អត្តពលិកជាតិនិងអន្តរជាតិប្រមាណជា១ពាន់នាក់មកពី៤២ប្រទេស បានចុះឈ្មោះចូលរួមរត់ប្រណាំងចម្ងាយឆ្ងាយ Ultra Trail Angkor នៅខេត្តសៀមរាប ដែលប្រព្រឹត្តទៅចាប់ពីថ្ងៃទី១៩-២០ មករា ឆ្នាំ២០១៩។ ក្រៅពីប្រមូលនិធិសប្បុរសធម៌ ព្រឹត្តិការណ៍នេះ ធ្វើឡើងដើម្បីផ្សព្វផ្សាយ និងទាក់ទាញភ្ញៀវទេសចរឲ្យមកទស្សនាតំបន់ប្រវត្តិសាស្ត្រនៅខេត្តសៀមរាប។ ថ្នាក់ដឹកនាំរំពឹងថា ព្រឹត្តិការណ៍នេះនឹងអាចទាក់ទាញអត្តពលិកជាង១ពាន់នាក់ចូលរួម ខណៈការចុះឈ្មោះនឹងបន្តរហូតជិតដល់ថ្ងៃប្រកួត។
គិតត្រឹមថ្ងៃទី១១ ខែធ្នូ ឆ្នាំ២០១៨ មានអត្តពលិកជិត១ពាន់នាក់ហើយ បានចុះឈ្មោះចូលរួមរត់ប្រណាំងក្នុងព្រឹត្តិការណ៍ Ultra Trail Angkor ដែលរៀបចំនៅបរិវេណតំបន់ប្រវត្តិសាស្ត្រអង្គរក្នុងខេត្តសៀមរាប។ ចំនួននេះ មានការកើនឡើងប្រមាណ៥ភាគរយបើធៀបនឹងឆ្នាំមុន ដែលមានចំនួនជិត៨០០នាក់់ចូលរួម។ តែយ៉ាងណាចំនួននេះ នឹងមានការប្រែប្រួល ព្រោះការចុះឈ្មោះនឹងបិទបញ្ជីមុនពីរថ្ងៃនៃការប្រកួត ដែលធ្វើឡើងចន្លោះពីថ្ងៃទី១៩-២០ ខែមករា ឆ្នាំ២០១៩។
អត្តពលិកទាំងនេះមកពី៤២ប្រទេស ដែលភាគច្រើនមកពីប៉ែកអឺរ៉ុប ខណៈបច្ចុប្បន្នបារាំងឈរកំពូលតារាងមានអ្នកចូលរួមច្រើនជាងគេ។ ក្រៅពីកម្ពុជា ក៏មានប្រទេសក្នុងតំបន់អាស៊ាន និងអាស៊ីមួយចំនួនចូលរួមផងដែរ រួមមានជប៉ុន ចិន សិង្ហបុរី និងម៉ាឡេស៊ីជាដើម។ ក្រៅពីវិញ្ញាសារត់ចម្ងាយ១២៨គីឡូម៉ែត្រព្រឹត្តិការណ៍នេះ ក៏មានវិញ្ញាសារត់ចម្ងាយ៦៤គីឡូម៉ែត្រ, ៣២គីឡូម៉ែត្រ និង១៦គីឡូម៉ែត្រផងដែរ។
អគ្គលេខាធិការនៃគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន បានបញ្ជាក់ថា ព្រឹត្តិការណ៍រត់ចម្ងាយឆ្ងាយនេះ រៀបចំដោយទទួលបានជំនួយផ្នែកបច្ចេកទេសពីអ្នកជំនាញមកពីបារាំង ក្រោមកិច្ចសហការរបស់អាជ្ញាធរជាតិអប្សរា និងសមត្ថកិច្ចមូលដ្ឋានក្នុងខេត្តសៀមរាប។ ការធ្វើបែបនេះ គឺដើម្បីឲ្យព្រឹត្តិការណ៍ទេសចរណ៍កីឡាមួយនេះប្រព្រឹត្តទៅដោយរលូននិងប្រកបដោយសុខសុវត្ថិភាព។
ជាមួយគ្នានេះ លោក Edouard George ប្រធានគណៈកម្មការរៀបចំព្រឹត្តិការណ៍បានអះអាងថា លោកនឹងបំពាក់ឧបករណ៍វាស់ចម្ងាយនៅតាមតំបន់សំខាន់ៗមួយចំនួន ដើម្បីឲ្យលទ្ធផលនៃការប្រកួតមានភាពសុក្រិត និងយុត្តិធម៌ ពិសេសស្របតាមស្តង់ដារអន្តរជាតិ។ លោកបានចាត់ទុកថា នេះជាឆ្នាំជោគជ័យមួយរបស់កម្ពុជា ដែលទទួលបានការគាំទ្រច្រើនពីអត្តពលិកអន្តរជាតិ។
ក្រៅពីប្រមូលមូលនិធិជួយដល់មន្ទីរពេទ្យ និងអង្គការសប្បុរស ការទាក់ទាញភ្ញៀវទេសចរឲ្យមកទស្សនាតំបន់ទេសចរណ៍ប្រវត្តិសាស្ត្រក្នុងខេត្តសៀមរាប គឺគោលបំណងសំខាន់នៃការរៀបចំព្រឹត្តិការណ៍ទេសចរណ៍កីឡានេះ។ នេះបើតាមការបញ្ជាក់របស់លោក វ៉ាត់ ចំរើន។ បន្ថែមលើនេះ ការជួយបង្កើនសេដ្ឋកិច្ចជាតិ និងសេដ្ឋកិច្ចរបស់ប្រជាពលរដ្ឋ ដែលរកស៊ីលក់ផលិតផល និងសេវាកម្មក្នុងខេត្តនេះ ក៏ស្ថិតក្នុងគោលបំណងនៃព្រឹត្តិការណ៍នេះដែរ។
លោក វ៉ាត់ ចំរើន បានបញ្ជាក់ថា ចរន្តនៃដំណើរកម្សាន្តទៅកាន់តំបន់នានារបស់ភ្ញៀវទេសចរនៅលើពិភពលោក មាន២០ទៅ៣០ភាគរយបានមកពីការរៀបចំព្រឹត្តិការណ៍កីឡាបែបទេសចរណ៍។ ដោយមើលពីអត្ថប្រយោជន៍នៃផលិតផលទេសចរណ៍កីឡា រដ្ឋលេខាធិការក្រសួងទេសចរណ៍រូបនេះអះអាងថា លោកនឹងព្យាយាមបង្កើត ក៏ដូចជារៀបចំព្រឹត្តិការណ៍កីឡាបែបទេសចរណ៍នេះឲ្យកាន់តែច្រើនថែមទៀតនាពេលខាងមុខ។
ការប្រកួតនឹងចេញដំណើរពីទីលានជល់ដំរី ដោយរត់ឆ្លងកាត់ផ្លូវព្រៃ និងប្រាង្គប្រាសាទមួយចំនួននៅបរិវេណអង្គរ មុនបន្តដំណើររត់តាមផ្លូវវាលស្រែ និងភូមិរបស់ប្រជាពលរដ្ឋនៅក្បែរៗនោះ។ ការរត់អាចចំណាយពេល២៤ម៉ោង ដោយចេញដំណើរនៅម៉ោង៤ទៀបភ្លឺ និងមកទីនៅព្រឹកថ្ងៃបន្ទាប់។ គួរបញ្ជាក់ នេះសម្រាប់តែវិញ្ញាសារត់ចម្ងាយ១២៨គីឡូម៉ែត្រតែប៉ុណ្ណោះ៕