អត្ថបទពាណិជ្ជកម្ម
បុគ្គលិកធនាគារឯកទេស ខេប៊ី ដេហាន រួមគ្នាដាំកូនដើមកោងកាង ដើម្បីជំរុញអេកូទេសចរណ៍ និងថែបរិស្ថាន
×![]()
ដោយ: ថ្មីៗ
បុគ្គលិក និងថ្នាក់គ្រប់គ្រងរបស់ធនាគារឯកទេស ខេប៊ី ដេហាន បានរួមគ្នាដាំកូនដើមកោងកាង តាមមាត់សមុទ្រ ដើម្បីចូលរួមបង្កើនទិន្នផលនេសាទ ជីវិតសត្វស្លាប និងជំរុញអេកូទេសចរណ៍។ សកម្មភាពនេះ ធ្វើឡើងកាលពីថ្ងៃទី៩ ខែធ្នូ ឆ្នាំ២០១៨ នៅសហគមន៍ត្រពាំងសង្កែ ដែលស្ថិតក្នុងឃុំត្រពាំងសង្កែ ស្រុកទឹកឈូ ខេត្តកំពត។
ដើមកោងកាង ជាប្រភេទរុក្ខជាតិដ៏មានប្រយោជន៍ច្រើនយ៉ាង ដូចជា របាំងយ៉ាងរ៉ឹងមាំសម្រាប់ការពារខ្យល់ព្យុះ ឬរលកសមុទ្រមិនឲ្យបោកបក់បំផ្លាញដំណាំ និងផ្ទះប្រជាពលរដ្ឋដែលរស់នៅតំបន់ឆ្នេរ សមុទ្រ។ ជាពិសេសព្រៃកោងកាង អាចបង្កើតជាតំបន់អេកូទេសចរណ៍ធម្មជាតិ ដែលអាចរក្សាការពារតម្លៃនៃធនធានធម្មជាតិ ឲ្យមាននិរន្តរភាព និងទាក់ទាញភ្នែកទេសចរ បង្កើតឱកាសការងារ និងប្រាក់ចំណូលដល់ប្រជាពលរដ្ឋក្នុងសហគមន៍ តាមរយៈវិស័យទេសចរណ៍។
ដោយផ្អែកលើអត្ថប្រយោជន៍ទាំងនេះ ធនាគារឯកទេស ខេប៊ី ដេហាន បានរៀបចំឲ្យមានការដាំកូនដើមកោងកាង ក្នុងកម្មវិធីដំណើរកម្សាន្តប្រចាំឆ្នាំរបស់បុគ្គលិក ដើម្បីរួមចំណែកបំផុសគំនិតដល់មហាជន និងបុគ្គលិករបស់ខ្លួន ឲ្យស្រលាញ់ និងចូលរួមថែរក្សាការពារបរិស្ថាន។ កម្មវិធីនេះបង្ហាញយ៉ាងជាក់ច្បាស់អំពីការចូលរួមចំណែកនូវសកម្មភាពសង្គម ការស្រលាញ់ ការសហការគ្នារវាងបុគ្គលិក និងបុគ្គលិកទាំងក្នុងការងារ និងសកម្មភាពសង្គម។ សកម្មភាពនេះ ក៏បញ្ជាក់ឲ្យឃើញដែរថា ធនាគារឯកទេស ខេប៊ី ដេហាន កំពុងផ្សារភ្ជាប់អាជីវកម្មរបស់ខ្លួន ទៅនឹងសង្គមជាតិ។
សូមបញ្ជាក់ ថាធនាគារឯកទេស ខេប៊ី ដេហាន មានភាគទុនិករ៉ឹងមាំ មកពីប្រទេសកូរ៉េខាងត្បូង និងបានសម្ពោធដំណើការជាផ្លូវការនៅប្រទេសកម្ពុជា កាលពីថ្ងៃទី៦ ខែកញ្ញា ឆ្នាំ២០១៨ ដែលការិយាល័យកណ្តាលនៅអាគារលេខ១ វិមានការិយាល័យអូវល ជាន់ទី២១ និង២២ តាមបណ្តោយផ្លូវលេខ៣៦០ សង្កាត់បឹងកេងកង១ ខណ្ឌចំការមន រាជធានីភ្នំពេញ។ គោលដៅចម្បងរបស់ធនាគារឯកទេស ខេប៊ី ដេហាន គឺចូលរួមលើកស្ទួយជីវភាពរស់នៅប្រជាពលរដ្ឋកម្ពុជា ឲ្យកាន់តែប្រសើរឡើង ពង្រឹងសមត្ថភាពបុគ្គលិក និងផ្តល់សេវាកម្មល្អបំផុតស្របតាមតម្រូវការរបស់អតិថិជន៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
