វិបត្តិយេម៉ែន៖ អាមេរិកឲ្យអារ៉ាប៊ីសាអូឌីតនិងបក្សពួកទូទាត់លុយ៣៣១លានដុល្លារថ្លៃចាក់សាំងយន្តហោះចម្បាំង

អន្តរជាតិ

វិបត្តិយេម៉ែន៖ អាមេរិកឲ្យអារ៉ាប៊ីសាអូឌីតនិងបក្សពួកទូទាត់លុយ៣៣១លានដុល្លារថ្លៃចាក់សាំងយន្តហោះចម្បាំង

14, Dec 2018 , 9:19 pm

រូបភាព

ដោយ: តន ចាន់រិទ្ធារ៉ា

យោធាអាមេរិកកំពុងស្វែងរកការទូទាត់ប្រាក់ចំនួន៣៣១លានដុល្លារពីសំណាក់អារ៉ាប៊ីសាអូឌីត និងអេមីរ៉ាតអារ៉ាប់រួមជុំវិញថ្លៃចាក់សាំងឲ្យយន្តហោះប្រទេសទាំងពីរនេះក្នុងប្រតិបត្តិការនៅយេម៉ែន។ ការទាមទារនេះ កើតឡើងបន្ទាប់ពីមន្ទីរបញ្ចកោណអះអាងថា ខ្លួនមិនបានគិតថ្លៃទាំងនេះឡើយ ព្រោះមានបញ្ហាផ្នែគណនេយ្យ។ ចំនួនទឹកប្រាក់សន្ធឹកសន្ធាប់ខាងលើ រួមបញ្ចូលថ្លៃប្រេង និងរយៈពេលហោះហើរសម្រាប់រយៈពេលបីឆ្នាំ។

សម្ព័ន្ធមិត្តចម្រុះអារ៉ាប់ដោយដឹកនាំអារ៉ាប៊ីសាអូឌីត បានលូកចូលវិបត្តិយេម៉ែននៅឆ្នាំ២០១៥ ដោយធ្វើប្រតិបត្តិការដែនគោក និងការវាយប្រហារដែនអាកាសផង។ អាមេរិក មិនបានចូលរួមក្នុងវិបត្តិនេះដោយផ្ទាល់ឡើយ តែបានផ្គត់ផ្គង់អាវុធ និងផ្នែកភស្តុភារមួយចំនួនទៀត។ យ៉ាងណាមិញ អាមេរិកបានប្រកាសកាលពីខែមុនថា ខ្លួនឈប់ផ្គត់ផ្គង់សាំងឲ្យយន្តហោះអារ៉ាប៊ីសាអូឌីតដែលធ្វើប្រតិបត្តិការនៅយេម៉ែនទៀតហើយ។

បន្ទាប់ពីក្រោយឈប់ការផ្គត់ផ្គង់នេះ អាមេរិកមិនបានទារថ្លៃប្រេងឡើយ ដែលអ្នកនាំពាក្យមន្ទីរបញ្ចកោណអះអាងថា បណ្ដាលបញ្ហាខ្លះ។ អ្នកនាំពាក្យ Rebecca Rebarich បាននិយាយនៅថ្ងៃទី១៣ ខែធ្នូ ថា ទីបញ្ជាការយោធាអាមេរិកប្រចាំតំបន់មជ្ឈិមបូព៌ា (CENTCOM) បានត្រួតពិនិត្យបញ្ជីរបស់ខ្លួន ហើយក៏រកឃើញកំហុសផ្នែកគណនេយ្យដោយខកខានទូទាត់ថ្លៃសាំងយន្តហោះ និងថ្លៃហោះហើរពីសំណាក់អារ៉ាប៊ីសអូឌីត និងអេមីរ៉ាតអារ៉ាប់រួម។

បើតាមទូរទស្សន៍ CNN អង្គភាព CENTCOM បានកែប្រែកំហុសនេះរួចហើយ។ ក្រសួងការពារជាតិអាមេរិកនឹងទារថ្លៃសាំងចំនួន៣៦.៨លានដុល្លារ ហើយថ្លៃហោះហើរចំនួន២៩៤.៣លានដុល្លារ ដោយគិតពីខែមីនា ឆ្នាំ២០១៥ ដល់ខែវិច្ឆិកា ឆ្នាំ២០១៨ នេះ។ មន្ត្រីអ្នកនាំពាក្យខាងលើបន្តថា អាមេរិកបាននជូនដំណឹងទៅកាន់ប្រទេសទាំងពីរនេះរួចហើយជុំវិញបំណងទូទាត់ថ្លៃចំណាយរបស់ពួកគេ និងចំនួនទឹកប្រាក់ដែលត្រូវបង់។

កំហុសផ្នែកគណនេយ្យខាងលើ ត្រូវបានរកឃើញអំឡុងការស៊ើបអង្កេតរបស់លោក Jack Reed សមាជិកព្រឹទ្ធសភាអាមេរិក និងជាសមាជិកគណៈកម្មាធិការយោធាព្រឹទ្ធសភាផង។ លោក Reed ចាត់ទុកចំណាត់ការរបស់ក្រសួងការពារជាតិជារឿងល្អ ព្រោះនេះជាលុយពន្ធបង់ដោយប្រជាជនអាមេរិក ដែលមិនគួរជួបបញ្ហារបៀបនេះឡើយ។ យ៉ាងណាមិញ សមាជិកព្រឹទ្ធសភារូបនេះនិយាយថា បញ្ហានៅយេម៉ែននៅសល់ច្រើនណាស់។

ការទាមទារលុយជំពាក់ពីសំណាក់សម្ព័ន្ធមិត្តបែបនេះ អាចជាសញ្ញាបង្ហាញពីការធ្លាក់ចុះនៃទំនាក់ទំនងពិសេសរវាងក្រុងវ៉ាស៊ីនតោន និងក្រុងរីយ៉ាដ ក៏ដូចជាជាមួយសម្ព័ន្ធមិត្តតំបន់ឈូងសមុទ្រផង។ សង្គ្រាមនៅយេម៉ែន ជាប្រធានបទគ្មានប្រជាប្រិយភាពឡើយសម្រាប់ប្រជាជនអាមេរិក ខណៈបានអូសបន្លាយជាច្រើនឆ្នាំរហូតបង្កើតទៅជាវិបត្តិមនុស្សធម៌មិនធ្លាប់មានទៀតផង។ យ៉ាងណាមិញ គេមិនរំពឹងថា រដ្ឋបាលអាមេរិកលែងគាំទ្រមិត្តរបស់ខ្លួនដែលជាប់ដៃក្នុងជម្លោះនេះទេ៕