និស្សិត៦ក្រុម នឹងប្រកួតវគ្គផ្ដាច់ព្រ័ត្រពានរង្វាន់គីណាល់លើកទី៦ នៅថ្ងៃទី១៥ ធ្នូនេះ

ជាតិ

២៥ខេត្ត/រាជធានី

និស្សិត៦ក្រុម នឹងប្រកួតវគ្គផ្ដាច់ព្រ័ត្រពានរង្វាន់គីណាល់លើកទី៦ នៅថ្ងៃទី១៥ ធ្នូនេះ

13, Dec 2018 , 3:34 pm

រូបភាព

ដោយ: ឡាយ សុភាវតី

ភ្នំពេញ៖ និស្សិត៦ក្រុមបានជាប់នៅវគ្គពាក់កណ្តាលផ្តាច់ព្រ័ត្រក្នុងចំណោមនិស្សិត២៦ក្រុម ដែលបានចូលរួមប្រកួត«ស្នាដៃអត្ថបទស្រាវជ្រាវដណ្តើមពានរង្វាន់គីណាល់លើកទី៦» ឆ្នាំ២០១៨ ក្រោមប្រធានបទ៖ «FEVER MEDICATIONS AND CARE» ដែលឧបត្ថម្ភដោយមូលនិធិគីណាល់។ «មូលនិធិគីណាល់» បានបង្កើតឡើងនៅឆ្នាំ២០១៤ ដោយលោក ហៃ លីអ៊ាង អគនាយកនៃ PPM និងស្ថាបនិករបស់ CONFIREL។ កម្មវិធីប្រកួត«ពានរង្វាន់គីណាល់» បង្កើតឡើង តាំងពីឆ្នាំ២០១៣ ក្នុងគោលបំណងផ្ដោតលើការសិក្សាផ្នែកឱសថសាស្ត្រស្រាវជ្រាវ ដើម្បីចូលរួមលើកស្ទួយវិស័យអប់រំផ្នែកសុខភិបាល។

និស្សិតទាំង៦ក្រុម នឹងត្រូវឡើងប្រកួតវគ្គផ្តាច់ព្រ័ត្រ នៅវិទ្យាស្ថានភាសាបារាំងប្រចាំកម្ពុជា (IFC) នាថ្ងៃសៅរ៍ ទី១៥ ខែធ្នូ វេលាម៉ោង៧:៣០ព្រឹកដល់ម៉ោង៤:៣០រសៀល។ កម្មវិធីប្រកួតពានរង្វាន់គីណាល់នេះ នឹងជ្រើសរើសយក៣ក្រុម ជាប់ជាម្ចាស់ជ័យលាភីពានរង្វាន់គីណាល់លើកទី៦ ឆ្នាំ២០១៨។

ក្រុមនិស្សិតទទួលបានជ័យលាភីលេខ១៖ ទទួលបានពាន១ និងទឹកប្រាក់៤លានរៀល, លេខ២៖ ទទួលបានពាន១ និងទឹកប្រាក់២លានរៀល និងលេខ៣៖ ទទួលបានពាន១ និងទឹកប្រាក់១លាន២០ម៉ឺនរៀល។ សម្រាប់ក្រុមដែលទទួលបានលេខ៤, លេខ៥ និងលេខ៦ ទទួលបានទឹកប្រាក់៤០ម៉ឺនរៀលក្នុងមួយក្រុម។ ពិធីទទួលពានរង្វាន់នេះ ប្រារព្ធឡើងក្រោមអធិបតីភាពលោក មៀច សុផាន់ធា រដ្ឋលេខធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ នៅថ្ងៃប្រកួតវគ្គផ្តាច់ព្រ័ត្រតែម្តង។

សូមបញ្ជាក់ថា និស្សិតទាំង២៦ក្រុម ដែលបានចូលរួមប្រកួតប្រជែងស្នាដៃអត្ថបទស្រាវជ្រាវដណ្តើមពានរង្វាន់គីណាល់លើកទី៦ ឆ្នាំ២០១៨ ក្រោមប្រធានបទស្តីពី៖ «FEVER MEDICATIONS AND CARE»នេះ មកពីសកលវិទ្យាល័យវិទ្យាសាស្ត្រសុខភិបាល, សកលវិទ្យាល័យពុទ្ធិសាស្ត្រ, សកលវិទ្យាល័យអន្តរជាតិ, សកលវិទ្យាល័យន័រតុន, វិទ្យាស្ថានវិទ្យាសាស្ត្រសុខភិបាល និងសាលាបច្ចេកទេសថែទាំវេជ្ជសាស្ត្រ៕