អន្តរជាតិ
អាមេរិក ដាក់ទណ្ឌកម្មមន្ត្រីកំពូលទីពីររបស់កូរ៉េខាងជើងជុំវិញការរឹតត្បិតសិទ្ធិមនុស្ស លោក ឆេ យ៉ុងហេ មន្រ្តីលំដាប់ទីពីររបស់កូរ៉េខាងជើង (រូបភាព AP)
× ក្រុងវ៉ាស៊ីនតោន នៅថ្ងៃទី១០ ខែធ្នូ បានដាក់ទណ្ឌកម្មលើមន្ត្រីសំខាន់ៗកូរ៉េខាងជើងចំនួនបីរូបជុំវិញតួនាទីរបស់ពួកគេក្នុងការរឹតត្បិតសេរីភាពបញ្ចេញមតិក្នុងរដ្ឋកុម្មុយនីស្តមួយនេះ។ ម្នាក់ក្នុងចំណោមមន្ត្រីទាំងបី គឺលោក ឆេ យ៉ុងហេ (Choe Ryong-hae) មនុស្សជំនិតរបស់មេដឹកនាំកូរ៉េខាងជើង គីម ជុងអ៊ុន ។ ទណ្ឌកម្មនេះពិតជាមានឥទ្ធិពលតិចតួចលើមន្ត្រីកូរ៉េខាងជើង តែវាបានបង្ហាញពីជំហរតឹងរ៉ឹងរបស់អាមេរិកលើកូរ៉េខាងជើង ស្របពេលកំពុងរកផ្លូវដោះស្រាយបញ្ហានុយក្លេអ៊ែរនោះ។
ស្របពេលការចរចាដើម្បីរំសាយនុយក្លេអ៊ែររកច្រកចេញមិនទាន់ឃើញ អាមេរិកបានទម្លាក់កញ្ចប់ទណ្ឌកម្មថ្មីមួយទៀតលើកូរ៉េខាងជើង។ មន្ត្រីសំខាន់ៗបីរូបរបស់របបដឹកនាំក្រុងព្យុងយ៉ាងត្រូវបានដាក់ទណ្ឌកម្មលើសំណុំរឿងសិទ្ធិមនុស្ស ដែលអាមេរិកអះអាងថា មានស្ថានភាពដុនដាបបំផុតលើពិភពលោក។ រដ្ឋបាលលោក ដូណាល់ ត្រាំ និយាយថា មន្ត្រីទាំងបីនេះ មានចំណែកធំក្នុងការធ្វើឲ្យកំណត់ត្រាសិទ្ធិមនុស្សរបស់កូរ៉េខាងជើងអាក្រក់ខ្លាំង។
ជាចំណាត់ការបញ្ជាដោយសភា ក្រុងវ៉ាស៊ីនតោនបញ្ជាក់ថា ខ្លួននឹងដកហូតទ្រព្យសម្បត្តិរបស់លោក ឆេ យ៉ុងហេ មន្ត្រីលំដាប់ទីពីររបស់កូរ៉េខាងជើង និងមនុស្សស្និទ្ធប្រមុខដឹកនាំ គីម ជុងអ៊ុន ។ មន្ត្រីពីររូបទៀតមានរដ្ឋមន្ត្រីសន្តិសុខរដ្ឋ Jong Kyong Thaek ដែលទទួលខុសត្រូវលើការឆ្លើយតបចារកម្ម និងលោក Pak Kwang Ho ប្រធាននាយកដ្ឋានឃោសនាការរបស់បក្សពលករកូរ៉េ ហើយដែលមានតួនាទីក្នុងការគ្រប់គ្រងប្រព័ន្ធផ្សព្វផ្សាយ។
ក្រៅពីការរឹបអូសទ្រព្យសម្បត្តិមន្ត្រីទាំងបីនេះ អាមេរិកក៏ហាមក្រុមហ៊ុនរបស់ខ្លួនរកស៊ីជាមួយបុគ្គលជាប់បំរាមដែរ។ យ៉ាងណាមិញ គេមិនរំពឹងថា ទណ្ឌកម្មនេះជះឥទ្ធិពលខ្លាំងលើមន្ត្រីក្រុងព្យុងយ៉ាងឡើយ ប៉ុន្តែជាសញ្ញាបង្ហាញថា អាមេរិកមិនងាយទន់ភ្លន់ឡើយខណៈកូរ៉េខាងជើងកំពុងស្វែងរកការបន្ធូរបន្ថយទណ្ឌកម្មនោះ។
ការដកទណ្ឌកម្ម គឺជាការចង់បានរបស់កូរ៉េខាងជើងដើម្បីជាផ្នែកមួយនៃដំណើរការរំសាយនុយក្លេអ៊ែរ ខណៈប្រទេសនេះរងទណ្ឌកម្មជុំទិសទៅហើយ មិនថាទណ្ឌកម្មអន្តរជាតិក្រោមក្របខណ្ឌអង្គការសហប្រជាជាតិ ឬទណ្ឌកម្មឯកតោភាគីរបស់អាមេរិកឡើយ។ ប៉ុន្តែអាមេរិកមិនយល់ព្រមឡើយ និងដាក់លក្ខខណ្ឌឲ្យកូរ៉េខាងជើងធ្វើសកម្មភាពឲ្យជាក់លាក់សិន មុននឹងទណ្ឌកម្មអាចនឹងត្រូវបានផ្អាក ឬលុបចោលបាននោះ។
ការដាក់ទណ្ឌកម្មពេលនេះ ហាក់ផ្ទុយពីនយោបាយរបស់លោក ត្រាំ ចំពោះកូរ៉េខាងជើង។ កន្លងមក ប្រធានាធិបតីរូបនេះតែងលើកឡើងពីទំនាក់ទំនងពិសេសរវាងលោក និងលោក គីម ក្រោយជំនួបខែមិថុនានៅសិង្ហបុរី។ យ៉ាងណាក្ដី ការរៀបចំជំនួបលើកទីពីរ កំពុងជាប់ទ្រឹងនៅឡើយ ខណៈមន្ត្រីភាគីទាំងពីរមិនទាន់បានជួបគ្នាដើម្បីជជែកគ្នានៅឡើយ៕
Tag:
អាមេរិក
កូរ៉េខាងជើង
© រក្សាសិទ្ធិដោយ thmeythmey.com