ជាតិ
ស.ស.យ.ក រៀបចំពិព័រណ៍វិទ្យាសាស្ត្រ និងបច្ចេកវិទ្យា ដើម្បីបណ្តុះផ្នត់គំនិត និងបង្កើនការយល់ដឹងដល់សិស្សនិស្សិត
× ភ្នំពេញ៖ សហភាពសហព័ន្ធយុវជនកម្ពុជា រាជធានីភ្នំពេញ ក្រោមកិច្ចសហការជាមួយក្រសួងបរិស្ថាន និងសារមន្ទីរចល័តពិព័រណ៍វិទ្យាសាស្ត្រ និងបច្ចេកវិទ្យាចិន នឹងរៀបចំការតាំងពិព័រណ៍វិទ្យាសាស្ត្រ និងបច្ចេកវិទ្យា រយៈពេល៣ថ្ងៃ ចាប់ពីថ្ងៃទី ១៣-១៥ ធ្នូ នាអគារខេមរានី រាជធានីភ្នំពេញ។ ពិព័រណ៍វិទ្យាសាស្ត្រ និងបច្ចេកវិទ្យានេះ រៀបចំឡើងដើម្បីបណ្តុះផ្នត់គំនិត តម្រង់ទិស និងបង្កើនការយល់ដឹងដល់សិស្សនិស្សិត។
បើតាមទំព័រហ្វេសប៊ុកផ្លូវការរបស់សហភាពសហព័ន្ធយុវជនកម្ពុជា រាជធានីភ្នំពេញ ពិព័រណ៍វិទ្យាសាស្ត្រ និងបច្ចេកវិទ្យានេះ ជាព្រឹត្តិការណ៍មួយលើកទឹកចិត្តដល់កុមារ យុវជន សិស្ស និស្សិត ឲ្យចាប់យកជំនាញបច្ចេកទេស និងវិទ្យាសាស្ត្រក្នុងសម័យឧស្សាហកម្ម និងឌីជីថល។ ជាមួយគ្នានេះ នឹងចូលរួមលើកកម្ពស់សមត្ថភាព ការប្រកួតប្រជែង និងការរស់នៅដោយចីរភាព តាមរយៈការមកទទួលចំណេះដឹងលើបច្ចេកទេស, បច្ចេកវិទ្យា និងសាកល្បង ដោយផ្សារភ្ជាប់ទ្រឹស្តីទៅនឹងការអនុវត្តជាក់ស្តែង។
តាមរយៈពិព័រណ៍នេះ នឹងផ្ដល់ឱកាសឲ្យយុវជនដែលចូលរួម ទទួលបានការប៉ះផ្ទាល់ អនុវត្តផ្ទាល់ ជាមួយវិទ្យាសាស្ត្រផងដែរ។ សម្រាប់ការតាំងពិព័រណ៍នេះ យុវជន សិស្ស និស្សិត និងសាធារណជនទូទៅ អាចចូលរួមដោយសេរី។នេះបើតាមទំព័រហ្វេសប៊ុកផ្លូវការរបស់សហភាពសហព័ន្ធយុវជនកម្ពុជា រាជធានីភ្នំពេញដដែល៕
Tag:
វិទ្យាសាស្រ្ត
បច្ចេកវិទ្យា
ស.ស.យ.ក
យុវជន
© រក្សាសិទ្ធិដោយ thmeythmey.com