អ្នកស្រី ចក់ សុភាព៖ ពីរឆ្នាំចុងក្រោយ កម្ពុជា មានបញ្ហាច្រើនផ្នែកសិទ្ធិមនុស្ស ដែលត្រូវកែលម្អ

ជាតិ

សង្គមជាតិ

នយោបាយជាតិ

អ្នកស្រី ចក់ សុភាព៖ ពីរឆ្នាំចុងក្រោយ កម្ពុជា មានបញ្ហាច្រើនផ្នែកសិទ្ធិមនុស្ស ដែលត្រូវកែលម្អ

11, Dec 2018 , 10:39 pm

រូបភាព

ដោយ: ថ្មីៗ

អ្នកធ្វើការផ្នែកសិទ្ធិមនុស្ស មិនទាន់ពេញចិត្តមែនទែនទេ ចំពោះស្ថានការណ៍សិទ្ធិមនុស្សនៅកម្ពុជា បើទោះបីជារដ្ឋាភិបាល ប្រឹងលើកគុណសម្បត្តិខ្លួនឯង ថាបានឲ្យតម្លៃនិងលើកកម្ពស់សិទ្ធិមនុស្សក៏ដោយ។ មន្ត្រីសង្គមស៊ីវិល នៅតែចង់ឲ្យរដ្ឋាភិបាល សម្រួលស្ថានការណ៍ ដើម្បីឲ្យសិទ្ធិមនុស្សនៅកម្ពុជា មានភាពល្អប្រសើរជាងនេះ។

អ្នកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា (CCHR) បានទៅចូលរួមកម្មវិធីអបអរសាទរទិវាសិទ្ធិមនុស្សលើកទី៧០ ដែលរៀបចំដោយស្ថានទូតសហភាពអឺរ៉ុបប្រចាំកម្ពុជា នៅវិទ្យាស្ថានបច្ចេកវិទ្យាកម្ពុជា (តិចណូ) នាថ្ងៃទី១០ ខែធ្នូ ឆ្នាំ២០១៨។ ក្នុងឱកាសនោះ អ្នកស្រី ឆ្លៀតផ្តល់បទសម្ភាសខ្លី ដល់អ្នកកាសែត ជុំវិញបញ្ហាសិទ្ធិមនុស្សនៅកម្ពុជា។

ស្ទើរតែផ្ទុយស្រឡះពីមន្ត្រីរដ្ឋាភិបាល អ្នកស្រី ចក់ សុភាព សង្កេតឃើញថា ក្នុងរយៈពេលពីរឆ្នាំចុងក្រោយនេះ មានការរឹតត្បិតនិងការគំរាមកំហែងជាច្រើន ទៅលើអង្គការ-សង្គមស៊ីវិល។ បើតាមអ្នកស្រី ស្ថានភាពសិទ្ធិមនុស្ស កាន់តែយ៉ាប់យ៉ឺន ក្រោយពីគណបក្សសង្គ្រោះជាតិ ត្រូវបានរំលាយចោល ហើយថ្នាក់ដឹកនាំនៃគណបក្សនេះ ត្រូវបានផាត់ចេញពីឆាកនយោបាយ រួមទាំងការចោទប្រកាន់ លើអ្នកកាសែត និងវិធានការក្តៅលើស្ថាប័នសារព័ត៌មានមួយចំនួន ដូចជាអាស៊ីសេរីនិងខេមបូឌាដេលី ជាដើម។ អ្នកស្រី ហៅវិធានការទាំងនេះ ថាជាការធ្វើឲ្យប៉ះពាល់ខ្លាំងដល់តួអង្គប្រជាធិបតេយ្យ។

រម្លឹកដល់រឿងទាំងនេះ អ្នកស្រី ចក់ សុភាព ដែលទើបនឹងទទួលបានពានផ្នែកសិទ្ធិមនុស្សនិងនីតិរដ្ឋពីរដ្ឋាភិបាលបារាំង-អាល្លីម៉ង់ ក៏ឆ្លៀតស្នើឲ្យរដ្ឋាភិបាលកម្ពុជា សម្រួលស្ថានការណ៍ឡើងវិញ ដោយទម្លាក់ចោលរាល់បទចោទ ចេញពីលោក កឹម សុខា សកម្មជននយោបាយ សកម្មជនសិទ្ធិមនុស្ស អ្នកកាសែត និងមេសហជីព។ អ្នកស្រី អះអាងថា ការធ្វើដូច្នេះ គឺជាចំណុចវិជ្ជមាន ដែល អាចលើកម្ពស់សិទ្ធិមនុស្សនៅកម្ពុជា។

ប្រធានអង្គការក្រៅរដ្ឋាភិបាល ដែលមានបទពិសោធច្រើនឆ្នាំផ្នែកសិទ្ធិមនុស្សរូបនេះ បានសង្កត់យ៉ាងដូច្នេះថា៖«ខ្ញុំចង់ឃើញការប្តេជ្ញាចិត្តរបស់រដ្ឋាភិបាល ក្នុងធានាថា រាល់បទចោទនានា ទៅលើអ្នកទាំងនោះ ត្រូវបានទម្លាក់ចោល ដើម្បីអនុញ្ញាតឲ្យពួកគាត់ធ្វើសកម្មភាព ដោយសេរី ដោយគ្មានការភ័យខ្លាច ថាពួកគាត់ នឹងមានការចោទប្រកាន់ ឬក៏ការចាប់ចង»។

