿនការចុះហត្ថលេខាលើកិច្ចព្រមព្រៀមស្ដីពីការជៀសវាងការយកពន្ធត្រួត និងទប់ស្កាត់ការកេងបន្លំពន្ធ។

ក្នុងដំណើរទស្សនកិច្ចនេះ ថ្នាក់ដឹកនាំប្រទេសទាំងពីរបានឯកភាពគ្នារៀបចំកិច្ចប្រជុំគណៈកម្មការចម្រុះកម្ពុជា-ឡាវលើកទី១៣ នៅដើមឆ្នាំ២០១៩នេះ ដើម្បីពិនិត្យឡើងវិញពីសកម្មភាពកិច្ចសហប្រតិបត្តិការនាពេលបច្ចុប្បន្ន និងរិះរកលទ្ធភាពពង្រីកកិច្ចសហប្រតិបត្តិការទៅលើវិស័យផ្សេងៗ៕