គ្រូខ្លះ រអ៊ូពីរឿងមិនទាន់បើកប្រាក់ កែវិញ្ញាសាប្រឡងគ្រូមតេ្តយ្យនិងបឋម តែក្រសួង ថាកំពុងដោះស្រាយ

ជាតិ

គ្រូខ្លះ រអ៊ូពីរឿងមិនទាន់បើកប្រាក់ កែវិញ្ញាសាប្រឡងគ្រូមតេ្តយ្យនិងបឋម តែក្រសួង ថាកំពុងដោះស្រាយ

14, Dec 2018 , 2:50 pm

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ ក្រោយមានការធ្វើកំណែ និងប្រកាសលទ្ធផលប្រឡងជ្រើសរើសគ្រូបង្រៀនបឋមសិក្សានិងមត្តេយ្យសិក្សាកន្លងថ្មីៗនេះ គ្រូមួយចំនួន បានរអ៊ូរទាំថា ក្រសួងអប់រំ យូរបើកប្រាក់កម្រៃឲ្យ។ តែអ្នកនាំពាក្យ ឆ្លើយតបថា ក្រសួង កំពុងតែគិតគូររឿងនេះ។

ស្ថិតនៅក្នុងដំណាក់កាលនេះ ក្រសួងអប់រំ បានស្នើឲ្យគ្រូៗទាំងនោះ រង់ចាំ និងមានការអធ្យាស្រ័យ។ លោក រស់ សុវាចា អ្នកនាំពាក្យក្រសួងអប់រំ បានប្រាប់សារព័ត៌មានថ្មីៗតាមទូរសព្ទដូច្នេះថា៖«ក្រុមការងារជំនាញរបស់ក្រសួង កំពុងខិតខំធ្វើរឿងនេះ ដើម្បីឲ្យមានដោះស្រាយកាន់តែឆាប់ ក្នុងការផ្តល់ថវិកាជូនគ្រូធ្វើកំណែលើវិញ្ញាសាទាំងអស់។ ប៉ុន្តែយើងត្រូវការពេលវេលាបន្តិច ដើម្បីដោះស្រោយ»។

លោក ឃិន វណ្ណឌី ជាគ្រូឧទេ្ទសនៃវិទ្យាស្ថានជាតិអប់រំ ដែលបានចូលរួមធ្វើកំណែលើវិញ្ញាសាវប្បធម៌ទូទៅនៃការប្រឡងជ្រើសរើសគ្រូបង្រៀនបឋមសិក្សានិងមត្តេយ្យសិក្សា បានប្រតិកម្មនឹងក្រសួងអប់រំ ដែលមិនទាន់ប្រគល់ថវិកាឲ្យ និងមិនព្រមបញ្ជាក់ថ្ងៃកំណត់ប្រគល់ថវិកា។

តាមរយៈការផ្តល់បទសម្ភាសដល់សារព័ត៌មានថ្មីៗ លោក បានលើកឡើងបែបនេះថា៖«កន្លងមកកញ្ចាប់ថវិកាទាំងនេះ ក្រសួងតែងតែប្រគល់ឲ្យ នៅពេលធ្វើកំណែចប់យ៉ាងយូរក្រោយមួយថ្ងៃ។ ប៉ុន្តែឆ្នាំនេះ ខ្ញុំបានចុះហត្ថលេខាទទួលប្រាក់សរុបជាង១លានរៀលហើយ តែជាក់ស្តែងខាងក្រសួង នៅតែមិនទាន់ប្រគល់ឲ្យទៀត»។

ជាមួយគ្នានេះ លោក មាស ជុតិមា និង គ្រូម្នាក់ទៀត ដែលជាសមាជិកគ្រូកំណែលើវិញ្ញាសាវប្បធម៌ទូទៅនៃការប្រឡងខាងលើ ក៏មិនទាន់ទទួលបានកញ្ចប់ថវិកាដែរ។ ពួកលោក រំពឹងថានឹងទទួលថវិកានេះ ពីក្រសួងនៅសប្តាហ៍ក្រោយ។

ជាការឆ្លើយតបទៅនឹងបញ្ហានេះ លោក រស់ សុវាចា មិនទាន់អាចបញ្ជាក់បានទេ ថាក្រសួង នឹងកំណត់កាលបរិច្ឆេទនៃការប្រគល់ថវិកាជូនគ្រូៗ នៅពេលណា។ លោក បានត្រឹមតែអះអាងថា ក្រុមការងារជំនាញ កំពុងខិតខំដោះស្រោយបញ្ហាហិរញ្ញវត្ថុនេះ ឲ្យឆាប់បំផុត។

សូមបញ្ជាក់ថា សម័យប្រឡងជ្រើសរើសគ្រូបង្រៀនបឋមសិក្សានិងមត្តេយ្យសិក្សា (១២+២ និង ១២+៤) ធ្វើឡើងនៅថ្ងៃទី៣០វិច្ឆិកា ឆ្នាំ២០១៨។ ដោយឡែក ការធ្វើកំណែលើវិញ្ញាសាទាំង៣មុខវិទ្យា មានគណិតវិទ្យា ភាសាខ្មែរ និងវប្បធម៌ទូទៅ ធ្វើឡើងចាប់ពី២-៥ធ្នូ៕