លើសពីនេះ អ្នកស្រី ក៏ស្នើឲ្យរដ្ឋាភិបាល បន្ធូរដៃឲ្យសកម្មជនដទៃ ដែលបានភៀសខ្លួនទៅក្រៅប្រទេសផងដែរ ដើម្បីឲ្យពួកគេ បានត្រឡប់មកបំពេញការងារនៅកម្ពុជាវិញ។ អ្នកជំនាញផ្នែកសិទ្ធិមនុស្សរូបនេះ បញ្ជាក់ថា៖«ខ្ញុំគិតថា វា ជាចំណុចសំខាន់ ដែលរដ្ឋាភិបាលគួរតែធ្វើភ្លាមៗ»។

រឿងសំខាន់មួយទៀត ដែលអ្នកស្រី ចក់ សុភាព ចង់បានដែរនោះ គឺរដ្ឋាភិបាល គួរតែមើលឃើញពីតួនាទីរបស់អង្គការ-សង្គមស៊ីវិល ដែលធ្វើការងារ ដើម្បីលើកស្ទួយសិទ្ធិមនុស្សនៅកម្ពុជា។ អ្នកស្រី ប្រាប់ទៅរដ្ឋាភិបាលថា អង្គការ-សង្គមស៊ីវិល គ្មានបំណងចង់ផ្តួលរំលំរដ្ឋាភិបាលនោះទេ។

អ្នកស្រី លើកឡើងបែបនេះថា៖«រដ្ឋាភិបាល គួរតែមើលឃើញអង្គការ-សង្គមស៊ីវិល ជាដៃគូ។ តែមិនមែនដៃគូ ដែលចាំតែយល់ព្រមតាមគ្រប់រឿងនោះទេ។ ពេលខ្លះ យើងមានមតិផ្ទុយគ្នា ដែលជាគោលការណ៍សំខាន់ក្នុងលទ្ធិប្រជាធិបតេយ្យ»។

អ្នកស្រី បន្ថែមទៀតថា៖«ខ្ញុំ គិតថា ចំណុចសំខាន់បំផុតនោះ គឺរដ្ឋាភិបាល គួរតែលុបចោលនូវបរិបថមួយ ដែលសម្លឹងឃើញ អង្គការ-សង្គមស៊ីវិល ជាសត្រូវ ឬក៏មានការលាបពណ៌ថាសង្គមស៊ីវិល ជាចលនាបដិវត្តណាមួយនោះ។ យើង គួរតែបើកលំហ ដែលកម្ពុជា អាចទទួលយកមតិរិះគន់ និង មតិចម្រុះ ដែលយើងអាចមើលឃើញគោលដៅមួយ គឺយើងធានានូវការគោរពនិងការការពារសិទ្ធិមនសុ្ស។ បើយើងមើលឃើញគោលដៅរួមគ្នា ខ្ញុំគិតថាមិនមានអ្វីដែលត្រូវមើលឃើញគ្នាជាសត្រូវនោះទេ។ ប៉ុន្តែយើងគួរតែមើលឃើញគ្នាជាដៃគូ ដែលចង់ឃើញប្រទេស មាននីតិរដ្ឋនិងការគោរពសិទ្ធិមនុស្សពិតប្រាកដ»។

យ៉ាងណាក៏ដោយ មន្ត្រីរដ្ឋាភិបាល នៅតែលើកឡើងជាដដែលៗថា កម្ពុជា គ្មានបញ្ហាសិទ្ធិមនុស្សនោះទេ។ ក្នុងទិវាសិទ្ធិមនុស្សលើកទី៧០ លោក កែវ រ៉េមី បានថ្លែងថា បើប្រៀបជាមួយនឹងសហរដ្ឋអាមេរិក អឺរ៉ុប និងបណ្តាប្រទេសផ្សេងទៀតនៅអាស៊ី ស្ថានភាពសិទ្ធិមនុស្សនៅកម្ពុជា មានលក្ខណៈល្អខ្លាំងណាស់។

ថ្មីៗនេះ រដ្ឋាភិបាល បានប្រកាសពីឆន្ទៈក្នុងការពង្រឹងសិទ្ធិមនុស្សនៅកម្ពុជា និងសម្តែងការយកចិត្តទុកដាក់ខ្លាំងចំពោះអង្គការ-សង្គមស៊ីវិល។ អ្វីដែលធ្វើឲ្យគេ រឹតតែសាទរនោះ គឺរដ្ឋាភិបាល បានប្រកាសពីការធ្វើវិសោធនកម្មច្បាប់ស្តីពីគណបក្សនយោបាយ ដែលគេ ដឹងថាបំណាងនៃការធ្វើវិសោធនកម្មនេះ ទំនងជាចង់បើកច្រកឲ្យថ្នាក់ដឹកនាំនៃអតីតគណបក្សប្រឆាំង បានវិលមកកាន់ឆាកនយោបាយវិញ៕