ជាតិ
គំនូរកម្ររបស់វិចិត្រករ ញឹក ឌឹម ដ៏ល្បីល្បាញ ត្រូវបានចុះបញ្ជីជាសម្បត្តិបេតិកភណ្ឌជាតិ រូបភាពពីហ្វេសប៊ុកក្រសួងវប្បធម៌ និងវិចិត្រសិល្បៈ
× ភ្នំពេញ៖ គំនូររបស់វិចិត្រករ ញឹក ឌឹម ស្ដីពី «ទេសភាពមាត់សមុទ្រ» ត្រូវបានក្រសួងវប្បធម៌ និងវិចិត្រសិល្បៈ យកទៅរក្សាទុក ដើម្បីចុះបញ្ជីជាសម្បត្តិបេតិកភណ្ឌជាតិ។ ពិធីប្រគល់និងទទួលផ្ទាំងគំនូរនេះ ធ្វើឡើងរវាងលោក អ៊ឹម ឈុនលឹម ប្រធាក្រុមប្រឹក្សាធម្មនុញ្ញ និងរដ្ឋមន្ត្រីក្រសួងវប្បធម៌និងវិចិត្រសិល្បៈ លោកស្រី ភឿង សកុណា នៅសារមន្ទីរជាតិ កាលពីថ្ងៃទី១១ ខែធ្នូ ឆ្នាំ២០១៨ កន្លងទៅ។
គំនូរ “ទេសភាពមាត់សមុទ្រ” នេះ ជាស្នាដៃនៅសេសសល់ដ៏កម្ររបស់វិចិត្រករ ញឹក ឌឹម ដែលកន្លងមកបានដាក់តាំងនៅក្នុងអគារ ”ស” នៃវិមានរដ្ឋចំការមន អតីតព្រះរាជដំណាក់ នៃព្រះករុណាព្រះបាទ សម្ដេចព្រះ នរោត្តម សីហនុ “ព្រះបរមរតនកោដ្ឋ” និងសម្ដេចព្រះមហាក្សត្រីយ៍ នរោត្តម មុនីនាថសីហនុ។
ឆ្លៀតក្នុងឱកាសនេះ សារព័ត៌មានថ្មីៗ សូមលើកយកជីវប្រវត្តិសង្ខេបរបស់ វិចិត្រករ ញឹក ឌឹម មកបង្ហាញខ្លះៗ ដើម្បីទុកជាការរម្លឹកដល់ថ្ងៃខួបមរណៈរបស់លោក នាថ្ងៃទី១៦ធ្នូ ដែលគិតមកដល់ឆ្នាំ២០១៨នេះ មានរយៈពេល៤០ឆ្នាំ។
កុមារា ញឹក ឌឹម ចាប់កំណើតនៅថ្ងៃទី១២ ខែកុម្ភៈ ឆ្នាំ១៩៣៤ ក្នុងគ្រួសារកសិករធូរធារមួយ ក្នុងស្រុកពារាំង ខេត្តព្រៃវែង។ ឪពុករបស់លោកឈ្មោះ ញឹក ពិដោរ ម្ដាយឈ្មោះ ព្រំ ពូល។ លោកជាកូនច្បងក្នុងគ្រួសារដែលមានបងប្អូន៧នាក់។ កុមារារូបនេះមានទេពកោសល្យ ផ្នែកគំនូរតាំងពីតូច។ ព្រោះតែឃើញពីឧបនិស្ស័យរបស់កូន លោក ញឹក ពិដោរ បាននាំលោកទៅសិក្សាផ្នែកគំនូរនៅសាលាវិចិត្រសិល្បៈខេមរៈ សព្វថ្ងៃហៅសាលាភូមិន្ទវិចិត្រសិល្បៈ ផ្នែកគំនូរបុរាណ ដែលមានគ្រូជាជនជាតិខ្មែរ និងជនជាតិជប៉ុនបង្រៀន។ លោករៀនពីឆ្នាំ១៩៤៩ ដល់ ១៩៥៤ ក្រោយពីរៀនចប់ភ្លាម