ជាតិ
បទយកការណ៍ / បទសម្ភាសន៍
×![]()
ភ្នំពេញ៖ ទោះជាពិការភាព តែកញ្ញា ឈឺន ទេវី និងកញ្ញា ឈឺន ស្រីពេជ្រ តស៊ូសិក្សារៀនសូត្រ និងបានបម្រើការងារ ដូចបុគ្គលដែលមានកាយសម្បទាធម្មតាដែរ។ អ្នកទាំងពីរចាំជាប់ក្នុងចិត្តថា«មុនឲ្យគេជួយ ត្រូវជួយខ្លួនឯងសិន» ហើយមានតែការអប់រំទេ ទើបរំដោះពួកគេពីភាពលំបាក និងកុំឲ្យគេមាក់ងាយ។
តើកញ្ញា ឈឺន ទេវី និងកញ្ញា ឈឺន ស្រីពេជ្រ មានការតាំងចិត្ត ដើម្បីជម្នះភាពលំបាកដោយសារពិការភាពរបស់ខ្លួន យ៉ាងដូចម្ដេច? សូមស្ដាប់កិច្ចសម្ភាសរវាងលោក ញ៉ុង ហេង នៃសារព័ត៌មានថ្មីៗ និងអ្នកទាំងពីរ ដូចតទៅនេះ៖
ដ្បិតថាមានត្រកូលដូចគ្នា តែអ្នកទាំងពីរមិនមែនជាបងប្អូននឹងគ្នានោះទេ តែជាមិត្តភក្ដិ។ កញ្ញា ឈឺន ស្រីពេជ្រ ពិការប៉ូលីយ៉ូដៃ និងជើង ដែលត្រូវអង្គុយលើរទេះរុញ។ ស្រីពេជ្រ មានសមត្ថភាពផ្នែកគណនេយ្យ ដោយកំពុងធ្វើការនៅអង្គការមួយ និងរៀនបរិញ្ញាបត្រឆ្នាំទី៤លើជំនាញមួយនេះ។ ស្រីពេជ្រ ជាសិស្សពូកែគណិតវិទ្យា ដោយទទួលបាននិទ្ទេសA កាលពីប្រឡងបាក់ឌុប។ ក្រៅពីគណនេយ្យ ស្រីពេជ្រ មានចំណង់ចំណូលចិត្តផ្នែកព័ត៌មានវិទ្យា។ កញ្ញាបានចេញទៅប្រឡងពានរង្វាន់អន្តរជាតិមួយនៅប្រទេសឥណ្ឌា ដែលមានជនពិការមកពី ១៧ប្រទេសចូលរួម ប៉ុន្តែមិនទទួលបានជ័យលាភីនោះទេ។
«ទោះយើងពិការ តែត្រូវចេញមកសង្គមខាងក្រៅ កុំបិទសិទ្ធិសេរីភាពខ្លួនឯង។ យើងពិការតែកាយបានហើយ កុំឲ្យចិត្តពិការ»។ នេះជាការលើកឡើងរបស់កញ្ញា ឈឺនស្រីពេជ្រ ។
រីឯកញ្ញា ឈឺន ទេវី បានបញ្ចប់បរិញ្ញាបត្រផ្នែកធនធានមនុស្ស និងកំពុងធ្វើការនៅអង្គការផ្នែកស្រី្តមួយផងដែរ។ ការពិត ទេវី មានទេពកោសល្យផ្នែករចនារូបភាព វីឌីអូ ហើយរូបគេនឹងសិក្សាបន្ថែមជំនាញមួយនេះទៅថ្ងៃមុខ។ រូបនាងពិការប៉ូលីយ៉ូជើងស្ដាំ។
អ្នកទាំងពីរ អះអាងថា ធ្លាប់ទទួលរងការពេបជ្រាយ និងតូចចិត្តម្ដងៗដែរ ប៉ុន្តែព្យាយាមយកខ្លួនឯងចេញពីទីងងឹតនោះ។ ទោះយ៉ាងណា អ្នកទាំងពីរសុទ្ធតែមានគ្រួសារ ចាំផ្គត់ផ្គង់ និងផ្ដល់កម្លាំងចិត្ត។ កញ្ញាស្រីពេជ្រ បានរម្លឹកពាក្យអប់រំពីគ្រួសារ ដែលដក់ជាប់ក្នុងចិត្តរបស់នាង យ៉ាងដូច្នេះថា៖«មុននឹងឲ្យគេជួយ ត្រូវជួយខ្លួនឯងសិន»។ ទន្ទឹមនឹងនេះ កញ្ញាស្រីពេជ្រ ក៏ដូចជាកញ្ញា ទេវី ដែរ គឺយល់ដូចគ្នាថា មានតែការអប់រំទេ ទើបរំដោះជីវិតរបស់ខ្លួនឲ្យភ្លឺថ្លា៕
Tag:
ឈឺន ទេវី
ឈឺន ស្រីពេជ្រ
ពិការ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