លោកបានចូលទៅបម្រើការនៅក្នុងស្ថានទូតអាមេរិក ដែលទទួលបានប្រាក់ខែយ៉ាងច្រើន។ នៅឆ្នាំ ១៩៦៣ លោកបានទៅរៀននៅសហរដ្ឋអាមេរិក រយៈពេល៤ឆ្នាំ ផ្នែកផលិតភាពយន្តគំនូរជីវចល។ ក្នុងទសវត្សរ៍ទី៦០និង៧០ លោកត្រូវបានមហាជនចាត់ទុកជាវិចិត្រករដៃឯកគ្មានពីរ និងជាជនទី១របស់ខ្មែរ ដែលមានចំណេះដឹងផ្នែកគំនូរជីវចល និងជាវិចិត្រករគូរគំនូររូបថ្លុកដ៏ល្បី។
រូបភាពពីហ្វេសប៊ុកក្រសួងវប្បធម៌ និងវិចិត្រសិល្បៈ
កេរ្តិ៍ឈ្មោះរបស់វិចិត្រករ ញឹក ឌឹម មិនល្បីត្រឹមស្រទាប់ប្រជារាស្ត្រធម្មតា និងមន្ត្រីរាជការនោះទេ តែល្បីទៅដល់ព្រះមហាក្សត្រនាសម័យនោះផង។ លោកត្រូវបានអនុញ្ញាតឱ្យចូលក្រាបបង្គំគាល់ ព្រះករុណាព្រះបាទ សម្ដេចព្រះ នរោត្តម សីហនុ នាឆ្នាំ១៩៦៧។ គ្រានោះលោក ញឹក ឌឹម បានថ្វាយហ្វ៊ីលភាពយន្តគំនូរជីវចលរឿង “ទន្សាយបណ្ឌិត” ដែលជាស្នាដៃប្រឡងជាប់លេខ១ ក្នុងនិក្ខេបបទប្រឡងបញ្ចប់ការសិក្សានៅសហរដ្ឋអាមេរិកក្នុងឆ្នាំ ១៩៦៧ ដល់ ព្រះមហាក្សត្រដើម្បីរក្សាទុក។ ពេលនោះព្រះមហាក្សត្រទ្រង់ក៏ព្រះរាជទាន មេដាយកិត្តិយស និងវត្ថុអនុស្សាវរីយ៍ជាច្រើនទៀតដល់លោកផងដែរ។
ក្រោយមកទៀត ព្រះករុណាព្រះបាទ សម្ដេចព្រះ នរោត្តម សីហនុ ទ្រង់បានអនុញ្ញាតឱ្យលោក គូរគំនូរពណ៌ទឹក ដាក់ក្នុងសៀវភៅចម្រៀងកម្រងស្នេហា របស់ទ្រង់ និងគូររូបសម្រាប់តាំងក្នុងព្រះបរមរាជវាំងជាច្រើនទៀត ដែលបានបន្យល់ទុកដល់បច្ចុប្បន្ន។ ដោយចង់ឱ្យមហាជនទូទៅបានឃើញគំនូររបស់ខ្លួន នៅទសវត្សរ៍ទី៦០ដដែល លោក ញឹក ឌឹម បានបង្កើតវិចិត្រសាលមួយមានឈ្មោះថា “វិចិត្រសាល ញឹក ឌឹម”។ លោកក៏ជាអ្នកនិពន្ធប្រលោមលោក និងបទចម្រៀងផងដែរ។ ព្រោះតែកេរ្តិ៍ឈ្មោះដ៏ល្បីល្បាញរបស់វិចិត្រករ ញឹក ឌឹម បានធ្វើឱ្យរបបខ្មែរក្រហមយកលោកទៅសម្លាប់នៅថ្ងៃទី១៦ខែធ្នូ ឆ្នាំ១៩៧៨៕
Tag:
ភ្នំពេញ
គំនូរ
ញឹក ឌឹម
ក្រសួងអប់រំយុវជន និងកីឡា
© រក្សាសិទ្ធិដោយ thmeythmey.com